काभ्रेला बनेपारि फिल्म स्टुडियो स्होबारि चलचित्र विकास बोर्डसे ठेक्का आव्हान लाबा मुला । आइतबार ग्रा तेसि बोर्डसे ‘इन्डोर सुटिङ स्टुडियो’ स्होबारि सेम लाबा कम्पनीदा आवेदन पिन्बारि म्होइजेन लाबा मुला ।

कम्पनीजुगुसे ३० रे न्हाङरि अनलाईनग्याम आवेदन पिन्बारि खाम्सेला मुला । ह्युललान इन्डार छायांकन स्टुडियोला ला ङ्हि न्हाङरिन शिलान्यास लाबा लक्ष्य थान्बा मुला ।

चु परियोजनासे ह्युल न्हाङ्ला फिल्म उद्योगदा अत्याधुनिक प्रविधिला छ्याम सहज तोसोसे सुटिङ लाबा ग्ला पिन्बारि खाम्सेला बोर्डसे आशा किन्बा मुला ।

बनेपाला ४२ रोपनी क्षेत्रफलरि स्होसेला बिबा स्टुडियो तिलाइ दिङहेन्से योजनारि मुसाइ नोन स्होबारि खाम्बा आरेमुबा । बोर्डला चोहो दिनेश डिसीला बाङरि स्टुडियो स्होबा गे ङ्हाच्छा वाङ्बा हिन्ना ।