याम्बु । चेगाइ दिङ्साङला दुइसाङरि वर्तमान कविता समुहसे ग्रीनलिफ फुड, पुतलीसडकरि तिनि ‘प्रेमको आदिम गीत’ला विमोचन थेन विशेष व्हाइखा डोबा गेताङ ङ्योइसाङ लाजि ।

गेताङरि ११ म्हे (जना) व्हाइखाब्रिखेनजुगु विधान आचार्य, भीष्म उप्रेती, टङ्क उप्रेती, रमी प्रिया, सुमन थापा संगम, दिलकुमारी डङ्गोल, धीरकुमार श्रेष्ठ, चन्द्रबहादुर लामा, सन्जय सुमन, विश्व सिग्देल थेन ईश्वर थोकरला संयुक्त लिरि चेगाइ व्हाइखा पोप अंग्रेजी दोःबाला छ्याम ‘प्रेमको आदिम गीत’ विमोचन ताजि ।

चु पोपला व्हाइखाब्रिखेनजुगुसे चेगाइला ल्होलो आयामजुगु– आकांक्षा, आवेग, डान्बा, फेबा थेन भावनात्मक नुप्बादा प्रस्तुत लाबा मुबा । तिगाइ व्हाइखाजुगुरि चेगाइला गहन भावदा उन्बारि प्रकृतिदा रुपकला लिरि प्रयोग लाबा मुला, थेरि स्योङ, गान्दि थेन ऋतुदा चेगाइला अभिव्यक्तिला लिरि उन्बा मुला । तिगाइ व्हाइखाजुगुसे बिसाम दार्शनिक दृष्टिकोण प्रस्तुत लाबान चेगाइदा अस्तित्व, दुइ थेन म्हिला भावनातेन थुइसि व्याख्या लाबा मुला । ल्होलो व्हाइखाब्रिखेन काइजुगुसे चेगाइला डिक्बा थेन फेबादा कलात्मक तोसोसे प्रस्तुत लाबा मुला ।

विमोचन लिच्छा विमोचन लाबा छ्योइला व्हाइखाब्रिखेनजुगुतेन स्यान्दो व्हाइखाब्रिखेनजुगु रामगोपाल आशुतोष, किशोर पहाडी, स्नेह सायमी, रजनीमिला, लक्ष्मी माली, विणा नेम्कुल, नानीबाबा अधिकारी, गोविन्द नेपाल, श्रीओम श्रेष्ठ रोदनला छ्याम व्हाइखा डोबा मुबा ।

गेताङ्ला उद्घोषण राधिका अधिकारीसे लाबा मुबा । गेताङरि वर्तमान कविता समुहला ह्रोम्हि ओसेम शब्दाङ्कुर लालातिरेमला ग्रेन डिक्खेन धीरजकुमार श्रेष्ठसे वर्तमान कविता समुहला तुन्बा ङोसेबा पिन्बाला छ्याम डेन सेमताम थान्बा मुबा ।

चुह्राङ्नोन लासि पोला व्हाइखाब्रिखेन ओम दोःपा चन्द्रबहादुर लामासे नेपाली अंग्रेजीरि दोमा व्हाइला सांस्कृतिक मौलिकता, भावनात्मक नुप्बा थेन ग्योइकाइ सौन्दर्यदा सोना लाबारि किन्तोबा चुनौतीफिरि ताम थान्मुबा ।

ङ्योइसाङ समुहला ह्रोम्हि व्हाइखाब्रिखेन विश्व सिग्देलसे वर्तमान कविता समुहसे व्हाइखादा ल्हेना लाबारि गोङ्मा ल्हेसिकेन खाबा थेन खाबा रेरि नोन चुदा निरन्तर पिन्सेला ताम थान्जि । छ्यामरि, चु समुहसे नेपाली व्हाइखादा अंग्रेजीरि दोःबासे नेपाली व्हाइखादा जाम्बुलिङ ङोन्छाङ दोना लासेला थेन नेपाली ग्योइकाइदा झन समृद्ध स्होसेला ताम थान्जि ।