ला सोम ङ्हाच्छाहेन्से कमरेड उज्यालो थेन स्यान्दो बोगालगि लडाकुजुगु मरिन स्योङफिरि मुबा ङान्ना बेतपानि नाम्सारि सेल्टर किन्जिमुला । सत्ताधारिजुगुसे चु नाम्सादा पञ्चायतहेन्सेन ह्राङ्ला समर्थन केन्द्र बिसि च्याबा मुबा । थे ताबासे चुरि राज्यला खाजिबाइ सेनामेना खासि नाम्साबादा स्हु (दुख) पिन्बा आलामुबा । थेन्ना गोबारि मुबा– चुरि माओवादी लडाकुजुगु खाजि बिसाम अवस्यान तामसोर लाला । माङ्ग्यारग्याम च्यामा चुराङ म्राङ्साइ देन्बारिजा चुर्ला नाम्साबाजुगु माओवादी युद्धला पक्षपोसक मुबा । थेतासि माओवादी लडाकुजुगुसे चुर्ला सेल्टर स्यान्दो ग्लाला बिमा सुरक्षित म्हान्मुबा ।

तिनि ह्यालाला तागामा दोसिन ग्यार्जा गि बिमा ल्हाना माओवादी लडाकु काप्गाजि । थेन्ना ताम थेमा थाहा ताजि कि तिनि म्हुनारिक्यार भिषण युद्ध ताबागेन मुला । आठ दस जिल्लाला लडाकुकादेसे ह्राङ्ह्राङ्ला जिम्मेवार आन्सार तयारि छ्योना लाजिन्मुला । थेनि नोन योनान सम्पर्करि दोसेला मुला । नाम्सारिक्यार म्हाइसि खेप्पा दोबा म्हे सोम बासि थाजि । दाइबा मिन्बा लाजि । नाम्साबादा नोन चु भोजरि निम्ता लाबासे क्योङ नोन छोगाजि । क्योङ्दान म्रेन्ना म्रेन्ना स्या कान चापुङ्जि । योला दस बजतितेमा चाबा थुङ्बा लासि लडाकुजुगु सैनिक गोइलोरि हातहतियार छ्याम तैयारि ताजि । दारे थेनि ह्राङ्ला दोतोबा गन्तब्यला ग्लारि वाङ्जि (प्रस्तान) लाजि ।

‘आकु चु झोला ङ्हिजा ह्राङ्से सुरक्षित थानस्हिगो ल्हा ।’ कमरेड उज्यालोसे ङाला आकुदा झोला जिम्मा पिन्बान पाङ्जि, ‘युद्धरि निबा कोला । दोसि खाला कि आखा । डासाइ सिबारि खाम्ला, ब्रेसाइ सिबारि खाम्ला । स्यान्दो ह्रोजे सिला ङाजा आसि बिबा तिलाइ ग्यारेन्टि आता । ङा दोसि आखानि बिसाम चु झोला इ चु ङाला ह्रो कमरेड मिरमिरेदा दोन्स्ह्युगो ह्या... ।’ ह्राङ्ला वाक्य आजिन्चिमान कमरेड उज्यालोसे आकुदा हाप ख्वाइसि मिख्लि प्रुल पुइजि । ‘क्रा आतो लाइनु । एला ङ्हो बाङबा मुला । एन्छे युद्ध डासाइ ब्रेसाइ ए सहिद दोआतो...’ आकुसे सान्त्वना पिन्बारि म्हाइचिसाइ छ्योना सान्त्वना पिनआखाम्नि । आकुला ओलगोङरि तिलाइ ल्हिबा स्हे हाकगाबाह्राङ ताजि । ङ्हिसेन मिला मिख्लि हतार हतार फ्यासि गिसेम गिसे हापहोइ ख्वाइचिजि । स्यान्दो ह्रोजुगु मार दोजिन्मुबा । फेद छोर्माह्राङ लासि आकुदा ख्लासि कमरेड उज्यालो ङानिकादेदा बिदाइला या ह्योङ्बान थेरिमार छ्योङ्जि । युद्धला दुइरि आउदिन गोपनियता ताबासे थेनि खानाङ खाजिबा चौकि छेप्पाबारि निबा हिन्ना खालाइदा थाहा आतमुबा । तिनि म्हुन्छे पक्कान भिषण युद्ध तासेला मुला बिबा ताम जेक्खे नाम्साबासे अनुमान लाखाम्मुबा । न्हाङ्गारदाङसे रडियो ङ्यान्सि थाहा ताजि– कमरेड उज्यालोला टोलीसे भिमान चौकि छेप्जिम । युद्धरि माओवादिसे सत्ताधारिदा ब्रेना लाजिम ।

तिनि न्हाङ्गार लाना लानान दिङ ङ्हि वाइजि । आकुसे कमरेड उज्यालोला ग्याम च्याचिजि । अहँ आखानि । थेला ह्रो कमरेड मिरमिरेला ग्याम च्याजि । अहँ थेए नोन आखानि । चु लिच्छा सत्ताधारी थेन माओवादी बिद्रोहीला शान्ति सम्झौता ताजि । अहँ थे कमरेड उज्यालोला झोला म्हाइसि खालाइ आखानि । आकुसे तिरे नाम्साबादा पोप लासि झोला ओरच्याजि । झोला गिरि कम्युनिष्ट घोषणास्यो, माक्र्सवादीसम्बन्धि छ्योइ, भिमान आक्रमन लिच्छाला स्यान्दो योजनाला स्केच मुबा । स्यान्दो झोलारि पोबा क्वानजुगुतेन मानला पोरे आसेम चिठी मुबा । चिठी ओर्सि च्याजि ।

चिठीरि ब्रिबा मुबा, ‘चु युद्धरि ङा सोमु व्हा आसोमु । ङा सहिद दोजि बिसाम ङाला प्रिय कमरेडजुगु चु मान ङाला आमादा दोना लापिन्स्ह्युगो । आपा ङा जाजा मुमान डोङ्बासे आमासे ङाला पालन पोषण लासि छार्ना लाबागेन मुबा । ङा जनसेनारि वाङ्बा दिङरि दोङ्से ताइसि छिक्मा क्युइबासे आमा कुजो मुला । लासि चाआखाम्मुला । चु मान ख्वाम्याङ्साम न्हा फान्मुवा ? दाते युद्ध भयङ्कर उत्कर्सरि मुला । दुइला सेकेन्ड सेकेन्ड महत्वपुर्न मुला । लडाइला मोर्चाग्याम बिदा ह्रिसि ङा दिमरि आमादा च्याबारि निबा ताम ह्युल थेन ह्युल्बाला मुक्तिदा धोका पिन्बा च्योच्यो तासेला मुला । थेतासि तिनिदोना चु मान दोना लाआम्याङ्नि । ङाबिमा आमादा च्याबा स्यान्दो खालाइ आरे । दाते खिम्जेला जिम्मारि थेन्छेन च्याचिबा मुला । ङाला प्रिय कमरेडजुगु ङा चु युद्धरि सिजि बिसाम आमाला जिम्मा पार्टीदा ताजि ।’ ह्राङ्निला सहयोद्धा कमरेड उज्यालो ।

चिठीरि स्यान्दो नोइ तिलाइ ब्रिबा मुबा । सायद ठेगाना व्हा मुसिम कि ? थेदा तिला म्हान्ग्याम आगोना लासि केरतिजिम । थे छिक डोबारि आखाम्नि ।

‘ओहो ले चु लाइनु खानाङला चिम ?’ चिठीला छिग थेसि आकुदा नाम्साबासे ङ्योइजि । आकुदा नोइ तिलाइ थाहा आतानि । आकु थेन नाम्साबासे खाम्दे दोना कमरेड उज्यालोला दिम, ठेगाना म्हाइजि । तासाइ खाइमाइ आस्याप्नि । माओवादी युद्धरि ब्राबा स्थानीय नेता, कार्यकर्ताजुगुदा ङ्योइजि, थेनिसे कमरेड उज्यालो सहिद दोबा बिमा ल्हाना थेला ङोसेबा पिनआखाम्नि । लिच्छा माओवादी सरकाररि दोजि । थेन्छे कमरेड उज्यालोला ङोसेबा गेदा महत्व आपिन्नि ।

थे मान, थे चिठ्ठि, थेला म्हाङ...तिनि नोन चु झोला न्हाङरि च्युपचिमुला ।