आमा... आमा... साम्देन क्राजि । सारि ब्लाङ्गुर्सि बोल्सि बोल्सि क्राजि साम्देन । थोबोक्योङ, गोक्योङ स्राप्राला बुलबुल मख्खुन ताजि । क्राउरजा बुटुङटुङ छ्योङ्जि दिमरिक्यार । साम्देन ग्रेनग्रेन काइसे प्रेछेन्सि क्राबाला क्राबान लाजि । खाइमाइ चुह्राङ लासि आक्राबा जा क्राबा थेसि साम्देनला आमा चोनलोङ्सि छ्योङ्गाजि ।

‘अहिन तिगा ताजि ? खाल्से तिगा लाजि चुदा ? साम्देन सारि बन्डाङ बन्डाङ बोल्सि क्राबागेन मुबा । ङ्हाच्छागेन छ्याम क्लाङ्सि चिबा क्राउरजा थेलान दिमला खाला गाप्पारि निसि लाबा खाबा पट्टि दोजिबा मुबा । आमा ङामरिन दोगाबातेन साम्देनसे हिक्कु डुइबान आमादा बिजि, ‘आमा ङाला फिरवाति ।’

‘तिगा ओम फिरवाति ?’ आमासे ङ्योइजि ।

‘क्राउरसे ह्यो लाजि ङाला ।’  

डु दिङ्ला साम्देनदा फिरवाति क्लाङ्मा आउदिन सेम ताङ्बा मुबा । फिरवाति खाइमादाम्ममान आमाजासे मागाइला डोँटला बाला स्होसि पिन्मुबा । दिनि गाल्बान निबा ङ्यासे पायन, गाङरि मुबा साम्देनला दिमङाम न्हुपपट्टिला गाप्पारि राप्सि फिरवाति क्लाङ्मा साम्देनला सेम फुरफुर ताङ्मुबा । तिरेदा गोरगि फिरवाति स्होबा गे आमाजासे लासिपिन्बा मुबा । बजारला क्लाङ्बा स्हे साम्देनसे म्राङम्याङ्बान आरेबा । फिरवाति आस्यासाम साम्देनसे सेसि आसेना फ्युफ्यु ह्राप्मुबा । तिगादा बिसाम फ्युफ्यु ह्राप्साम लाबा खामुला, लाबा खामाजे फिरवाति स्याला बिबा ताम थेदा आमासे सुङ्मुुबा ।

क्राबान लाबा साम्देनदा आमासे बुलबुल ताबान ख्रेन्जि । ‘चुह्राङ लासि सारि बोल्सि क्रालोम ? ङाला कोलादा ङाइ स्यान्दोन स्होसिपिन्ना म्हाले ।’ आमाजासे पाङ्जि ।

‘आहिन ङादाम थेनोन तोला, दारे ङा क्राउरतेन खाइमाइ आक्लाङ ।’ साम्देनसे जिद्दी लाजि ।

कोलाला जिद्दी म्राङ्सि आमासे व्हाम्जि, ‘ए याक्कर गि क्लाङ्लोम ? ह्रो आतो एदा ? फिरवाति स्याबारिम लाबा खातोला । लाबा खाबादा म्हेन्दो ङि डिक्सि फ्युफ्यु ह्राप्साम खेप्पा लाबा खाला दान्देम फिरवाति ज्याना लासि स्याला । बरु निउ क्राउरदान चुरि ङ्योइसि बगाउ । ङाइ एनि ङिदान फिरवाति स्होबा लोप्सि पिन्ला ।’

फिरवाति ब्यान्सि ह्यार्बा क्राउरदा ङ्योइबारि सेम आरेना आरेना निजि साम्देन । सारि बोल्सि लिक्योङ साप्रा ताबा मिख्लि मिरि आखारजिमान साम्देन यासे लि फ्याबान कोलेसे कोलसे क्राउर मुबा ग्लारि निजि । फिरवाति फिरिरि स्याबा म्राङ्सि ताङजिबा क्राउरला क्वानरि ग्याप पट्टिसे प्लानछेङ्मा क्राउर ग्याप्से फ्लिक दोजि । साम्देन म्राङ्सि फिरवाति ब्यान्ला बिसि थे ह्यार्गे लाजि ।

साम्देनसे बिजि, ‘ब्रानोले ङान्ना आमासे ह्याङ्दा फिरवाति स्होबा लोप्ला रो खाउ ।’

‘हिन्बान ?’ क्राउरसे ङ्योइजि ।

‘हिन्बान ब्राउ, क्यो थेरि ङान्ना आमा ।’ क्राउरसे च्याचि । साम्देनला आमासे यासे खाउ खाउ बिसि ल्हादाप लाजि ।

दोल्माला फिरवाति सारि ब्याङ्सि ङिनोन बामरि हाप्ख्वाइसि आमा मुबा ग्लारि दोजि । साम्दोनला आमासे ङिदान फिरवाति स्होबा लोप्चि । ङिसेन ध्यानपिन्सि च्याजि ।

‘ल्हाउ दारेम एनि ङिसे स्होउ योम ।’ साम्देनला आमासे पाङ्जि । ङिसेन स्होबारि वाङ्जि । आमाजा च्यासि चिजि । साम्देन थेन क्राउरसे च्यानाच्याना फिरवाति स्होजि । दारेम स्याला कि आस्या परिक्षण लातोजि । स्याबा आस्यबा च्याबारि लाबा खाबा गाप्पारि निजि ङिनोन । बिबाइह्राङ नोन गाप्पारि दोबातेन ङिलान यारि मुबा फिरवाति स्याजि फिरिरि... ।  

‘आहा ! स्याचि होइ, स्याचि ह्याङ्ला फिरवाति हि हि... ।’ ङिनोन ताङजि । ह्राप्पारि चिसि फ्युफ्यु ह्राप्जि निनोन डिक्सि ।

कोन्ज्योसोम गाउँपालिका–२ बागरगाङ, ललितपुर ।