छ्युगु फोर्सि च्युलच्युल ताबा क्रा खे्रसि ब्राबा सुन्तली खाइमाइ दोसि आखानि लइ...लइ..! थुक्का म्हिला केवा ? खोन्तोरे आप्च्याङ चुदे पाङ्सि थोम बोर्माह्राङ तामुबा । ताम तियुङ्माला हिन्ला । ङाए ल्होछाररि दिमरि दोमुबा । न्हि च्युइ दिङ लिच्छा जेक्खेन ङा नाम्सारि दोसि खाबासे क्योङ्नोन स्हेजुगु छारछार ङ्हाम्मुबा । खोन्तोरे आस्याङए खेप्पा दोजिन्जिम । क्वाइ (साइनो)से खोन्तोरेदा ङान्से आस्याङ बितोबा बिसिमामि आमासे सुङ्मुबा ।

क्याम्साङ ब्लेला युङ्बा ओराङ्बान मुबा तासाइ ब्लेप्जा पोबा ह्राङ्बा छोर्जि । ब्ले गुङ्से ग्याम ख्वाबाचिम । दातेमि गाडीका ब्राबाचिम । नामनाम मिन्सि उर्लुम तातोबा ह्वारि बाँझोन ताजिम होइ ङादाम नाम्सारि ह्रेच्छागिक नोन चिआम्हान्नि सोनामसे ओस्सोन बिबाला आहिन्बा चिम ।

सोनामसे बिबा ताम डान्सि ङादाइ आज्याबाह्राङ छोर्जि । क्योङ्नोन स्हेकादे पोसाइनोन खोन्तोरे आस्याङला बानिजा आपोजिम । योनान निर्णय लाबा आस्याङ्ला बानि मुबा । दातेएन ओराङ्बान चिम ।

कादेन काम्बा क्युङ्बा ताम लासाइ थेसे क्योङ्दान ताङ्ना लामुबा । खालाइसे म्युङम्युङ्बा ताम लासि दालि छेक्साइ थेदा कान खुह्राङ्बा डान्सि ङेसिङेसि दोमुबा । थेसे खालाइदा नाङ खि फातोला बिसि थेन्देरह्राङ आक्रिङ्बा मुबा । ज्योज्योआलेला ह्रोह्राङ्बा थेन नानाआङाला मायुङ्ह्राङबा थेला भुमिका तामुबा ।

चुपाल्सेजा खोन्तोरे आस्याङ जाक्कि पोजिन्जिम । ‘याङ्साम बुर्गान आयाङ्साम च्युर्गान’ बिबाह्राङबा ताजि । गाङ्साल नोन गाल्दिसि जिन्बा चिम । तिल्माला कागा दोङ ह्राङ्बा व्यक्तित्वला आस्याङ । तिनि न्याम्सोमि छाङ नासि ब्याङ्बा छाइक्लि ह्राङ्बाका दोजिम । तिला मुला आस्याङ साङ्ग्युर बिसि ङाइ ङ्योइजि । खाइ तिला बिसाइ कोन । आज्याबा मुला । सोबान मुला बिगेले होइ आस्याङसे जाक्कि ल्हेङ्मो लाबारि म्हाइजि ।

तिगा लासे कोन ङान्ना चु ल्हुइमि फ्याङ्सि निलाजि । खान्दामान कोर्साइ ग्लागिकरिन छ्यासि चिबारि आखाम्निका कोन । इ... च्यागोले ओन्माला ह्राङ्बा दुइ आरेका कोन । क्योङ्नोन पोजि । पुख्रिसे स्योप पोबाह्राङ पोजि । चु ल्हुइनोन ओराङ्बान पोबाचिम । ह्याङसे सेमसे म्हान्बा थेन डान्बाह्राङ सातान आताबा चिम । केबा, नाबा थेन याङ्बा बिबा गिक्खेन आताबा चिम । चुदे बिनाबिना खोन्तोरे आस्याङ कुटिसि चिजि । छारिब्योन दुइला डान्बा खाजि न्हाम । आहिन आस्याङ्ला ल्हुइ जाक्कि नाबा (विसन्चो) वा ? ङाइ ङ्योइजि । खाइ तिगा बिसे कोन तिग्युङ नेग्युङमा दोङ्से पाप्सिमामि छिक्मा स्हुखाबाला दाते नोन आफन्बाका । चुनोन स्हु (व्यथा)से बोर्लाह्राङ लाजि । म्राङ दिला दाना दोङसे पाप्पा । सेलयुङ्बारि टासि दान्नाइ बु आनिबा । दुङाल नासि चिबारि ब्रिबाला चिम । आसिनि । दातेदोना सोबारि खाम्जि । गाङ्जोला लानि दिनिह्राङ दोजिन्जि । खाइमाकुनु फ्युस्सा बु निसि मानेपेमे दोला । चुदे पाङ्सि आस्याङ ल्हाप्तेनाङ सुर्ति जोर्बारि चुजि । वाप वाप्पा मि ताना सुर्ति डुइजि । दोकुनिला आस्याङसे ग्ला पोबान लाबा म्राङ्सि ङाइ ङ्योइमुबा, ‘आस्याङजा तिक्दा गिक्खेन ह्रोङ्ह्रोङ स्ह्युबा ओम ? दोसिन दिमनामए आलास्ह्युबा ? दातेजा बिसाम आस्याङ जाक्कि बोमो खाबा ह्राङ्बा म्राङसि ङाइए चोन निजि । खेप्पासे तिगा बिला वा ह्राङ छोर्जि । आस्याङ्दा खेबाः (पुरान) तामला डान्बासे डुइबा ह्राङ्बाए छोर्जि । रेच्छागिक लिच्छा आस्याङ्से पोरे ब्लाबारि वाङ्जि ।

च्यागो कोन क्याम्साङ नाम्साला जन्तरेला जामे च्याङ्बा थेन ङा ह्रोह्रो तामुबा । सेर्खारि बर्खारि ङान्ना रा म्हे गोठालो ग्लाकगिरिन तामुबा । ङान्ना ह्वारि बु थेन गोठेनएन जोजोरिन तामुबा । ङानि जातुकु हेन्सेला ह्रो मुबा । आपा आमाला तिङग्याम जामेकोला मुबा थे । आपा आमाला भुक्कुले जा मुबा ङा नागाकोला ह्राङ कुलुङकुलुङ छार्बामुबा ङानि । खालाइसे बिबाला आङ्यान्बा ङान्से बिबा ताम नाम्साबासे थाबारि आखाम्बा गा । थेला मिन माइच्याङ बिमुबा । ङाजा खोन्तोरे । कोला मामासे नागचा कुलुक्पा ह्राङ लासि ङानि चुनोन नाम्सा गाङ्सारि छार्जि । खान्दामान दोसाइ नाम्साबासे म्रावाइ जोडिए बिसिमामि ङोबारि तिबाचिम । ङान्दा लिच्छाका थाताजि ।

ओसेम बिमाहेन्से आस्याङला मि माइच्याङ थेन चेगाइ (प्रेम)का ताजिम आहिन ओम ? ओम तिगतिक ताजि ओम सुङ्गोले बिसि ङाइ आस्याङदा आच्छाइनोन ताम ट्वाइबाह्राङ लाजि । हिन्ना कोन मेलोरि आनिसाम ङान्दा क्योङ्सेन ङ्योइमुबा, आहिन एन्दा खालाइसे आङ्योइनि ? तिल्दा आखाबा होइ ? बिमुबा । ङान्दाएन तिरे ह्रुप आतासाम तिक्लाउ तिक्लाउ तासि सेम क्रोमुबा । क्युइ आरेबा तारङा ह्राङ तासि सेम क्रोमुबा । थेदा ह्रुप ताबारि दार्बुङ थोसि वातिरिक्यार ह्यार्गेह्यार्गे म्हान्मुबा । लिच्छाका छोर्जि थेदाका चेगाइ बिबाचिम । नाम्साबासे खानाङ्दामान ङोसिमाम हैरान होइ कोन । आस्याङला स्ह्याल पाडाम्हेन्दो सार्बाह्राङ ह्यालह्याल ताजि ङाइ ओराङ्बा ङ्हाम्जि । म्हिला केबारि ओराङ्बाइ दुइ खाबाचिम । आलासाइ आताबा ओम लासाइ नोन आताबा । आताबा चेगाइ तोनोन ताजि । आथुइबा सेम थुइनोन थुइजि । दारेम एसे बाङ लाउ झिल्के आँट लाउ बिबाह्राङ सेमरि छोर्जि । सेमसे ङ्हाम्जि । ङाइ माइच्याङला या ह्रिबारि निबासेम ताजि । आपा आमादा ङ्योइबा मि एलान ताङ्बा (खुशी) लाउ । छार्जिन्बा जा हिन्ना ए । चाङ बागाउ बिसि ङान्से बिआखाम । एदा सेम निसाम ह्रिबाला गे ङान्से लाला । आमासे सुङजि । ओसेम एसे जोक्खेन ताङ्बा व्हा एदान थेसेनोन ताङ्बा (मन परेको) मुला ? खोन्तोरे आस्याङसे सुङ्जि । आपा आमाला ओन्छाङ ङाइ प्रस्ट ताम थान्बालिच्छा काच्र्योल पोङ थान्सिन बाबा ताम डिक्जि । ओराङ लासि बाबाला मुबा होइ कोन तासाइ ताबास्हे तासिन ख्लाजि...खोन्तोरे आस्याङला न्हाङ्िरन ताम गाजि । आस्याङ ख्वाक ख्वाक ब्युङ्बारि चुजि ।

आस्याङदा खेबाः घटनासे बोल्जिन्हाम ह्राङ्बा छोर्जि । ङाइ आस्याङदा ङ्योइजि, आस्याङ ह्राङ्दा तिक ताजि ?

च्यागो कोन ङाइ थे घटनादा म्लेबारि म्हाइमुबा । डान्बारि आम्हान्साइ नोन सेमग्याम फ्याबारि आखाम्बा चिम । थे घटनासे ङाला चु ल्हुइदा खानाङ ग्याम खानाङ दोना लाबामुबा । लिच्छाला तिगाइ दुइरि कोनदा बिला ङाइ बिसि आस्याङ कुटिसि चिजि ।

सेर्खाला दुइ मुबा । पिङ्खुरि नाम्सारि ब्रेल्साङ थेन छेवार मुबा । क्योङ्लान दिमम्हे थेरिन ह्रुप ताबा मुबा । ह्राङ्लान नाम्साला गेरि ह्रो लातोबा क्योङ्लान गे हिन्ना बिसि नाम्साबाकादे ह्रापह्रुप ताजिबा मुबा । थेएन थेरिन निमुबा । सापसुप म्हाबा थे खाइमाइ ह्रुप आतानि । थेदा ङान्से ल्हानान ग्लारिक्यार म्हाइजि । क्याम्साङ जासाम म्हाइजि । खालाइसे आस्याप्नि । ताङलिङ म्हाबाह्राङ म्हाजि । म्हि ओराङ लासि आम्हासेला । दाप म्हाबाह्राङ सुप म्हाबा म्हिमि आहिन्सेला चुदे पाङ्सि आस्याङ ब्युङ्बान ख्राङ्गाग्याम ब्राजि । ङाइ डान्जि पक्कान आस्याङला म्रिङ जारसे बोर्जिताला । म्हिला म्रिङ ह्योलासि बोर्साइ खाल्से खानाङ बोर्जि ताला ? सेमरि ङ्योइना ङ्योइनान (प्रश्न) ङादा नोन क्राङक्युर्ला ह्राङ ताजि ।

म्हिला म्रिङ बोर्साइ खाल्से खालाङ बोर्जि बिबामि था ताला म्हाले । नाम्साबासे ओराङ्नोन बिमुबा । क्यारमार नाम्सारिक्यार म्हाइसाइ तिगाइ था आतानि । रा, म्हे म्हाबाह्राङ आहिन्बाका कोन । म्हिदामि खालाइसे म्राङ्तोसेला । खोन्तोरे आस्याङला शंकारि थेदा पक्कान म्हिसे फिरग्याप ह्युलरि चुङ्जि ताला । म्हिसे चुङ्साइ तिर्याम आहिन तिर्याममि ह्यार्सि खाला ताला । क्यारनोन सिुसाम सिजि सिजि । बु मुदेदोना ब्रान्ला ङाइ । तिरेमि पक्कान ह्रुप तालाम्हाले कोन आस्याङ्से जाजाकि ह्रुप ताबा आसा लाजि ।

तिग्युङ नेग्युङ क्याम्साङ ब्लेला साइलिएन बम्बइग्याम ह्यार्सि खाजि रो । थेदामि थेलान आपासे चुङ्बाला टिम । ङाला डिहिला म्हेन्दोदाएन खालाइ पापीसे चुङ्जि ताला । कोनदा था मुला ? चु नाम्सारि साङ्गुल खाबालिच्छा ल्होलो ह्युलग्याम ल्हानान छारछार म्हिकादे खाबा मुबा । ङान्दाइ नोन ल्हानान ह्रो लाजि । साङ्गुल पिडितदा ल्होलो ह्रो लाजि । लानि लिच्छा थेम्हिकादे खाबारि ख्लाजि । थेनोन खाबारि ख्लाबालिच्छा ङान्ला नाम्साबिमा थारेङ नाम्साग्याम म्हेन्दो सोम माइजुगु नोन म्हाबा रो !

आसिना सोसाम चुनोन ल्हुइरि ह्रुप ताला बिबान ङाइ चु फुप्पा दिमरि ख्रुङ्सि चिबा मुला । चुदे बिसि आस्याङसे ब्लेरिक्यार च्याबान मिला मिख्लि फ्याजि ।