नुवाकोट । सूर्यगढी गाउँपालिका वडा नं. १ लच्याङसे बेने ७ गते लोप्खाङरि डोबा बिजामुबोजुगुदा शैक्षिक स्टेशनरी थेन क्लाङछ्योङ सामाग्री बोलाबा मुबा ।

वडाचोहो राजकुमार तामाङ ‘रन्जित’ला चोहोदानरि ताबा चु गेताङरि स्यान्दो डोन्बोजुगु लच्याङ बहुउद्देश्यीय सहकारी सस्था लिमिटेडला चोहो रामेश्वर खनाल, वडा ह्रोम्हिजुगु रबिन्द्र गोले तामाङ, बुद्धिमाया तामाङ,  धनमाया सुनार मुबा ।

चुह्राङ्नोन लासि गेताङरि वडा गेदिमला कर्मचारी दिनेश श्रेष्ठ, गजेन्द्रबहादुर बोहोरा, सुर्यगढी गाउँपालिका स्तरीय बाल संजालला चोहो सबिना तामाङ, वडा स्तरीय बाल क्लब संजालला चोहो सुरज तामाङ, स्यान्दो बाल क्लबला चोहो थेन पदाधिकारीजुगु, श्री मंगलादेबि मा.बि थेन दुधेदेबि माबिला लोप्खेन प्रतिनिधि ओम लोप्बोनसे बोकिन्बा मुबा ।

गेताङरि श्री मंगलादेबि मा.बि थेन दुधेदेबि माबिला लोप्बोनजुगुदा शैक्षिक सामाग्री (कपि, डट्पेन, क्यालकुलेटर, ज्यमितीय बक्स) बोलाबा मुबा ।

गोर ङ्हा बाल क्लबदा नोन स्टेशनरीला छ्याम क्लाङछ्योङ सामाग्री बोलाबा मुबा ।

गेताङरि लोप्बोनजुगुसे ह्राङ्ला ब्रिताम, गजलला छ्याम ल्होलो रचनाकादे नोन डोबा मुबा । गेताङरि ताबा हाजिरी जवाफ प्रतियोगितारि लालीगुराँस सामुदायिक बाल क्लब गिक्छा थेन मंगालदेवी थेन दुधे मावि बाल क्लब च्योच्यो बोला छ्याम ङ्हिछा ताबा मुबा ।

छाप सक्रिय बाल क्लब सोमछा ताबा मुबा । प्रतियोगितारि डाबाजुगुदा प्रमाणस्यो थेन स्टेशनरी सामाग्रीला छ्याम पुरस्कार पिन्बा मुबा ।

चु गेताङ ग्याम्से सुरज तामाङला चोहोदानरि वडा स्तरीय बाल क्लब संजाल समितिला छार कार्यसमिति स्होबा मुला ।

कार्यसमितिला ह्रोचोहोरि लक्ष्मी तामाङ, गौराइरि सुनिता तामाङ, छ्यागौराइरि राजेश श्रेष्ठ, न्होरचोहोरि राजिभ तामाङ मुला ।

कार्यसमितिला ह्रोम्हिजुगुरि पासाङ तामाङ, सरिता तामाङ, विशाल तामाङ, सुमित्रा तामाङ, अनिता तामाङ, सोममाया तामाङ मुला ।

(छिगला अर्थः क्लाङ्छ्योङ– खेलकुद, बिजाबुमो– बालबालिका, बेने– फागुन, बो– अंक, गौराइ– सचिव, छ्यागौराइ– सहसचिव, ह्रोम्हि– सदस्य, ।)