म्हेनिङ जिन्दासि तिहार खादाम्बा मुबा । पन्चक सुरु ताजि । ह्युल, फिरग्याप ह्युल ग्याम म्हेनिङरि दिम खाबाजुगुए नाम्सारिन मुबा । सोमे दर्जि क्योलोलो जेक्खे कतारग्याम्से खाबाला । ओयाक जोङ्ला हम्मरजुङ्गे लिम्बु साउदिग्याम खाबाला । थेराङनोन लासि पाताली राई कोरियाग्याम । दिङ्नाङ सुनसान दोबाला फाकुम्बा नाम्सारि छारछार म्हिला चहलपहल मुबा । क्योलोलो जिन्बाला म्हेनिङला रामराउस जाजागारगि लेङ्बाला मुबा । जौबारि गाङरि जुबाला होन्दालिङ प्योकबारि बाकिन मुबा । थेराङनोन लासि खोकराङला चर्केपिङ अलैंची बगानग्याम्से हर्के भुन्डे थेन सन्तोषला ह्रोकादे क्योलोलो नाम्सारि खाबामुबा । थेनि नाङ्साल क्लबला ठिटागादे । सतान देउसी भैलो क्लाङ्सि सामाजिक गेलाबा । तियुङ सामुदायिक दिम स्होजि । चुपाल्छे गोन्बोगाङरि छ्योर्तेन स्होबा रो ! ह्युल, फिरग्याप ह्युलरि निबाकादेसे न्होर पुइगाबा रो । सिङचुवा नाम्सारि बिजुली नोन म्राबा रो । नाम्सारि चुराङ्बान चुराङ्बान माजिङ्बा (हल्लाखल्ला) तामुबा ।

पन्चक तिबा लिच्छा गन्धे मंगर, टोप्रे पिठागोठे, भोला साम्बा लिम्बु थेन रङगे दमाइला बिसाम ग्रोइ स्यान्दोन ताजि । थेनि जुवा क्लाङ्बारि धरानरि निबा ग्रोइ लाजि । धरानरि हिन्साम नाम्साला दाना (रुद्राक्ष) छोङ्लाबाकादे नोन ह्रुप ताबा । अलैंची चुङ्बाकादे नोन ह्रुप ताबासे लामा क्लाङ्बाला स्यान्दोन छेम (मज्जा) मुबा । थेन्से चुनोन ग्रोइ लासि जुवा ढाइस क्लाङ्बारि बिसि घोपाक्याम्पला भोला साबाला स्योलोनला दिमरि निजि । नाम्सारि गाइगुइ माजिङ्बा ताजि । खालाइसे लाख सोम खालाइसे लाख ब्लि पुइसि निबाला रो । डासाइ ढ्वाक्कान ब्रेसाइ प्वाक्कान बिबान सहररि जुवा क्लाङ्बारि निबाला रो । तिवाररि तामनोन तामिर भोलाला आङा सुम्निमासे पाङ्बा ।

थेनि नाम्सारि चिबा बिमामि धरानरि निबालान ज्याबा होइ । दिमरि चिसाम नाम्साबा ह्रुप्सि म्हुक्गिन क्लाङ्बा । माजिङ्बा लासि हाइरान । खाइमा बाजाङ (सुर्ति) थुङ्बा । खाइमा जि ग्वाइसि पिन्तोबा । रे म्हुन स्हु (दुःख) पिन्मुला । न्हा थेनि म्हेर्दो न्हा ङान्दा सुख ।

भाइटिका कुनुला ताम हिन्ना । पहाडग्याम निबाला ठिटाकादेला जुवा चल्तिजि । स्योलोनए दिमरिन मुबा । नेम्बाङ आकुसे चु दिमरि बिमा स्यान्दो दिमरि ज्याबा ताला बिसि स्यान्दोन दिमरि बोर्जि । तेह्राथुमला हरिप्रसादला दिमरि । भोटेपुलरि मुबा चु दिमरि । ईटहरी, बेलबारी हेन्से पाडाजुङ्गी दोनाला कुख्यात जुवाडेगादे ह्रुप तामुबा । हरिप्रसाद क्षेत्री इन्डियन रिटायर आर्र्मि । रिटायर ताबालिच्छा थेला गेदोइ (पेशा) जुवा क्लाङ्ना लाबा । तिनिए जुवा क्लाङ्बारि चुजि । योला कान चाबालिच्छा खाल पुङ्जि । क्योङ्लान लाख लाखला गड्डी थान्जि । पहाडला नाइके रङगे दमाइ । भोटेपुलला हरिप्रसाद क्षेत्री ।

रङगे दमाइसे ह्राङ्ला ङोसेबा यमलाल क्षेत्री बिसि पाङ्जि । जुवाला खाल जोडतोड लासि छ्याजि । चाबा थुङ्बाला जोहो ताजि । थेला डिछ्याजा चन्द्रकलासे लामुबा । चन्द्रकला हरिप्रसादला आङा हिन्ना । चन्द्रकलासे खाइमा जि आइरक, चुरोट बासि पिन्बा । खाइमा तिगा बाबा खाइमा तिगा बाबा लामुबा । थेला जिम्मेवारी चाबाथुङ्बा थेन खाल्छे डाजि बिबा निर्णय लाबा ताजि । डाबान लिच्छा जितौरि याङ्मुबा । थेएन फुरताङजि । चाडबाडए दाङबा ओस्सोन जितौरी नोन याङ्बा । खाइमा ग्यार्जा ङ्हा खाइमा तोङ्जा गि । चुनोन म्लिक्का (लोभ)से म्हुक्किन सेवा लाजि । मार्रा बिबातेन खुर्रा निजि । ग्यार्जा ङ्हा बाजि । डाबाजा यमलाल । थेसेन डाबाहेन्से जितौरीए थेसेन पिन्जि । चु ताङ ङ्हाच्छा निजि । यामलालसे डाबाला डाबान लाजि । न्होरए ल्हानान पिन्जि ।

चन्द्रकलाला सेमरि छोर्जि । चु म्हि ल्हानान ज्याबाटिम । पहाडग्याम खाबा म्हि । जुवा तासरि सिपालु । जुसि चाबारिएन सिपालु । हरिकलाला सेमसे यमलाल क्षेत्रीदा डान्सि चिजि ।

छ्योआछ्योला पैतीस चालिसला हरिकला दातेदोना बे्रल्बा आताबा । ह्रिबारिम ल्हानान म्हि खाजि । सेम निबा म्हि आखाबा । नाम्सारि नोन चिबारि सेम आनिबा । सहररिमि झन खालाइ ङोआसेबा । दिङसे गाङ थाल्छाइ सेमजा बिसाम छामेन मुबा । सेम निबा म्हि म्हाइबारि नोन आसेबासे नाम्सारि नोन बिमुबा तिगा लासे हरिकला ? म्हे मुइ ह्राङ्बा हिन्साम ड्वाड्वा लासि रागा म्हाइसेला म्हि ताजि । तिगाइ लाबारि आतानि । सेमसेमि म्हाइजि । आस्याप्माहेन्से ओम आतामा हेन्से पाङनोन तोजि । थिबाला कर्म चेक्पामा ङ््हो । पहाडला दिमरि जामे थेबाला जिम्मेवारीसे प्लेजि । न्हा ख्यात्पा डोबाला लाम्याङ्जि । आले आङाला चेगाइसे । आपा आमाला जिम्मेवारीसे । थेदा थारेङ थारेङ निआपुङ्नि । क्योलोलो छार्बाला छारम्याङ ह्रोकादेला दिमनाम ताजिन्जि । सुनमायादा सिङगापुरे लाहुरेसे बोर्जि । टुल्किला ह्रेम्बो मेनपावरला दोप्ता (मालिक) । सन्तोसिला ह्रेम्बो अलाइची ठेकेदार । हरिकलाजा थानथान ।

हरिकलासे तिनिजा बिसाम ह्राङ्ला ङ्हाउ डान्जि । क्यामेराला रिलह्राङ सेमरि खाजि । साङराति बजाररि कोरबाला छोङ लाबाला । धान नाच थेन डम्फु स्याबा च्यासि फुरफुर ताङबा । आहा ! कादे जेबा ब्योङ्बा जावानी । क्यार्से कोठारि क्योङ्नोन जुवा क्लाङ्बान मुबा । थेन्ना ह्राङ्लान सुर मुबा । खालाइसे डाबा । खालाइसे ब्रेबा । चुर्से कोठारि हरिकलाला सेमरिएन गिक्खेन जुवा क्लाङबारि तिजि । खाइमा मार्रा । खाइमा छक्का । क्यार्से कोठारि यामलालसे जुवाला खालरि मार्रा.....लासि क्रिङ्मा चुर्से थेला सेमला ग्योइरि नोन छक्का दोबाह्राङ तामुबा ।

हरिकलाला सेमला खालरि यमलालला मार्रा ताबान निजि । सेम दुर्बारि वाङ्जि । तिगालाउ तिगालाउ । ह्राङ्लान खाल ह्राङ्लान जिताउरिह्राङ ताजि । ज्योज्यो हरिप्रसादला श्रीसम्पति सारसोर ताबान निजि । दिमनाम ब्रेजि । आङा हरिकलाला सेमन्हाङरि बिसाम डाबान निजि । डाबाजा थेनोन ज्योज्योला श्रीसम्पति थेन आङाला सेम । डाबाजा थेनोन यामलाल । चुदे दोना आफुइबाला जावानीला फुइबा (प्यास) रि थे बोलोकबोलोक ताजि । चिप्सि खार्गे लाबा उस्युबह्राङ्बा जोबानिला रससे ब्लापब्लाप बाम्जि । क्यार्से बोल्बा ज्योज्यो । सिरिसम्पति ब्रेसिमामि । चुर्से बोल्बा आङा जुवाडेसे सेम डासिमामि । तिनिजा बिसाम हरिकलासे गोरगिक निर्णय लाजि । नाम्साबासे बिबा ओस्सोन आहिन्बा टिम । ‘तिर्खामा नपाएको मोही र बैसमा नपाएको पोइ के काम ?’ दारे ङासे ब्रेजि । यामलालसे डाजि । चुपाल्छेला तिहारमि सेमसे म्हान्बाह्राङ छ्योबारि चिम । साइत दोसि खाजिम । जुवा क्वाङ्बासे डासाइ ब्रेसाइ ङाइ डाजि ।

जुवा क्लाङ्बाला कोठाला ह्यालरि खालाइसे डाजि । खालाइसे ब्रेजि । यामलालसे डाबाला डाबान स्यान्दोसे ब्रेबाला ब्रेबान । थेसेए तिर्यामजा थुङ्गाइ बिसि तपेसनाङ जि ठासि पिन्जि । पिन्देमा म्हुनडेड ताजिन्बा मुबा । थेसे सेमसेम नोन तिङ्ला चेगाइदा हापख्वाइजि । म्हेर्गे म्हेर्गे लामा रेडियोरि ह्वाइ खाबान मुबा । ‘चिउरिको चिल्लो पात, सिरानि लाउन देउ मायाको दाहिने हात ।’ हरिकला छुप म्हेर्जिम ।

‘बजियाले गर्नुसम्म गर्यो । साले डुम्रा मु....लाई नभागेको भए....।’ बिबान ज्योज्योजा फिरफिर छ्योङबान मुबा, ‘जा...संग जुवामा त हारियो हारियो घर पनि बिटुलो पारियो ।’

हरिमायासे ताम आगोनि । दोसिन ङ्योइजि ज्योज्योसे पाङ्जि ।

‘कहाँ हुनु त्यो त क्षेत्री भनेको होइन र’छ । बजिया दमाइ पो रहेछ । यामलाल क्षेत्री होइन । रङगे दमाइ रहेछ ।’

हरिकला थोमबोर्जि । ज्योज्योसे बिबाह्राङ थेन्ना दिमला कुदाप बिटुलो ताजि रो । थेमि दमाइ टिम रो । तासाइ ङाला जवानीला रस सिप्सिजा बिटुलो ताजि वा आतानि ? डान्ना डान्ना स्ह्यो ताजि ।

ताम गोबान निमामि थाहा ताजि । थे ताममि थेसेनगा बिबा टिम । खाइमा मार्रा बिमा, ‘अब हेर रङगे दमाइको कमाल !’ बिसि छ्योङ्जिम ।

थेदा ए दमाइ हिन्ना बिसि ङ्योइमा थेसे बिजिम, ‘दमाइ नोन म्हाले ! के गर्छस गर । मैले जितें तैले हारे । हार जितमा जात पात हुदैन ।’

चोदे बिमाहेन्से रङगे प्योलथोन्सि ह्यार्जिम । आह्यार्बा हिन्साम सेसेला टिम । रङगे ह्यार्माहेन्से भोलाए ह्यार्जिम । स्यान्दोए सुइथाजिम ।