ङानि न्हि दोर्जे थेन च्यामे पुलिस चउकिरि दोमुबा । थेरि पोक्चि थेन साम्देनदा च्युप्सि थान्बाला मुबा । बरदोङ टाला खेप्पा गराला गुङदेरि मुबा थे ग्ला । खेप्पा दिमला कोठा न्हाङरि च्युप्सि थान्बा चिम । दिमला क्यारमार म्हेन्दोला गमला मुबा । गु गिकरि क्युइला धारा । हर्के हल्दार चुर्से ओर्से लाचिमुबा ।
‘चुरि पोक्चि मिनला म्रिङकोला चुङ्सि बाबाला मुला रो ! ङानि ह्रुप तातोजि ।’, ङाइ हल्दारदा ङ्योइजि ।
‘ए थे पोक्चि ? थे वेश्या ?’ हल्दारसे ङान्दा च्याबान पाङ्जि, ‘हिन्ना थेतेन प्रे साम्देनदा नोन चुङ्सि बाबाला मुला । तिल्मा मनकामना गेष्टहाउस ग्याम चुङ्सि बाबा हिन्ना थेनि न्हिदा ।’ हल्दार चुदे पाङ्सि चाउकि न्हाङरिक्यार वाङ्जि । थेला तामसे ङादा अचम्म छोर्जि । आहिन पोक्चि तिक्दा गेष्टहाउसरि निजि ? ङाला सेमसे आहिनह्राङ छोर्जि । पोक्चिला सोनामतेन ब्रेल्साङ लाबाला दिङ गिनोन छ्योबो आरे । थेनि न्हिसे सेम डिक्सि ब्रेल्साङ लाबा मुबा । आस्याङ आङिला जा जोम । न्हि नोन दिङ गिला । कक्षा गिरिन डोबा । सोनाम ब्रेल्साङ लाबा लिच्छा भारतीय सेनाला जागिर लाबारि दोबा हिन्ना । चु ताम थेला न्हाब्याङरि दोसाम खाराङ्बा छोर्ला ताला ? ङाला सेमरि ताम क्लाङ्बान मुबा ।
‘उ.. सम्दि पोक्चिदा फिक्र्याप बाजि ।’ दोर्जेसे पोक्चिदा हुन्बान पाङ्जि ।
ङोन्छुङ व्हा म्हाङ ङाला मिसे फेबारि आखाम्नि । तिक्दा बिसाम पोक्चि थेन पाल्देन प्रेनोन मुबा । पाल्देनसे सत्तान क्वान्बा चप्पल थेन भेष्टरि मुबा बिसाम पोक्चि गोर्कि टिसर्टरि । तापा लाला खाङ्बारि नोन ओराङ्बा क्वानरि म्राङ्मामि ङादा खाराङ खाराङ छोर्जि ।
पोक्चि ङान्दा म्राङ्सि जाक्कि पेबाह्राङ ताजि ।
‘आहिन एन्ना चु तिगा हालत ? तिगा ताजि ?’ दोर्जेसे ङ्योइजि, ‘एन्दा तिग्दा बाबाला चुरि ?’
पोक्चिसे तिगाइ पाङ्बारि म्हाइबान मुबा । हल्दारसे खाक्का सुङ ठोङ्जि, ‘तिग्दा हिन्से चु वेश्या म्रिङकोला थेन चु ह्रेम्बोकोलादा दोलो म्हुना कोटेश्वरला गेष्टहाउससे चुङ्सि बाबा । चुकादे पटके हिन्ना । चुदा ङान्से ल्हाना चेतावनी पिन्सि जिन्जि । खाइमाइ थेला धन्दा आख्लानि । थे तासि चुङ्सि बाबाला । ह्राङ्से चुला ह्रेम्बोदा बानोन तोला । आहिन्साम चुदा वेश्यावृतिला मुद्दारि जाङ्सेला मुला ।’
ओहो ! हल्दारला ताम थेसि ङाला सुङ्फि खार्जि । म्हि ट्वाँ ताजि ।
‘आहिन ए दिम ख्लासि म्हुना म्हुना स्यान्दोला ह्रेम्बोला तिसा लेप्पारि ब्राबान हिन्ना । चु पुलिसला ताम तिगा हिन्ना ?’, पोक्चिदा ङाइ पेर्बा ह्राङ्लासि ङ्योइजि ।
‘हिन्ना आस्याङ ङा ब्राबान हिन्ना । ङाला बाध्यता हिन्ना । ङा परिवन्दरि परदिजि । ङाला ताम खालाइसे आङ्यान्नि । आस्याङनिदा तिगा था ?,’ पोक्चिसे मिरि मिख्लि प्रुलप्रुल ताइना लाबान थेला दुङाल पाङ्बान निजि ।
थेला ह्रेम्बो लाहुर निबा ल्हाना ताबा आरे । लासोम ब्लि ताजि ताला । दिमरि स्ह्यो ङ्यासे चाबा थुङ्बाला तिगाइ दुङाल आरेबासे पोक्चिला ह्रेम्बोसे तिगाइ सिप लोप्पा आरेबा मुबा । ख्यात्पा डोबाएन ओदेसारो सेम आपिन्बासे तिगाइ खेप्पा डिग्रि किन्बारि आखाम्नि । आपाआमाला सेम आताङसाइ ह्राङ्सेन ताङ्सि ब्राबाला म्रिङ्दा थेसे चेगाइ बिमा स्यान्दो पिन्बारि आखाम्नि । क्याम्साङ जासामला ह्रोजुगुला ओन्छाङ प्रगति लाबारिएन आखाम्नि ।
तिगाइ लाबारि खाम्ला व्हा बिसि थे फिग्र्याप ह्युलरि निबाला मुबा । चु ताममि नाम्साबा क्योङ्दान था मुनोन मुला ।
ङाइ पोक्चिदा ङ्योइजि, तिक्दा एदा आछ्योबा तिगा मुबा ? चाबारि क्वान्बारि पिन्बालान मुला । आछ्योबा आरेबामि ङान्से आम्राङ्नि । एसे चुह्राङ्बा ह्युल्बाङरि थाङ्खाबा गे लातोबामि आरे हिम । ह्युल्बाङरि स्ह्यामा ब्लिङसि पेदे हुन्सि ब्रातोला ओम ? च्यागो खाराङ्बा बेइज्जत ? ङाला ताम थेसि पोक्चि ङेजि हा.. हा... हा... आस्याङ ह्राङ्दा ओराङ्बान छोर्ला ताला । ङादाएन चुह्राङ्लासि ब्राबा सेम आहिन । तिनि न्हाङगार तिक्दा तिक्दा सेमसे आङ्यान्साइ चुराङ नोन ताजि ।
ह्राङ्दा तिगा था ? म्रिङ ह्रेम्बोला ताम ? छ्योपछ्योप्पा चु ल्हुइरि तिगा लासे ? कान चाबा सुङसे का कान चाला । स्यान्दो चाबासेमि थेनोन म्हाइला आहिन ओम आस्याङ ? खाइ ङाइ तिगा पाङ्से पाङ्बारिएन पेबा खाबा ताम । बिसि बिबाह्राङबा लि च्याजि सिबा ह्राङ्बा । एन्नान कोन ओराङ्बा चिम खाइमाइ दिमरि आचिबा । खाइमाइ दिमरि आम्हेर्बा ? छार दिमला छार रिमठिम । छार छार ठिम । ङामि हान्दाल हुन्दुल तिगाइ था आताबा । चुदे पाङ्सि पोक्चि कुटिसि चिजि ।
ङामरिन चिबा हल्दारसे थेला तामा ङ्यान्सि चिमुबा । ङाला न्हाबेङरिन सुङ थुइसि थेसे पाङ्जि आहिन ताममि ल्होलाने मुला ह्राङ्बा छोर्जि । चु म्रिङकोला वेश्या आहिन्बा ह्राङ्बा मुला । चु ह्रेम्बोकोला चुला चेमो (प्रेमिका) ह्राङ्बा मुला । तिल्मा छापा छेक्पामि चु म्हेन्दो न्हिदान लिङ्गाडिन चुङ्बा हिन्ना । चु ह्रेम्बोकोलासे ङाला म्रिङ बिबाला मुला ।
चुरि ताम थेमा चु थेला म्रिङ आहिन्बा चिम । चु म्रिङकोलासे नोन ङाला ह्रेम्बो बिमुला । तासाइ थेला ह्रेम्बो आहिन्बा चिम । हल्दारसे माङरे स्योम्बान पाङ्जि, ‘हिन्बा ताम चा ल्होल्होन चिम । चुला ह्रेम्बोसे तिगाइ न्होर नोन स्होबारि आखाम्बा । म्रिङदा तिगाइ गे लाबारि फिग्र्याप नोन आपुइबा । रे म्हुन ग्लापसे ह्राङ गे लासाइ ह्रेम्बोला जेक्खे छाबासे आछ्योबा । दात्तेला मु थुर्बा महंगीसे थेला कमाइसे छ्योनोन आछ्योबा । चुत्थेबा सहरला महंगीसे चु थेमेदाएन प्लेक नाङ्सि खाजि । चुे जे आहिन ल्होल्हो कार चा चु छ्योपछ्योप्पा ल्हुइसे म्हाइबाला ल्हुइ सुखदा प्राङ्बोसे कासि पिन्जि । दिनला सन्तुष्टि मुसाका म्हुनाला सन्तुष्टि पिन्बारि खाम्ला ? दिक्कि ग्लाप ह्राङ मोइसि छाङ ढाकार पुइसि खाबाला ह्रेम्बोसे म्रिङला ल्हुइला डोट खाना लासि चेगाइ लाबारि आखाम्बा । थेए कारन ताबारि खाम्ला । ङ्यासे ह्रेम्बोसे ङाला ल्हुइ थेन म्हान्बाह्राङ क्लाङ्सि सन्तुष्टि पिन्गाइ बिबा सेममि खालादाम्मानला म्रिङ्दा तानोन ताला । ह्राङ्लान म्रिङ ह्रेम्बोला गुङरि जेक्खेन ताबा चु ताम स्यान्दोदा था ताबारि आतानि । म्हे मुइ ह्राङ्लासि ड्वाँ ड्वाँ क्रिङसि आतानि । ओन्छ्यान तिगा लासे ? हल्दारसे चुदे बिसि पोक्चि थेन सोनामदा गोर्कि स्युगुरि सहि लापुङ्जि । ङान्दाएन साक्षीरि थान्बाला चिम थेरि ब्रिबाला मुबा ‘आइन्द घर व्यवहार र लोग्ने स्वास्नीको यौन निजी मामलालाई घरायशी छलफलमै मिलाउने छौं’ स्युगुरि ब्रिबा ब्यहोरासे ङा थोमबोर्जि । दोर्जे नोन थोमबोर्जि । म्हेन्दो न्हिदान ङान्ना जिम्मा जमानिरि ख्लाजि । ङान्से जिम्मा किन्तोबा ताजि ।
दोर्जेसे चाउकिला म्रापग्याम थोन्बान लामा केबा ह्राङ लासि बिबान मुबा ‘थुक्का... म्रिङकोलाला क्यामाहेन्से चुह्राङ्बाइ ताबाचिम । ह्युल्बाङ चुह्राङ्बाचा सत्रुदान आतागाइ ।’
तपाईको प्रतिक्रिया दिनुहोस