बालाजु बिले जु । याखारगि म्हेन्दोला झाङ । म्रिङकोला थेन ह्रेमकोला । ङ्यासे ।
‘एला ह्रेम्बोदा खाम्देबा ह्रो लाबा मुला, डार्लिङ !’
‘ह्राङ्से तिगाइ लासाइ नोन आलासाइ नोन, ङादाम ह्राङ्ला आउदिन चेगाइ ल्हागतिला ।’
‘हिन्ना ?’
‘देन्बान, पत्याप आतिसाम चु कु ब्लासि उनपिन्गो ?’
‘ताजि आतो, चुरि ङाह्राङ्बा स्यान्दो नोन कोर्बाकेन मुला’
‘आबुइ, कादे क्यालो खाबा !’
‘ए कादे जेबा मुला डियर !’
‘हिन्ना ले ?’
‘पत्याप आतिसाम ङाला मिरि च्यागो म !’
‘ह्राङ्ला मिला अप्रेशन लाबा रो !’
‘हिन्ना, ङाला मिरि च्यागो ले !’
‘ह्राङ्ला खुयुदा म्राङ्बा मुबा, कादे जेबा मुस्ह्युबा चिम !’
‘थेला ब्योनए जेबा मुला ।’
‘ह्राङ बिमा जेबा आरे ताला !’
‘मुला, हेड–अफ द डिपार्टमेन्ट मुला थे ।’
‘ङा न्हाङ्गारहेन्से ५ गतेदोना अफिसरि आहा ।’
‘ताहाउ, तासाइ ङातेन ह्रुप आता ?’
‘ह्राङ्दा खानाङ म्लेबारि खाम्ला ले !’
‘ङाला गिक्खे ह्रो मुला ...!’
‘हिन्ना, ह्राङ्ह्राङ्बा आरे ताला । ओम, ङाला याखारगि आले मुला, जाजा, दरखास्त पिन्बा मुला ।’
‘हिन्ना ताला, तासाइ ब्रेल्साङ ताबा आरे ताला ?’
‘ङादा... बापिन्ना बिा खाइ ?’
‘एला क्रा कादे ज्याबा मुला, रेशम ह्राङ्बा !’
‘ङाला आले... !’
‘एला सुङ्फि कादे कलात्मक मुला, गोलकाँक्री ह्राङ्बा क्लुमक्लुम्बा थेन वाला वाला ।’
‘ङाला आले... !’
‘ङाइ ढाल बाबारि म्लेजिम, एसेम गुलाफ ख्याप्बा मुसिम ?’
‘जाकि गोल्छेसे पाङ्स्ह्युगो ले, खालाइसे थेला । चुरि स्यान्दो नोन मुला ।’
‘खालाइसे थेसिमाम तिगा ताजि ले ? ह्याङ ह्राङ्ला वीरता थेन सौंदर्यप्रियताला चर्चा लाबाकेन मुला ।’
तिर्याम थे ढाल थोनाथोनान नोन रणथुमरि आज्याना लासि धराशयी ताबा मुबा । तोङ्जाछा उच्चकोटीला नामीदामी तरबार क्युइसि चिबा अप्सरा मैयाँतेन थेला आपाला नोन तिगा ल्हागाब ल्हागतिला ले ? तिनिम झान थे निशस्त्र मुला । थे आङ्हाम ओम प्रतिशोधपूर्ण क्यालोरि ङ्योइला, ‘ङाला स्यान्दो म्रिङ्कोलाम एनोन हिन्ना । ङाबिमाम एला स्यान्दो खालाइ ह्रेमकोला आरे ?’
विशुद्ध इष्र्या ?
‘.....’
स्यान्दो म्रिङ्कोलाला गोपनियताला स्त्रीत्व कुटिसि चिला ।
‘दारे खाइमा ह्रुप तासे ?’
‘ङाला आले... !’
‘गोले छेप्गो छाम आलेदा... ब्राउ निगे ।’
दारे थेरि गुलाफला म्हेन्दोला झाङ गिक्खे मुला । ङ्हिरिन गिक्खे गिक्खे मुला । ङोआसेबाला घुइचो मुला ।
(छिगला अर्थः चेगाइताम– प्रेमलाप)
दोःबा : यकिना अगाध
तपाईको प्रतिक्रिया दिनुहोस