ल्हेकोर लिपग्यम तितिङ नम्सरि ल्हिङ युचि । थङब्रा गङचे च्यापरि थारेङ थारेङकि गङमा मिनो सेत्पसम्म तर म्रङमु । वा प्यानासोनिक क्यामराचे क्लिक क्लिक फोटो खेत्ति म्यङसम गते ज्यन म्रङल म्हेन्चि । ज्यतङकि सिन्तुङ गङयन्सो गेलेब्रादोन ल्हिङचे गप्नेम । ल्हिङ युजिम सोमरेत तपदोन बोनडोङडोङ, मेन्चि, थङब्राक्योर चेकचेक चेत्नेम ।

दङा युपे ल्हिङचे गोरालुमात योक्को दुख पिन्नेम । खुयु थेन जिता सिप तिप्नेम । खङपचे छि चअखम्मम बस्सो सिप तिप्नेम । दिमकि खेक्पा ग्लप नो सिनेम ।

थारेङ म्यगङ म्रङचि । हुचुइ ग्यपचे स्हङगम नम्सनो मुप । ल्हिङ युप च्यामम तिङि स्हङगमकि म्हरलमो क व्हल खचि ।

ङ यम्बुइ पाटन कलेजरि खेत्प तिप्पल मुपल । खेत्पे गेत स्हेङपे ङ नाइट क्लास किन्प मुपल । ङ ह्रङल्या नो डेरि मिन ब्रिजिम नाइट खेत्पे अमकोला नो मुपल ।

तिरेत ङ ख्यत्प थुम्जिम लगनखेलकि कोठारि डोङपरि साइकल ठोङडिपलम, ‘अच्यो ङत जावलाखेलदोन सइपिनो’ ज्यर्ति ग्योतरि थेचे पङचि । ङचे ताइनो पङअखम । साइकल सेचि बग्च्या बग्च्या डोङचि । म्हुनाइ कलेज खेत्पे म्रिङकोला ङत तले सइपिनो पङचि । सेमटि म्हेन्लु स्यर्डिप तिप्चि । ‘तिङि ङइ ह्रो अरे होत्तजिम, ग्यमरि गाजा थुङपे खातेमात लोङप, अच्यो नो हुचुग्यम्चे यर्डिप म्रङप ओसेम तामाङ रङ छोर्पचे ङचे दुख पिन्चि सरि ।’ ङ कुटिल्या ब्रप म्रङजिम तल थेचे पङचि, ‘ङ  नुवाकोट जोङकि स्हङगम नम्सइ पुतलि तामाङ । नम्सरि ङत म्हरलमो पङप ।’ ङ साइकलरि फोत्चि, ग्यपरि थे फोत्चि । जावलाखेलरि ब्रेक चुङचि । थे फप्चि । बाइ पङपक्योर साइकलकि पाइडल ङ्हिखेप कोर्जिन्पल मुपल । म्हरलमो थेन ङ खल्या खल्या ज्यतङ तचि ।

थङब्रारि लाप खचि । दिङि चेकचेक म्रङल्या नो लेप्प खम्पल अरे ।  ल्हिङरि प्लाप्लाजिम मेन्चि फेत्युचि । केर्पइ दोङपो नो गुर्नेम । ल्हिङचे गप्नेम ।

न्हम्स्योदङ ङइ मिचे म्हरलमो म्हेडिचि । समाजशास्त्र तथा मानवशास्त्र लिग्यम ऐच्छिक पर्यटन खेत्परि बग्च्या तचि । होतेपे रेतरि नो बग्ज्या यर्चि । कोठारि नो सइपिनो पङचि । ङचे कुटिल्या खनखन पङचि होङक्योरहोङक्योर साइकलकि ह्यान्डिल च्यर्चि । कोठारि दोमम क्यन चइ पङचि, न्हम्स्यो चल पङचिम ङ दोखचि ।

म्हुनरि म्हरलमो थेन ङ म्रिङ रेन्बो तपे म्हङ म्रङनेम । खले तचि ? तले म्हङ म्रङचि ? न्हुर अख । स्योरिनो थे कोठारि ङिचि । म्रपरि ढकढक प्रुङङिचि । म्रप ठोङचि । तले स्ह्यो म्हुन्चे पङमम म्हङ सेत्कि बि पङचि ।

मेन्चिरि खङप तिप्मम ङ ग्युब्रङचे क्रसु युचि । चेकचेक ल्हिङ मुल्यानो थे छल तपल टिम  । रूम्चेतरि फेत्युमम नम्स म्रङचि । ङेसे ङेसे तपिनक्योर रूलुम म्हनेरि टिचि ।

होतेपे रेतरि म्हरलमोचे नो होतेपे म्हङ म्रङनेम । ङ थे ज्यतङ ङिचि थे या चुङपरि दोनेम । थे ग्लारि ङ नो सिरकन्हङ बुप्ङिचि । ङइल बु बोचि थेल नो बोनेम । ढुकढुकढुक पकरि थ्यापदोन ङ्यनेम । ‘म्रप होल्यानो थेन्स्याउ ?’ म्हरलमोचे म्रप ङोन्चि । म्रप ठोङपलनो टिम । म्रप दुङचिम दोखचि, पेत्प छोर्चि । टुलरि टिचि । सिरकन्हङ ङि अखम । ‘होल्यानो टिस्याओ ?’ म्हरलमोचे पङमे ङ रेचि । ङि ङ्हिनो गि तप ह्रङल्या बेन्जिम टिचि ।

होतेपे रेतयन्सो कोठा गिरिनो टिचि । थे होटलरि ङ ट्राभलरि गेत स्हेङप मुपल । यम्बुरि ङइ म्हेमेत अयु थेल नो अयु ।

तिरेत कोर्परि गोदावरि ङिचि । फुल्चोकिरि ल्हिङ युपल तजिम होन्तोर ङिचि । फुल्चोकिचे थम्चेन ल्हिङरि प्लोस्योस्यो ख्लङचि । म्हरलमो नो प्लाङिचि । ङ थे ब्याग थोजिम सुङडिचि अख । म्हेचि अयङ । टावर सुङपरि टिपे आर्मिचे म्हेचि । सोमरेतरि यङचि म्हरलमो । बु अरेम ।

थेत ङचे उइख्लाबल बि मुद्दा युचि पुलिसचे । अयिन पङचि । अदालतचे चिदिङकि जेल सजाय पिन्चि । ङ ङइ सेमकि म्हेन्दोकि हत्यारा तचि ।

तियुङ दोखपयन्सो ङ चोल्यानो कोर्डपल । तितिङ ल्हिङ युचि । थे व्हल योक्को खचि । रूम्पुलि म्हनेकि युङपा गि दोबित्चि । मिख्लि ल्हिङ ङ्हुप रङल्या ग्रम्पक्योर फेत्युनेम । दबम दोन ल्हिङ युपक्योर ङत थे व्हलचे तिङ क्रोप ।
(रङगे बोम्बो ग्याम)