तामाङ समाज युएईसे सोनाम ल्होछारला दुइसाङरि स्होबा सांस्कृतिक गेताङ जिन्जि
तामाङ समाज युएईसे डुल (सापुख्रि) ल्होला सोनाम ल्होछारला दुइसाङरि युएईला ल्होलो सहररि स्हेङ्बा गेताङ जिन्बा मुला । गेताङ एसके सेभेन बरदुबाइ, अबुधाबी थेन रसअल खैमाहरि ग्रेन सांस्कृतिक गेताङला छ्याम ताबा मुबा ।
तामाङ समाज युएईला चोहो भिम दोङ तामाङसे चुपाल्छेला गेताङ एतिहासिक बिसि ताङ्बा व्यक्त लाबा मुला ।
केन्द्रीय समितिसे एसके सेभेन बरदुबइरि गेताङ लाबा मुबा बिसाम क्षेत्रीय समितिजुगुसे अबुधाबी थेन रसअल खैमाहरि लाबा मुबा ।
बरदुबइला गेताङ एनआरएनला चोहो विकास शाहीला ग्रेनडोन्बोरि ताबा मुबा बिसाम अबुधाबी थेन रसअल खैमाहला गेताङ तामाङ समाज युएईला स्हेङ्खेन÷प्रमुख संरक्षक राम मोक्तानला ग्रेनडोन्बोरि ताबा मुबा ।
समाजसे चुपाल्छेला गेताङ सेलो विशेष स्होबा मुबा । गेताङरि ल्होलो कलाकारजुगुसे तामाङला रिमठिम थोबा व्हाइ थेन स्याबा प्रस्तुत लाबा मुबा ।
गेताङदा सफल ताना लाबारि ह्रो लाबा मुख्य प्रायोजक, स्यान्दो स्पोन्सर, व्यक्तिगत ह्रो लाबा मोक्कोनदा समाजसे थुजेछे पिन्बा मुला ।
समाजला चोहो भिम दोङ तामाङसे खाबा रेला गेताङजुगु नोन चुह्राङ्लासि सफल ताना लाबारि ह्रो लासेला आशा थान्बान गेताङ सफल तानागि भुमिका क्लाङ्बा तामाङ समाज युएईला प्रमुख संरक्षक, संरक्षक ह्रोमि (सदस्य), प्रमुख ग्रोइपा, केन्द्रीय समतिला पदाधिकारी, क्षेत्रीय समितिला पदाधिकारी क्योङ्दा थुजेछे फुल्बा मुला ।
नेपाल ग्याम्से गेताङरि मनोरन्जन पिन्बारि काइमोजुगु सुमिना लो, मनमाया वाईबा थेन काइपा संजीव घिसिङ दोबा मुबा । 
तपाईको प्रतिक्रिया दिनुहोस