गिक्खे ह्युलरि आहिन, ह्याङ्लान ह्युलरि ओम याखारगि दुइरि आहिन, तिन्हाङ्गार नोन याखारगि हाकिम साहेब मुबा । 

तासाइ, थेला मातहतला कर्मचारीकादे बिसाम आउदिन दुःखी मुबा । अफिसरि ताबा कादे टुला छाबा थे गिसेन चापिन्मुबा । ठिमला मिरि भ्रष्टाचारी दोतोबा मुबा, दिला कर्मचारीकादेसे । ह्युल्बाला गुङरि नोन थेनिन बदनाम । मुतेबासे बिमुबा, फलानो अफिसला कर्मचारीकादे आउदिन घुस्याहा मुला । चुह्राङ्बा प्रचारसेम तिलाइ दाप्सेला आरेमुबा । तासाइ चु अन्याय, ह्यो अन्याय खाराङ्लासि नासे ? गि ङि चाकडीबाजसेजा तिगाइ नाम्याङ्मुबा, थेनोन छ्योना बैठके थेन हुक्के दोमाहेन्से जेक्खे ।

तिरेकुनु मुतेबा कर्मचारीला ग्रोइ ताजि ओम तावारला खारेरि घन्टी खिबारि गोरसोमला प्रतिनिधि थेत्माइ पुइबा निर्णय लाजि । गोरसोम नोन हाकिम साहेबला चेम्बर ङामरि दोममा थेन्से थाहा याङ्जि, पाल (श्रीमान्)मि ब्यस्त मुस्ह्युला ।

जाजाकि म्राप ठ्वाङ्सि च्यामा पाल देन्बान ब्यस्ता म्राङ्जि बिले टाइपिस्ट छामेदा ह्राङ्ला घरेलु चिठी डिक्टेटर लास्ह्युबाकेन चिम । चु ह्रोला विशेषता हिन्ना ।

‘... एदाम सातान नर्बस ब्रेकडाउन ताचिला, मान दुइरिन चाबा लाउ । ब्रिजि ? अँ, ङ्हाच्छा ब्रिउ, ङाला बाइस जोर सुट गुङ्ला गेवरडिनला गोर ङि सुट हरि खाबा पुइगाउ । एला डुछा हार ङाइ स्होबारि पिन्जिन्बा मुला... ज्यापला लागि ज्याबा खालला हिरा स्याप्जिन्बा आरे । दातेदा जोर ङ्हा स्ह्यामा पुइगाबा मुला । स्यान्दो मुतेबा ज्याबा मुला ।’

टाइपिस्ट मक्ख ताबा मुबा ओम ब्रिना ब्रिनान ह्राङ्न्हाङरिन म्हाबारि चुबा मुबा । तिरेकुनु याखारगि खरदारसे चुनोन टाइपिस्टतेन क्यालो लाबारि चुबा म्राङ्सि दान्नाइ हाकिम साहेबला या चाबा । चु नुररि नोन हाकिम साहेब आउदिन कठोर थेन सदाचारी मुबा । 
टाइपिस्ट माङ्ग्यार थोन्बाहेन्से थेनि न्हाङरि वाङ्जि ।

‘लास्सो ह्रेम्बोरछे !’

‘लास्सो !’

ओम दुखेसो, गुनासो ङ्हेबारि चुजि । राणादुइहेन्से दातेदोना भ्रष्टाचारला परम्परारि कादे तोर मार ताजि, कादे पेठिमजुगु स्होजि ओसेम दाते नोन ‘टुला छाबा’ला बो खाराङ्लासि ताचिबा मुला ल्होलो मुतेबा ताम यथातथ्य थेन देन्बादेन्बा हाकिम साहेबदा गोना लाजि । हाकिम साहेब गम्भीर ताजि ।

हाकिम कुटिसि चिबा म्राङ्सि टाइपिस्ट छामेला टोलरि चिबा प्रतिनिधि थेत्माइला याखारगि म्हिदा बोमो रेजि ओसेम चेतावनीला छ्याम पाङ्जि, ‘पाल, याखारगि यासे ताली आङ्ह्या । ह्राप्सिन स्हिगो ओम ।’

दारे बिसाम गम्भीर, भब्य थेन गरिमामय हाकिम साहेब डोङ रेजि । थे कर्मचारीला ङामरि खाजि ओम पादाल नाङ ग्राम्बारि छेप्सि बिजि, ‘म्राङ्जि, याखारगि यासे ताली खाराङ्लासि ङ्ह्याबा चिम !’

प्रतिनिधि थेत्माइ किंकर्तव्यविमुढ ताजि ।

दोःबा : यकिना अगाध