धरान । नेपाली कांग्रेस प्रतिनिधिसभा क्षेत्रीय कार्यसमिति, क्षेत्र नं. १ सुनसरीसे धरानरि मन्जुश्री सम्वत २८६१ डुल (सापुख्रि) ल्होला सोनाम ल्होछारला दुइसाङरि सांस्कृतिकला छ्याम ज्याबाम्हान्बा किन्बापिन्बा गेताङ स्होजि ।

नेपाली कांग्रेसला ङ्हाच्छाला केन्द्रीय ह्रोम्हि ओम ङ्हाच्छाला संघीय सांसद् मीना सुब्बाला ग्रेनडोन्बोरि ताबा चु गेताङला चोहोदान नेपाली कांग्रेस प्रतिनिधिसभा क्षेत्रीय कार्यसमिति, क्षेत्र नं. १, सुनसरीला क्षेत्रीय सभापति सुजेन्द्र तामाङसे लाबा मुबा ।

गेताङरि तामाङ जातिला मौलिक सेलो स्याबाला छ्याम कलाकारजुगु राम तामाङ, मनोहर श्रेष्ठ थेन प्रेमजंग क्षेत्रीसे व्हाइ कोबा मुबा । गेताङरि तामाङ जातिसे चाबा लाबा खाप्स्यो नोन ख्वाबा मुबा ।

ग्रेनडोन्बो मिना सुब्बासे ल्होलो जातला मौलिक प्रिबाला दुइसाङरि ज्याबाम्हान्बा किन्बापिन्बा, सांस्कृतिक गेताङ थेन चियाख्वासी सुनसरी १ नं. क्षेत्रीय कार्यसमितिसे सामाजिक सद्भाव ल्हेना लाबा बिसि थुजेछे पिन्जि ।

गेताङला चोहो सुजेन्द्र तामाङसे नेपाली कांग्रेससे धरानरि मुतेबा जातला ग्योइ, धर्म, रिमठिम, धार्मिक थेन प्रिबादा तेन्बा ठिम निबा दिङहेन्से तिबा हिन्ना बिसि पाङ्जि । चु ह्युल्बाला ग्लेठिम लाबा राजनीतिक पार्टीजुगुला दायित्व हिन्ना बिसि थेसे पाङ्जि ।

गेताङरि नेपाली कांग्रेसका प्रदेश महामन्त्री उमेश थापा, महासमिति ह्रोम्हि ओसेम प्रदेश सांसद ममता तामाङ, नेपाल तामाङ घेदुङ, धरान नगर ह्रोचोहो सम्फर तामाङसे ह्राङ्ह्राङ्ला सेमताम थान्मुबा ।

चुह्राङ्नोन लासि तामाङ सेवा समाज धरानला चोहो सिताराम वल तामाङ, नेपाल तामाङ संघ सुनसरीला चाहो मनोज तामाङ, नेपाली कांग्रेस क्षेत्रीय न्होरचोहो सुवर्ण श्रेष्ठ, क्षेत्रीय ह्रोम्हिजुगु शोभा पुलामी, उमेश पौडेल, दिनेश श्रेष्ठ, शिखा चेम्जोङ, ललिता वास्तोला, मिना केसी, प्रदेशसभा १(१) ला गौराइ युवराज शंकर, प्रदेशसभा १(१) न्होरचोहो रविना सुब्बा गुरुङ डोन्बो मुबा ।

चुह्राङ्नोन लासि नगर गौराइ हिमाल श्रेष्ठ, नगर ह्रोम्हि नरेन्द्र राई, नेपाल तरुण दल धरानला चोहो राम तामाङ, गौराइ मनोहर श्रेष्ठ, वडागौराइ गजेन्द्र लिङ्थेप, ओखलढुङ्खा सेवा समाजला चोहो दिलबहादुर गोले, नेपाल तामाङ महिला घेदुङला नगर चोहो गोमा गोले, नेपाल तामाङ महिला घेदुङ धरान १५ ला चोहो माया गोलेला छ्याम ल्होलो डोन्बोजुगु मुबा ।

गेताङला संचालन क्षेत्रीय छ्यागौराइ सुमित राईसे लाबा मुबा ।