माछापुछ्रे गाउँपालिका वडा नं–२  भुर्जूङखोला बाजोखेत, कास्कीला बौद्ध तामाङ समाजसे स्हेङ्बा ल्होछार गेताङरि एसइइ उतिर्ण ताबा तामाङ लोप्बोनजुगुदा डेन लाजि । माछापुछ्रे गाउँपालिका वडा नं २ ला श्री माछापुच्छ्रे माध्यमिक लोप्खाङ ग्याम २०८० दिङरि एसइइ परीक्षा उतिर्ण ताबा क्योङ १९ जना तामाङ लोप्बोनजुगुदा डेन लाबा हिन्ना । गेताङ ख्रेला (माघ) १९ कुनु ताबा हिन्ना ।

माछापुच्छ्रे गाउँपालिका चोहो मिनबहादुर गुरुङला ग्रेनडोन्बोरि ताबा गेताङरि लोप्खाङग्याम प्रधानाध्यापक सन्तोष आचार्य विशेष डोन्बो मुबा बिसाम विशिष्ट डोन्बोरि वडाचोहो गणेश आचार्य मुबा ।

गेताङरि श्री कृष्णमहादेव आधारभूत लोप्खाङला प्रधानाध्यापक राजु तामाङसे डेन सेमताम थान्मुबा । थेसे खाबा रेजुगुरि तामाङ लोप्बोनजुगुला प्रगति म्राङम्याङ्गाइ बिसि ज्याबाम्हान्बा फुल्बा मुबा ।

शिक्षक अभिभाबक संघला चोहा मनप्रसाद तामाङसे खाबा रेजुगुरि १२ कक्षा उतिर्ण ताबा तामाङ समुदायला लोप्बोनजुगुसे ज्याबा बो (अंक) बासाम ह्राङ्ला व्यक्तिगत तर्फग्याम दश कजार रुपैयाँ न्होर पिन्सेला घोषणा लाजि ।

गाउँपालकिा चोहो/ग्रेनडोन्बो गुरुङसे नोन गाउँपालिका ग्याम याङ्सेला सुविधाजुगु, नेपाल सरकारग्याम याङ्सेला छात्रबृद्धिफिरि ताम थान्बान खाबा रेजुगुरि थे सुविधा किन्बारि सम्पर्क लाबाला लागि म्होइजेन लाजि ।

चुह्राङ्नोन लासि तामाङ लोप्बोनजुगुला हौसला ल्हेना लाबाला लागि बौद्ध तामाङ समाजला स्हेङ्खेन ह्रोम्हि (संस्थापक सदस्य) नामुना तामाङसे नोन एसइइ उतिर्ण ताबा मुतेबा तामाङ लोप्बोनजुगुदा थेला व्यक्तिगत तर्फग्याम चेगाइ (माया)ला ङेसेबा (चिनो) बुद्धला कु पिन्सि डेन लाबा मुबा ।

गेताङ बौद्ध तामाङ समाजला गौराइ धनहादुर तामाङसे संचालन लाबा मुबा ।