सिन्धुली । सिन्धुलीला मरिण गाउँपालिकारि ङ्योइसाङ लाबा गिक्छा मरिण गोल्डकप उपाधि सर्लाहीला बागमती युवा क्लबसे डाबा मुला ।

शुक्रबार मरिण गाउँपालिका–२ मुङग्रे क्लाङ्चेरि ताबा फाइनल क्लाङरि ङ्योइपा मुङग्रे युनाइटेड युवा क्लबदा ब्रेना लाबान बागमती युवा क्लबसे उपाधि डाबा हिन्ना । बागमती युवा क्लबसे मुङग्रे युनाइटेड युबा क्लाबदा पेनाल्टी सुटआउटरि ४–३ गोल फेबासे ब्रेना लाबा हिन्ना ।

निर्धारित दुइरि ङ्हि नोन टिमग्याम गोल ताबारि आखाम्मा हेन्से पेनाल्टी सुटआउट ग्याम डाबा थेन स्यानडाबाला छिनोफानो लामुबा । डाबाला छ्याम बागमती युवा क्लबसे ३ लाख न्होरतेन शिल्ड, मेडल ओम प्रमाणस्यो पुरस्कार याङ्बा मुबा ।

स्यानडाबारि सेम गोना लाबा मुङग्रे युनाइटेड युवा क्लबसे १ लाख ५० हजार न्होरतेन शिल्ड, मेडल ओम प्रमाणस्यो पुरस्कार याङ्जि । डापा थेन स्यानडापादा मरिण गाउँपालिकाला चोहो विमर्श मोक्तान थेन ह्रोचोहो विमला माझीसे पुरस्कार बोठाबा मुबा ।

सर्वोत्कृष्ट क्लाङ्म्हिसे १० हजार, उच्चगोल लाबा क्लाङम्हिसे ५ हजार ओम स्थानीय उत्कृष्ट क्लाङम्हिसे ५ हजार न्होर पुरस्कार याङ्बा मुङग्रे युनाइटेड युवा क्लबला चोहो ज्ञानबहादुर मोक्तानसे पाङ्जि ।

गिक्छा मरिण गोल्डकप क्लाङ मरिण गाउँपालिकाला मुख्य प्रायोजनरि ताबा हिन्ना ।