लोकतन्त्र ङ्यासेला चाबा चासि आराम लाजिमुबा । माङ्ग्यार म्राप ढकढक लाबातेन डोङरेजि ।

‘माङग्यार खाला होइ ?’ झ्यालग्याम थोबो तेसि लोकतन्त्र क्रिङ्जि ।

‘ङा एला आमा क्रान्ति ! म्राप ठ्वाङ्गो ह्या ।’ माङग्यारग्याम म्रिङ्कोलाला चाङ्बा काइ खाजि ।

लोकतन्त्र योनायोना लासि म्राप ठ्वाङ्बारि दिरि फाप्जि । ल्हानान रे लिच्छा आमा खाबा म्राङ्सि लोकतन्त्र ल्हानान ताङ्जि । थेसे आमादा डेन्सि फिरि बोर्जि । ल्हाना तोसोला ज्याबारोङ्बाकादे ह्रुप्सि आमादा ख्वाबारि कुदापरि दाइबारि तयार लाजि । ल्हानान दिङ लिच्छा ह्रुप ताबासे आमाकोलासे ह्रेङ्बा ह्रेङ्बा छ्यार्बा तरबार, गोजा, टुबाक, बारुद, काडिकादे क्लाङ्जि । लोकतन्त्रला क्रा साम्सि क्रान्ति आमासे पाङ्जि, ‘कोला तिन्हाङ्गार ए तिगा लाबाकेन मुलोम ? ङाम बेनान याङ्ताम एदा पिन्सि कोरबारि थारेङ निबा मुबा ।’

लोकतन्त्रसे कासाल पिन्जि, ‘ङा थेनोन हिन्ना आमा, खाइमाम बालुवाटार, खाइमाम सिंहदरबार, खाइमाम बानेश्वररि निमुला । ङादा रेच्छागि फुर्सद आरे आमा ।’

थेसे बेनान ताम पाङ्सि आजिन्जिमान क्रान्तिसे खेप्पाखेप्पा काइरि बाङ्जि कोलादा, ‘ङाइ एदा बानेश्वर, सिंहदरबार, बालुवाटार, कोर्बादा गे जिम्मा पिन्बा आहिन । ह्राङ्ला स्वार्थ थुम्ना लाबारि केवा पिन्बा आहिन । एमि तिनिदोना ग्लिङगाङ, ह्रि, मधेसला गुगुरि दोजिन्तोबा मुबा । ग्लेला ह्राङ्बा महलरि आहिन, प्राङ्बोला ब्राङ–ब्राङरि निसि ताङ्बाला ब्लु ड्वातोबा मुबा । भ्रष्ट, लुच्चा, ह्यो, डाँकाला संरक्षक अहिन, इमानजमानला पक्षरि गे लातोबा मुबा । फ्युक्पोला सुखसयलरि आहिन प्राङ्बो, लिच्छा ताबादा ह्रो लातोबा मुबा । खाइ एसे जिम्मेवारि थुम्ना लाजि ? ङा दारेम एदा ङाला गो थासि, ब्लोसि, काला होनसे एदा ब्योङ्ना लाला । ङाला ज्योज्योआले, नानाआङाला कारि क्लाङ्सि छार्बा चोराङ्बा कोला ङादा दारेम आतो । एदा केला ! बेइमानी, धोकापिन्बा, चोराङ्बा कोला केबा ङ्हाच्छा ङाला गर्भ तिगदा खेरो आनिनि ।’

क्रान्तिला लि ल्हानान वाला ताबा म्राङ्सि लोकतन्त्रला ब्ला म्हाजि ।

आमाला स्ह्याप चुङ्सि क्रासिमाम पाङ्जि, ‘आमा ! आमा !  थेराङ थासुङ्गो ङादा दातेइ ल्हानानसे भरोसा थान्बा मुला, ह्या आमा ! ङाइ दारेम ह्राङ्से सुङ्स्युबाह्राङ लाला । ङा दारेम ग्लिङगाङ, गाङ्स्योङ, पहाराला गुगुला ग्यालामरि दोला । प्राङ्बोला ब्राङ्कादेरि ताङ्बा ठाम्ला, खाइमान आफान्बा पोरकादेरि ङाइ मान लाला । थे प्राङ्बोला सिम्बासिम्बा कुदाप लेप्ना लाला । ङादा तिगाइ दुइ दोन्स्ह्युगो आमा । ङा दात्तेन ब्राइलाबा ।’

चोदे बिसि लोकतन्त्रसे ब्राबाला तयारि लाजि । आमाला सेम ल्हानान ताङ्जि । हौसाला ल्हानान पिन्सि पाङ्जि, ‘दारेम ङाइ एदा तिर्याम गे लाबारि दुइ पिन्ना । एसे एला गे जिन्सि दिमरि दोबा दुइरि एला नाना, आमा, आङाकादेदा शान्ति थेन ह्युलठिम बासि दोगाउ । चु पाल्सेला ल्होछाररि छ्याम चिसि ताङ्सि दाङ्तोला । ए आखादेदोना ङा चु दिम ख्रुङ्सि चिजिला ।’

लोकतन्त्र म्राप ठोङ्सि माङग्यार थोन्सि आमाला का (बचन) छ्योना लाबारि ब्राजि । आमा क्रान्तिचा कोला लोकतन्त्रसे ह्राङ्लान जामेकादे शान्ति थेन ह्युलठिम बासि खाबा ग्यामरि मि तिसि ब्रान्सिन चिजि ।