तियुङग तागङ थानल्या स्युर्बित्पे चेरोङ तितिङनो दोजिम खनेम बि नम्सारि थ्यामु । चेरोङ ताले लप्जि ताले खजि ताइ लेलुम नो आयङ । ताले यर्जि ताले खजि ताइ था अरे ।

ताबिसम चेरोङकि आप स्हुल्र्हुचे पङ्प थ्यापल, ‘ङइ कोलाचे लोप्खाङरि ज्यप सेङजिरो, होत्तजिम पित्ख्लाजि थारेङ ।’ यिन्जि वा अयिन बात होलेनो थ्याजि । ‘अजम्पे ङइ जत स्युर्पे दिक्पामा तिङिक्योर थङ अखसम ख्लि चमुवा ।’ ङोन्नमकि बात तिङ लिग्यमकि बातरि डिप अम्रङ । स्युर्बित्पे म्हित ताले होल्या पङजि ङ च्यर्थोम्जि ।

चेरोङकि आप असेम नम्सापइ तम थ्यामम ङ दरेक दुवइचे खपे म्हित ताइ था । ताले यिन्जि नम्सारि ता ताइडिप । दङपो रङप अयिन । ब्लितिङ पकरि टिम नो ता लेम्परङ तजि बि म्हेन्लु स्यर्जि । ङ्योत्मम लेलुम यङबोर्चि ।

चेरोङ ङइल नो कोलायन्सो कि ह्रो । म्हेचेन ख्लङबरि ख्यामबिन्नो डाबल । तिरेत मोङपे नम्साइ गेसारेतिङ नो डानेम । तोर्पो डाजि बि मोङपे नम्साइ ठिटामाचे चेरोङ तोजि । हुचु यन्सो लोप्खाङ ङिप पित्जि । नम्सारि लक स्यङजि । कतारकि भिसा खजि । ज्यपे कम्पनिरि पर्तिजि ज्यपे कमाइ तजि ।

नम्सारि नो फ्युक्पे म्हि तजि । ङोन्नम पलो दोपरि गते विदेशरि टिस्या । चपटिप बन्दोबस्त तजि दरे ङम फिनिसटि टिप, नम्सा योक्कोनो लिग्यम तजि ङोन बोर्तोजि बि लेङमो तपला । ङम भिसा खजिम यर्जि थे देन्मेननो नम्सारि टिनेम । होतेपे कुना नो थेचे मर्पोचे तोपे राप ह्वल लजि । ङत हुचुरि अतोपला यिन्सम ङय खेत्पे म्हि तफस्या, सेपे म्हि तस्या मुपल । थुक थुक बि थेचे ह्रङतनो छेमा साजि । सङगुलचे नम्साप क्राप वि ङेत्परि दोपिन्जि चेरोङ त ताए अत ।

सङगुलचे फुप्पे लोप्खाङ क्योन्परि टङ पिन्जि । थे लोप्खाङकि चन्दादाता सदस्य तजि । सदस्य तपे कुना यन्सो लोप्खाङ न्हङकि अम्रङपे पुचु तेप्प तिप्जि । स्योस्यो सल्प तिप्जि । हेडमास्टरचे थुप्रो हिनामिना स्येङप म्रङजि । थेचे सरकारचे पिन्पे टङ ह्रुपल्या थेनो पङजि । हिनामिना सेङअपङ । असेम थेत थुप्रो गालना पङजिम नम्साचे तेत्बित्चि । नम्सारि ‘जसको शक्ति उसको भक्ति’ पङपरङ्ल्या तागङ थानल्या स्युर्बित्नेम । थेत क भ्रष्टाचार स्हेङप म्हेजि बि पुङलजिम तेत्बित्नेम ।

तोपा रेत चेरोङ क्राजिम टिनेम । थेत अपलेङ ग्याचचे राजनिति लोप्नेम । सेम कोङनले थेन्प लोप्नेम । सत्तारि ङिपे ग्यम ङोन्पिन्नेम ।

राजनितिरि बङ तप बि स्यतपिन्नेम । असेम ताछङमनरि डापे चेरोङ राजनितिरि वङनेम । स्थानिय तहरि वडा अध्यक्षरि टिकट यङजिम रेम्यङनेम । चुपलो चुनावरि भोट रितपरि चेरोङ नम्सारि खनेम । थे ङोन्नम लिग्यम ठिटा तोपा टिम । नम्सारि ङिजिम देन्मेन सेत्जि । नम्सापचे थे तम  गोजि । ह्रोइ लिपलिप स्युर्जिम चेरोङ ता सेङपे गल्तिरि माफि रित्जि । चेरोङ नम्साइ देन्मेन कि आप तल बि म्हेन्जिम भोट पिन्नेम । देन्मेन भोट ज्याप बुत्मम चुनावरि थे बुत्डाजि ।

चेरोङत सुङरा बि सेला मस्को पङ्डपे मास्टर परङ तिङिक्योर बेस्ल्या ह्रो तनेम । मोङपे नम्साइ छह्रोमा तिङिक्योर अध्यक्षज्यु बि चेरोङत फ्याफुल डप ह्रो । चेरोङ बिसम तिङिक्योर जातकि मिनरि, धर्म, रिमठिमकि मिन्टी मुपे सुङरा दमडप रो । नम्सात ङोनबोर्प अपङपे विकास विरोधी सुङरामा दमजिम ख्लापरि मेडप रो । तोर्पो मोर्पो क्योम्जङ जाजङकि सेम थुन अपङपे सुङरा छेडप रो । जातजाति लेपफेप अलनल्या ग्येत चलइतिपरि बङ सेङडप रो ।