याखारगि दुइला ताम हिन्ना । याखारगि सहररि गिक्खे ग्लेस्या चिमुबा । थेसे ह्राङ्ला जेबारि आउदिन घमन्ड लामुबा ।

थेदा चेगाइ लाबारि म्हिकादेला भीड ताबा लामुबा । तासाइ, नोन थेसे खालाइदा ध्यान आपिन्मुबा ।

थेदा खालाइ नोन सेम आनिमुबा । थेतासि ह्राङ्दा चेगाइ लाबारि ख्यारख्युर खाबाकादेदा ह्राङ्ला जुम्बिरि स्याना लाथान्मुबा । थेला गे बिबान थेला ङामरि खाबा म्हिकादेदा लाखाम्बा गेजुगु कुल्बा मुबा । थेदा थेन्से स्हु नाबा आउदिन सेम निमुबा ।

तिरेकुनु याखारगि सेनापतिसे थेदा म्राङ्जि । सेनापति थेदा म्राङ्सि म्योजि ।

थेसे ग्लेस्यादा ह्राङ्ला स्होबारि आउदिन बाङ लाजि । तासाइ ग्लेस्यासे थेला चेगाइदा आस्वीकार लाजि ।

ग्लेस्यासे थेदा ब्रेजि ओम कुल्जि, ‘एसे ङादा चेगाइ लाला बिसाम ङाला लागि एसे एला आमाला तिङ उपहार बासिमाम खाउ ।’

ग्लेस्याला ताम थेबातेन ग्लेस्याला जेबा लि म्राङ्सि म्योबा सेनापति आमाला तिङ किन्बारि तिक्खुरि नाम्सारि निजि । नाम्सारि आमा मुबा ग्लारि दोमाहेन्से थेसे आमाला तिङ ह्रिबारि आखाम्नि ।

आमाला ङोन्छाङ दोबातेन तिगा बिसे बिसे तासि थे कोल्ना कोल्लान ब्लाङ गुर्जि ।

सेनापतिला आमादा ह्राङ्ला कोलाला समस्या तिगा हिन्ना बिबा थाहा ताजि । थे कोलाला ङ्हाच्छा दाराप्चि ओम बिजि, ‘ओइ कोला रेगो ।’

कोला डोङरेसि आमाला लि च्यातेमा आमाचा स्हुसे बोल्सिकेन पाङ्जि, ‘ऐया ! ङाला कोला ! चु ङाला केवाला दारेम तिगा गे मुला ले ? चु मामखुयुला तिङ बोर्सि निउ ओम एला छार केवा तिगो ।’

आमासे ह्राङ्ला तिङ यारि तेसि कोलाला यारि युपिन्जि ।

(हातिम ताई (डोङ्बा ५७८) शासक राजकुमार ओसेम व्हाइखाब्रिखेन मुबा । थे अरबला ताई जातिला हातिम बिन अब्दुल्लाह बिन साद अल ताई मुबा । थेला ल्हानान उदारताला रापजुगु तिनि दोनान अरबीजुगुला गुङरि थेदा याखारगि प्रतीकला लिरि स्थापित लाबा मुला । ‘हातिम बिमा ल्हाना उदार’ बिबा उखान नोन प्रशिद्ध मुला । 
थेदा अरब पुरुषत्वला आदर्श तेन्मुला । हातिमला रापकादे उत्तर भारत थेन पाकिस्तानरि नोन ओतेबान लोकप्रिय मुला, चुरि थेदा हातिम ताइ बिसि ङोसेमुला ।
थेला कोला अदी बिन हातिम ताइ मुबा, थे इस्लामला पैगम्बर मोहम्मदला ह्रो मुबा ।)

दोःबा : यकिना अगाध