प्रभात इङलिस सेकेण्डरी लोप्खाङसे दाङ्जि ४३ छा स्हेङ्खेन दिङउत्सव
खापोङ । प्रभात इङलिस सेकेन्डरी लोप्खाङ्से बेने (फगुन) ३ गते कामरेकुनु ४३ छा स्हेङ्खेन दिङउत्सव दाङ्जि । चु लोप्खाङ ‘प्रभात सार्वजनिक शिक्षा गुठी’ से संचालन लासिकेन खामुला ।
दिङउत्सवरि साँस्कृतिक गेताङला छ्याम पुरस्कार नोन बोलाबा मुबा ।
नेपाल मजदुर किसान पार्टीला चोहो÷वरिष्ठ ग्लेठिमखेन्पो नारायणमान बिजुक्छेसे गमलारि मुबा बिरुवारि क्युइ युसि गेताङला ठ्वाङ्सेन लाबा मुबा । छ्यामरि लोप्खाङसे दिङउत्सवरि तेबा सुङ्स्यो (मुखपत्र) विमोचन लाबा मुबा ।
गेताङरि ग्रेनडोन्बो बिजुक्छेसे खोपोङ्दा स्याबा, कोबाला सहर बिसि दोङरापरि ङोसेबासे लोप्खाङ्ला लोप्बोन क्योङ्से स्याबा, कोबा, क्लाङ्बाला छ्याम स्यान्दो अतिरिक्त गेरि नोन सक्रिय तासि ह्राङ्ला व्यक्तित्व स्होतोला बिसि पाङ्जि ।
‘ह्याङ्से किन्तोबा ग्युइसेर जेक्खे आहिन । क्लाङ्छ्योङ , ह्रोल्ज्याङ, स्याबाला छ्याम ल्होलो अतिरिक्त गेरि नोन निपुर्ण तातोला ।’ ग्रेनडोन्बो बिजुक्छेसे पाङ्जि, ‘क्लाङसे म्हिदा प्रतिस्पर्धाला भावना ल्हेना लासि शत्रुतेन प्रतिवाद लाबारि लोप्ला ।’
नेमकिपाला केन्द्रीय गौराइ÷संघीय सांसद ओसेम प्रभात लोप्खाङला डिछ्या समितिला चोहो प्रेम सुवालसे लोप्खाङरि लोप्बोनजुगुदा दुइआन्सार ग्युइसेर पिन्तोला बिसि पाङ्जि । थेसे चुला लागि दातेला पाठ्यक्रम परिमार्जन लातोबा सेमतेन थान्जि ।
सांसद प्रेम सुवालसे चु लोप्खाङरि चित्रकला, हस्तकलाला छ्याम ह्रोल्ज्योरि नोन तालिम पिन्बा मुला बिसि पाङ्जि । ‘लोप्खाङरि दाते पियानो, फुन्टि, धिमे, बाँसुरीला छ्याम ह्रोल्ज्यो तालिम पिन्बा लामुला ।’ सुवासे बिजि, ‘चुला छ्याम बौद्धिक विकासला लागि व्हाइ, व्हाइखा, हाजिरीजवाफ ह्राङ्बा ग्योइकाइ थुमरि नोन प्रशिक्षण पिन्बा लामुला ।’
गेताङरि नेमकिपाला केन्द्रीय ह्रोम्हि ओसेम बागमती प्रदेश सांसद सिर्जना सैंजुले प्रभात लोप्खाङरि गतिविधि ज्याबा मुला बिसि प्रशंसा लाजि ।
गेताङरि नेमकिपा खोपोङ जिल्ला ह्रोम्हि ओसेम बागमती प्रदेश सांसद गीता काफ्ले, ईन्जिनियर रामबिन्दु श्रेष्ठ, अभिभावक ग्याम्से अजेन्द्रकुमार लघु, बुढानिलकण्ठ लोप्खाङला प्राचार्य दीपक कायष्ठ, प्रभात लोप्खाङला प्राचार्य वदनकेशरी प्रजापति, खोपोङ नगरपालिका २ नं. वडाचोहो हरिप्रसाद बासुकला, लोप्खेनकादे अनिता न्हुच्छे, तारा न्यौपानला छ्याम ल्होलो डोन्बोकादेसे ह्राङ्ह्राङ्ला ताम थान्मुबा ।
(छिगला अर्थः ग्युइसेर– शिक्षा, क्लाङ्छ्योङ– खेलकुद्, ह्रोल्ज्याङ– संगीत, क्लाङ– खेल, ह्रोम्हि– सदस्य, ।)
तपाईको प्रतिक्रिया दिनुहोस