‘ल्हाउ होइ साम्पाङ कान्छा नरुइकिन बसो है पिछे त भेट्छुङ भेट्दुङन आसेबारो’ नरेसे साम्पाङ च्याङ्बादा फ्यालाबान पाङ्जि । 

‘लु बस्नेलाई माटो हिड्नेलाई बाटो लेखन्तै यस्तो पो ।’ च्याङ्बासे नोन सेमस्हु लासि पाङ्जि ।

स्यान्दो रे बिमा जाकि मुएन दोपदोप तामुला । बेलडाँगी शिबिर नं. ४ । नाख्ले तेबा दो । गोरसोमते मोजे दोङ । ताङ स्याल्बा जाजुबा खाट । दिमसोमला साझे कल । नरिवल दोङ टाला क्युइ डुइबा कल । खेबा (पुरानो) ताजि । छेसे चासि आम्सि जिन्बाला । थेन्ला दिम शिबिररि चिबाकादे मोक्कोनला चुराङ्बान । खालाइदा फेबा आरे । छाङ्मानला दिमएन च्योच्यो, स्हु (दुःख) नोन च्योच्यो । म्हि फेबा दु च्योच्यो । छाङ्मानला ओराङ्बान ।

नरेला म्रिङ्पाराङला मिन सोममाया तामाङ । क्यार फुन्चोकरिक्यार ह्रुपतासि ब्रेल्साङ लाबा रो । जामे गिकला आमा । मेबामेबा कदला हट्टाकट्टा म्रिङ्कोला । सुनकेस्राला आमा । थेन नरे भुटानरिन ह्रुप तामुबा रो । ग्लागिरिन गेलाबा ताङरिन ह्रुपताबा । सेम डिक्चि । सेम छुजि । जोडि खिजि । सेम छुबाला ग्लाला चेगाइ । भुटानि साप्रा नेपाली चेगाइ । चेगाइला ब्लु सुनकेस्रा याङ्जि । भुटानी आन्दोलनला लाबालुङ्सुरसे मुदेबान नेपालीकादे फ्याङ्ते छ्योङ्जि । सरकारसे ताप्सि क्योङ्सेन भुटान ख्लाजि । मेची पुल वाइसि नेपाल वाङ्जि । नेपालरि शिविररि थान्जि । थेनिला शिविर नं. ४ । तिनिन्हाङ्गार लानालानान दिङसोम वाङ्जि । तिलाइ दुइलिच्छा थेन्दा आइओएमसे च्याजि । शरणार्थीजुगुदा संयुक्त राष्ट्रसंघसे डिछ्या डिक्ना लाजि । नेपाल सरकारसे ह्रोजेक्खेन लाजि । 
फुन्छोलिङ गाङरि साताह्राङ्बान दिनि फेबा मुला । योला चियानास्ता ताबान मुबा । च्याङ्बा लामा, रिट्ठे दमाइ, जोगे धिमाल, लुते सापकोटा थेन मरिचे राई ख्राङ्गारि पोपसि चिया थुङ्बान मुबा । तिनिन्हाङगार चु नाम्सारि हालचाल आज्याना न्होङ्जि । क्यारमार ब्रामा सुताइ नेपालीदा स्हु नोन स्हु मुला । तिला लासे आखेम्हेमेला ग्ला ख्लासि चुरि खाजि । तोर नोन निआखाम्बा मार नोन निआखाम्बा ताना लाजि । तोरछ्योङ मारछ्योङ लानालानान सरकारसे स्युर्गे लाबान मुला । सिबा बिमामि ह्यार्सिन डाला ताला । दारेम ख्लाबारिन ज्याबा ताला । क्योङ्सेन फुन्छोलिङ ख्लाबा ग्रोइ लाजि । चुदेला कमाइ, नाता, गोता, जातुकुला डोबा, जागिर, छोङ छाङ्मान ख्लातोजि । चुदेन ग्रोइ लासि न्हाङ्गार दाङ्से गोकागार पोरे नासि दिम ख्लाजि । मरिचेसे डान्बान पाङ्जि । 

ङान्नाम थेरि बु ह्वारि मुबा । जाजामे डोबा मुबा । जागिर, छोङ थेन स्यान्दोगादे मुबा । छाङ्मान ख्लासि ह्यार्तोजि । आहिन्साम सितोबा का । ल्हुइ बिमा सम्पति ग्रेन आहिन्बा टिम । ङानि ह्यार्सि खातोजि । रिट्ठे दमाइलान दिम ह्वारि थेन मुइमामा ओस्सोन ख्लासि खाबा डान्जि । तिलाइ किनआम्याङ्नि ।

नेपालरि खाबा लिच्छा शिविरला चोकचोकरि डान्सि डान्सि क्राबाजे ताजि । ओत्थेबा फ्युक्पो बुदुने माझीसे शिविरला गोरगिक ब्राङ याङ्जि । चाबाएन आरे । थुङ्बाएन आरे । चासाइ आचासाइ साता सातारि युएनसे जुबा उसिना म्ल्हा, पाकेट नाङ चाजा, लिटरसोम केरोसिन थेन खद्रला क्वान । ओदेजेन हिन्ना ङान्ना रेगे (दैनिकि) । लाइन चिबा, ताबा चाबा चिबा । चोकरि थोन्साइ शरणार्थी खाजि बिसि ङोबा लाजि । भुटानसे खाराङ लासि ताप्पा बिबा ङ्योइबा जेक्खेन । ङान्लाम मिन नोन म्हाजि । भुटानरि नेपाली बिमुबा । नेपालरि भुटानी शरणार्थी बिमुला । नेपालरिन शरणार्थी दोतोजि । आले च्याङ्बासे स्हु म्हान्बान पाङ्जि । छुकछुक लाजि । खानाङ्ला म्हि खानाङ दोजि । 

ङान्दामि दारेम चु बेलडाँगीला शिबिरग्याम्से नोन ताप्बान मुला रो । सोमछा ह्युल ताप्पा रो । ङ्होरि मुसागा बोरि थोप्से । ‘बर्मा गयो कर्मसंगै नेपाल आयो कपालसंगै’ बिबा ह्राङ ताजि । का टाङ्बा चाङ्गाह्राङ ताजि । चिबा ग्लाएन आरे निबा ग्लाएन आतानि । भुटानला केबा अमेरिकारि दुर्सा तासेला ताजि । म्हिम्हि आतानि । प्योक्सि ब्याङ्बा लाबुह्राङ ताजि । बा ताइबाला चु ल्हुइसे दारेम खाइमाइ पिङछ्युप ताबारि आखाम । ङान्ना सा थेन ङान्ना थोपथाङ दारेम मिसारि जेक्खेन पोसेला म्राङ्जि । आन्दोलनसे वारपार ताबारि आखाम्नि । टेकनाथ रिजाल सरदाएन ह्रोलाबारि आखाम्नि । आमा फुन्छोलिङरि, आपा बेलडाँगीरि जाजामे मेरिल्यान्डरि तासेला ताजि । तिरेला चु ल्हुइ । आसिना सिबाह्राङ ताना लाजि । तिल्मा दोना ङानि म्हि मुबा । दिम मुबा । मिन मुबा । स्वाभिमान मुबा । साप्रा मुबा । मुतेबान छाङ्मान भुटानरि ख्लातोजि । आखे म्हेमेला सा नेपालएन खाइमादोनादा थाहा आरे । शिविर रुङ्बा चिबा । चुतेन ताजि ङान्ना ङोसेबा । साइला कामिसे डान्जि । ओन्छाङरि तिगाइ आरे । छाङ्मान ख्लाजि । दारेम छाङ्मान म्हाङह्राङ्बागा दोजि ।

तिल्मा ङ्यासेला ताम हिन्ना होइ साजि १५५ नम्बर शिविररि युएनला गाडि खामुबा । कुइरेजुगुसे गोकागार फाराम ख्लासि निमुला । नरेला पिलेन टिकटएन बासि खाबाला चिम । अमेरिका बोर्ला रो । २५ तारेखला फ्लाइट रो । सिता मगर थेन निता छेत्री नोन छ्यामनोन बोर्ला रो । दारेम थेन्सेएन ह्याङ्दा ख्लासेला ताजि । ह्याङ्लाम कर्मन खोटि चिम । दारेम खाइमादोना चुरि थान्बा तिगाइ थाहा आरे । सार्कि च्याङबासे पाङ्जि ।

न्हाङगारदाङ्से युएनला गाडि खाजि । खाइ नरेदा किन्खाबा चिम । शिविररि आपा, आमा तिङ्माइ मनमाया थेन जामे थेन नरे फेसि निलाबा हिन्ना । युएनसे फेना लाबा । भुटान दोसि निबा वातावरण आडिक्नि । नेपालरि थान्सि जेक्खेनएन आतानि । युएन एच आरसिसे अमेरिका बोर्बा प्लान स्हेङ्जि । नरेलाएन नम्बर खाजि । अमेरिका बोर्सेला ताजि । शिविरला छाङ्मान ह्रुप तासि बिदाइ लाबा तयारि लाजि । मन्डले तामाङसे कोम्हेन्दो ख्यापपिन्जि । बिदाइरि छाङ्मान ह्रुप ताजि । रुन्चे चोकरि लादाङ्सेन चुह्राङ्बा बिदाइ ताबान खामुला । नियमित रुटिङ ह्राङ्बान बिदाइ ताबान खामुला । नियमित रुटिङ ह्राङ्बान ताबा मुला । रुन्चे चोकसे नरेदा नोन बिदाइ लाजि ।