थाहा आरे । सुनकोशी गान्दिला थेनआतान ब्राचिबा ल्हाम खानाङ निसि नुप्ला । थाहा याङ्मा हेन्सेन ब्योङ्चिमुला होराङ्नोन लासि । ऋतु आन्सार लि पोबा बिमा स्यान्दो तिलाइ पोबा आरे थेला । थेला तिबा तोर हिमालला टाहेन्से तामुला रो । आदोसाइ अन्दाज लासि पाङ्बा लाला खेप्पाखुयुजुगु । सिन्धु तासि काभ्रेला कु क्लेसि ब्योङ्बाकेन मुला सुनकोशी क्यार स्याररि दोसि सप्ताकोशी दोबारि हतार ताबाकेन । सुनकोशीला ग्यालामरि परतिला खहरेघाट । पचुवार घाट हेन्छे तिलाइ माइल फिरि । दोलालघाट हेन्छे तिलाइ मारदिरि परतिला खहरेघाट । जेबा मुला बस्ती । थेनोन ग्लाहेन्छे तोर लो न्हुपरि परतिबा लामा नाम्सा । मुतेबाह्राङ्बा तामाङजुगु चिबा मुला लामा नाम्सारि ।

नाम्सा आउदिन जेबा मुला । जेबा नाम्सादा झान नोन जेबा जेबो स्होसिकेन चिबा मुला इमानदार सोझा सिधा तामाङजुगु । 

थोप्साङदा पाले पिन्बान तुन्बा लाबाकेन मुला ल्हाम केवाला । सेम आरेना आहिन आम्हान्ना दोबारि खाम्बा आरे दोतोबा ग्लाजुगुरि । तिलाइ अपवाद मुला दोतोबा ग्लारि दोबा ।

थेनोन अपवाद गुङ्ला सोनाम छिरिङ लामा जाकि टाठो मुला । थेदा लामाला नाम्साला शान बिमा फेबा तासेला आरे । ल्हानाच्याङ्ना ग्युइ मुला थेतेन ह्युल दुनियाला ।

थेतासिमि थेसे दुइ दुइरि नाम्साबाजुगुदा पोप्सि गोना लाबा कोसिस लाला ह्युल, दुनियाहेन्से ह्राङ थेन ह्राङ ह्राङ्बान सीमान्तकृत समुदायला बारेरि ।

थेला ताम ङ्यान्ना ओम ङ्यान्नेइ ङ्यान्ना मोक्कोनसे । सोनामसे म्याट्रिक दोनाला शिक्षा किन्बाला मुबा । थेतासिमि थेसे ह्राङ्से सेबा गोबा तामजुगु पाङ्बा लामुबा नाम्साबा मोक्कोनदा । ल्हानाह्राङ्बा थे सदरमुकाम हेन्से राजधानी दोना खाबा निबा लाला । नाम्सा दिमला जाजा सरकारी गेजुगुरि ह्रोलाबा लामुबा क्योङ्दा थेसे ।

हाङ्बा लाला तिरे ङ्यासे सोनाम सदरमुकाहेन्से दिमरि दोसिमाम खाबाकेन मुबा । नाम्सादोना मोटर गाडी आदोबासे तिलाइ दुइ ब्रातोमुबा ।

सोनामदा लानि फेबा म्हुनला लानिला होइस्हेरसे लामा ब्राबारि गाह्रो ताबा आरेमुबा । तासाइ नोन पहाडला ग्याम खानाङजा डुइ, खानाइजा पहरा, खानाङजा दोपदोप्बा हुइ । मुतेबा अप्ठेरो नासिकेन दोजि दिमरि । थे दिमरि दोमा म्हु ल्हानान थाल्जिन्बा मुबा ।  
थे दिमरि दोगासेला मुला बिबा थाहा मुबा तासाइ खाजिबा दुइरि दोगाला बिबा थाहा आताबा कारण दिमरि मुबा मुतेबा दिमम्हे थेलान ग्याम च्यासि ब्रान्चिमुबा ।

ह्राङ्ला ल्हुइह्रो म्हेन्दो, कोला छेडुप थेन जामे पाल्मो थे खाबा ग्यालाम रेमरेम च्याचिबा तामुबा । नाम्साला मुलग्याम ख्लासि ह्राङ्ला दिमला ख्राङ्गारि गोङ्मा जुबा चाल याङ्सि दलनरि म्हेर्चिबा नाकि चुसिमाम क्योङ्ला मौनता बोपिन्जि । कोला छेडुप योना योना माङ्ग्यार थोन्जि ।

‘आपा दोगास्ह्युजि ?’

कोलाला ङ्योइबाला कासाल पिन्बान सोनामसे बिजि, ‘दोगाजि होइ ।’

‘तिल्दा गाइबा ओम ? ङान्दाम लोङ्ना छोर्जि ।’ म्हेन्दोसे बिजि, ‘दुइ ज्याबा आरे । खान्दामान मोओवादीला बिगबिगी मुला । दारे चुह्राङ्लासि दिमरि ज्योन्गामा दुइरिन दोगाबा लासि ज्योन्गाला स्हिगो ।’

म्हेन्दोला कुल्बाह्राङ्बा काइ थेसिमाम सोनामसे ताला बिसि थोबो ह्योङ्जि ।

जामे पाल्मोसे गाग्रीग्याम क्युइ तेसि आपादा पिन्जि ।

क्योङ्सेन चाबाथुङ्बा लामाहेन्से ह्राङ् ह्राङ्ला कोठारि म्हेर्बारि निजि ।

म्हुन गोल्छेसे चिप्सि निबाकेन मुबा । मुतेबा बस्ती सुनसान ताजिन्मुबा । ब्ले, गाङ, म्राङ, ह्वारि म्हितेन छ्याम म्हेर्बा अभिनय लासि मौन चिबा मुबा । सुनकोशी ब्योङ्बा ओस्बान मुबा रेला ह्राङ्बान । थेनआचिना सुसाप तासि ब्योङ्चिबा ।

म्हिसे स्होबा घडीरि थेह्राङ्बान १२ ते ङ्ह्याजिन्मुसिम । सुनसान म्हुनला मौनता बोसि तिक्खुरि लामा नाम्सा हेन्से ठ्याक्कान क्याम्साङ परतिबा कोलाती ङामला देउराली गाङ्ला ग्यार्जाछा मसला थोबा म्हिजुगुला भिडतेन होङ्बारि चुजि ।

माओवाद – जिन्दावाद !

जनतामारा शाही सरकार – मुर्दाबाद !

ताम्सालिङ – जिन्दावाद !

ल्हानान दुइ होङ्जि नारा । छ्यामरि तिलाइ थान हवाई फायर लासि जिन्ना लाजि थेन्छे बिले वाला म्हिजुगुला गेताङ ।

थे हल्लाखल्लासे बस्तीला तिलाइ म्हिजुगु छोर्जि । लाबारि खाम्बा तिलाइ आरेमुबा । कुटिसि ङ्यान्जि, गोबासे गोजि । आगोबासे गोबाजुगुतेन ङ्योइसि गोजि ।

न्हाङ्गारदाङ ताजि । जिज्ञाशालासे उकुसमुकुस ताबा सोनामला जा जामेसे ज्याना लासि ह्याल ताआम्याङ्मान ङ्योइबारि चुजि आपादा, ‘आपा तिला म्हुना खानाङ खाल्से थेह्राङ लासि नारा ल्हागाब लाबा ?’

ङ्योइबा स्वभाविक मुबा, ङ्हाच्छारि थेह्राङ्बान खाइमाइ ताबा आरेमुबा । थेह्राङ्बा खालला नारा जुलुस । थेतासि जिज्ञासु तासि ङ्योइबा ठिक्कान मुबा ।

सोनामसे योला चिया थुङ्बान लोप्खाङरि डोबाकेन लाबा कोला छेडुप थेन जामे पाल्मोदा पाङ्बारि चुजि ह्राङ्से थाहा याङ्बा तामजुगु ।

कोला छेडुपसे ङ्योइजि, ‘आपा माओवादी बिबा तिला हिन्ना ?’

आपाजासे पाङ्जि, ‘ङाताइ नोन ओदे ताम थाहा आरे । तासाइ नोन चोदेजा थेबा मुला । खिम्जे ह्युल चिनला ल्हानान ग्रेन नेताला मिनग्याम्से थान्बा पार्टी रो । थे नेतासे चेङ्काइ सेख ह्राङ्बा तानाशाहाला राज्य म्हाना लासि दातेला जनवादी राज्य स्हेङ्सि दातेला चिन दोबा रो । थेतासि ह्याङ्ला ह्युलला क्रान्तिकारी जुझारु नेताजुगुसे नोन थेह्राङ्बान पाटी स्हेङ्सि दुल्बा म्हिजुगुला केवा थिबा गे लाला रो ।’

जामे पाल्मोसे ङ्योइजि, ‘ताम्सालिङ बिबाजा तिला ओम आपा ?’

जामेला ङ्योइबासे सोनाम जाकि गम्भीर ताजि, ‘हायोम माइ तिला बिसे ले । दाते एनि जाजान मुला । न्हाङ्गार रेनिङ ग्रेन तासि ल्हानान डोमाहेन्से थाहा याङ्सेला मुला ।’

आपाला कासाल थेसि जामेसे दोसि ङ्योइजि, ‘आपा ह्राङ्दा थाहा आरे ओम ताम्सालिङला बारे ?’

आपा थेन जा जामेला गन्थन ङ्यान्चिबा मुबा, म्हेन्दो ख्राङ्गा ङामला कुदापरि माकाइ मोठे ह्रोबान । थेए जिज्ञासु तासि ङ्यान्चिबा मुबा । आपा थेन जा जामेला अनौठो प्रकारला ताम । चु कारणसे चु अनौठोला हिन्ना कि चुह्राङ्बा ताम ङ्हाच्छारिक्यार खाइमा आतामुबा ।

जामे पाल्मोला ङ्योइसाङरि गोल्छेसे कासाल पिन्बारि तिजि सोनामसे । जामे ताम्सालिङ बिबा ए थेन ङा ह्राङ्बान तामाङ जातला म्हिजुगु चिबा सा हिन्ना । खानाङ तामाङजुगु रुङ्ना मुला बिले याम्बु ख्यारख्युर पहाडी जिल्लाजुगुदा तामाङजुगु चिबा ग्ला बिसि ङोसेबा मुला । छ्योआछ्यो ग्यार्जा सोम ङ्हाच्छा ह्याङ्ला नोन ह्युल मुबा रो । बाइस चौबिस प्लेनप्लेन ह्युलदा थेदुइला शाह बंशला ग्याल्पो पृथ्वीनारायण शाहसे एकीकरण तिबा दोङराप मुला । एकीकरणला मिनरि सादा गिक्खिेखिजि । तासाइ थे थे सारि चिबा म्हिजुगुला रिम, रिमठिम ओम ह्युलग्याम याङ्बा च्योच्यो याङ्तामदा खालाइदा कुरि, खालाइदा माङ्ग्यार लाबा ताम दिनितेबान छर्लङ्ग मुला । जामे ! दोङराप डाबाजुगुला जेक्खे ब्रिबा चिम । थेतासि ह्याङ्ला तामाङ दोङराप ब्रिबा आस्याप ।’ 

आपाला ताम सेम लासिमाम ङ्यान्चिबा मुला छेडुप, पाल्मो थेन म्हेन्दो ।

ब्योङ्बा स्योङह्राङ लासि ब्योङ्बाकेन मुबा सोनाम । ह्राङ्से थेबा गोबा दोङरापरि आब्रिबा दस्तावेज ट्वाइसिकेन ।

‘आझाइ ङ्यान्ना ओम ह्याङ्बा आब्रिबा ह्युलला राप ?’

आपाला ताम थेसि काइगिरि ‘ङ्यान्गेले आपा’ बिसि ङामरि खाजि छेडुप थेन पाल्मो । ह्याङ दाते चिचिबा ग्ला नोन हिन्ना तामाङ ह्युल्साला याखारगि ग्ला । ह्याङ्ला नाम्सा बिमा तोङ्ला कोटतेमाल मुला ले थेरिन मुबा रो तामाङ ग्लेला दरबार । ह्याङ्ला नाम्सा बिमा दिरि ब्योङ्बा झिँगुस्योङ क्याम्साङला सा पलाञ्चोके ग्लेला ह्युल्सा मुबा रो । पलाञ्चोकला क्षेत्री ग्लेतेन ह्याङ्ला तामाङ ग्ले खाइमाइ आडिक्बा । खाइमादाम्मान कल लाचिबा । रेमरेमला युद्धसे ह्युल्बाला क्षति, न्होरला क्षति ताबासे लामा डिक्बा थेन डिक्बाला लागि लेङ स्होबा लुबा तामसोर पुइगाबा मुबा रो । थेनोन लुबा तामसोरदा देन्बा म्हान्सि झिँगुस्योङ दोभान सुनकोशी गुरि मुबा तेमाल बेंसिरि ह्रुप तानिबा रो ।

धोकेबाज पलाञ्चोकला क्षेत्री ग्लेसे ङ्हाच्छान कोशीला बगररि हतियार छुम्सि थान्बाला चिम । सोझो ह्याङ्ला तामाङ ग्ले रेन्जेन दोर्जे हतियार बासि खाला आदे बिबा ग्लारि दोजिम । लेङ स्होबारि बिसि । तासाइ क्षेत्री ग्लेसे हतियार आथोबा तामाङ ग्ले थेन थेतेन निबा भारदारफिरि आक्रमण लाबा रो । ह्राङ्ला भारदारजुगु सेमाहेन्से तामाङ ग्ले ता क्रेसिमाम ह्यार्सि खहरेघाट ङामला अवलटारीरि दोमा विपक्षसे तरबार छेप्सि या जुम्बि गि ताइना लाबा रो । थेग्याम्से ह्यार्सिकेन भोकटाररि दोमा ग्लेदा सेबा रो । धोका पिन्बा क्षेत्री ग्लेला सेना झान नोन ङ्हाच्छा वाङ्सि दरबाररिक्यार निबारि चुमाहेन्से ग्लेस्यासे तोङ गाङ्ला दोङला वानरिक्यार तामाङ सेनाला बर्दी फ्लाक्पा रो । थेरिक्यार कोट थेन बर्दी क्वान्बा सेना सोक्को ह्राङ म्राङ्माहेन्से पलाञ्चोके सेना फ्लिकदोसि ह्यार्बा रो । थेदुइ हेन्से चु ग्लाला मिन कोट तेमाल चिबा रो बिबा साराप ङाइ थेबा मुला । 

चुह्राङ लासि छेसि स्युर्सि स्होबा मुबा रो ह्याङ्ला दोङराप ।

स्हुला ताम डाबाजुगुसे ह्याङ्ला दोङरापदा वेवास्त लाजि । आब्रिनि बिबारि सेबाजुगुसे ।

चुलिच्छा तानाशाही राणा शासन फेमाहेन्से ह्याङ्दा मासतिबारि ताबा जातिरि थान्बा रो ।

सोनामसे ह्राङ्से थेबा साराप जा, जामे, म्रिङ्दा पाङ्बाकेन लामा गिक्खे खालला मौनता न्हान्बा मुबा ।

दोसि जामेसे ङ्योइजि, ‘आपा माओवाद जिन्दाबाद बिसि नारा ल्हागाब लाबाकेन मुबा । थे बिबाजा तिगा ओम ?’

‘माओवाद बिबाजा लिच्छाला दुइरि मुतेबा ह्युल्बा ओस्बोन हिन्ना । मुतेबाला हकहित, याङ्ताम च्योच्यो ताला बिबा नारा थोसि खाबा ग्लेठिमला पार्टी हिन्ना ।’ आपाजासे गोना लाबारि म्हाइजि ।

दोलोहेन्से कुटिसि चिबा म्हेन्दोसे ङ्योइजि सोनामदा, ‘माओवादीजुगुसे तिल्दा ताम्सालिङ जिन्दावाद बिबा ओम ? तिला माओवादीकादे मुतेबा तामाङ हिन्ना ?’

सोनामसे पाङ्जि, ‘ताम थेह्राङ्बा आहिन । चुन्छे थेदुइ हेन्से सीमानतकृत ताबा समुदायला काइ थिबा हिन्ना । थेन्छे तामाङजुगु रुङ्बा मुबा ग्लादा ताम्सालिङ बिबाह्राङ स्यान्दो जात रुङ्ना मुबा साला मिनए थे जातजुगुला मिनग्याम थान्बा मुला । तासाइ लिच्छा तिला ताला बिबारि आखाम । तिल्दाबिसाम ओन्माहेन्से गिक्खे नस्लला म्हिसे शासन लाबा ह्युल हिन्ना चु ग्ला ।’

छेडुपसे ङ्योइजि आपादा, ‘आपा शाही सरकार मुर्दाबाद बिबाजा तिला ओम ?’

सोनामसे कोलादा गोना लाबारि म्हाइजि, ‘शाहा वंशला म्हिसे ह्रेङ्बा दुइहेन्से शासन लाबा मुला नेपालरि । थेन्से ह्युल्बाला हकहित थेन याङ्तामदा ब्यान्बा मुबा । ताम ह्राङ्बाङ (वाक स्वतन्त्रता) रि लगाम ल्हागाब लाबा मुला । नेपाली ह्युल्बारि राज्यसे ज्यादति काप्बा मुबा । थेतासि लिच्छाला दुइरि ह्युलरि बहुदल खामाहेन्से गणतन्त्रला ह्रिसि ह्राङ्बाङ नेपाली ह्युल्बासे ह्राङ्ह्राङसेन ल्हागाब लाबा नारा हिन्ना चु । दातेला ग्ले ज्ञानेन्द्र शाह हिन्ना । ग्लेला शासनरि ग्लेला जागेन ग्ले दोबा ठिम मुबा । थेनि बहुदल खाबा ङ्हाच्छा कानुन बिमा फिरि मुबा । बहुदल खामाहेन्से संवैधानिक ग्ले दोबा हिन्ना । थेतासि माओवादीसे शाही सरकार मुर्दावाद बिबा हिन्ना ।’

म्हेन्दोसे सोनामला ताम आगोसाइ गोबाह्राङ लासि रेसिमाम बिबारि चुजि, ‘ल्हाउ होइ दारेम गेरिक्यार वाङ्तोला । छेडुप थेन पाल्मो नोन लोप्खाङ नितोला । ताम लाम्याङ्माहेन्से एनिकादे आपा, जा, जामेदा स्यान्दो तिलाइ आतो ।’ म्हेन्दोला कुल्बाह्राङ्बा ताम थेसि क्योङ ह्राङ्ह्राङ्ला गेरि वाङ्जि ।

दुइ थाल्बाकेन मुबा । ङामथामा ब्योङ्चिबा सुनकोशी ह्राङ्लासि । ब्योङ्बाकेन लामा दुइतेन ब्योङ्बाकेन मुला सोनामला दिमम्हे नोन ।

सोनाल गोल्छेसे खेप्पा दोसिकेन निला । ङ्हाच्छारिक्यार ह्राङ खटप तासि गे लाबारि ल्हुइसे आहाम । म्हेन्दो नोन गोल्छेसे दिङतेन छ्याम खाम्तेदोना दिमला गे लाला ।

छेडुप थेन पाल्मो लोप्खाङ्ला डोबा जिन्सि उच्च शिक्षा किन्बारि सहर वाङ्जिन्बा मुला ।

सहर मुबादा मुतेबा स्हे ! आरेबादा तिलाइ आहिन । खल्तिरि न्होर मुला । मुतेबा स्हे मुला । खल्ति थानथान मुला बिसाम डान्साइ ताला सहर तिलाइ आहिन । फेबा परिवेशतेन छ्यापडिक्सि छोन्बोन मुला केवा छेडुप थेन पाल्मोला सहररि । स्ह्यो ङ्यासे यासुङ थुइबारि ओम डेरा भाडादोना फाबारि छ्योबा गे लामुला । ज्योज्यो थेन आङा सहररि । गेला छ्याम छ्याम ह्राङ ह्राङ्ला डोबादा ध्यान पिन्सि थाबाकेन मुला रेदा ।

रेदाङसे खाबा ल्होलो परिस्थितितेन छेसि ङ्हाच्छा वाङ्बाकेन मुला ।

सहररि चिबाला छ्याम छ्याम डोचिबा क्याम्पसला शिक्षासे गोल्छेसे ज्योज्यो थेन आङारि आउदिन ग्रेन पोबा बाबा मुला केवारि । 

छेडुप क्याम्पसरि भर्ना ताबा रे हेन्सेन खाजिबाइ याखारगि क्रान्तिकारी विद्यार्थी संगठनला ह्रोम्हि दोजिन्बासे थेदा ग्लेठिमरि आउदिन सेम निबा स्पष्ट म्राङ्मुला । आङाजा ओदे सेम आपिन ग्लेठिमरि ।

याखारगि दिङ्ला शरद ऋतु जाम्बुलिङरि म्हेन्दो दोसि सार्बा मुबा । म्हेनिङ तिहार दिमङामला बगैंचारि म्हेन्दो दोसि सार्बारि आतुर ताबाकेन मुबा । प्रकार गिसे पाङ्तोमा आम्राङ्बा स्वर्गह्राङ सजाब ताबा मुबा नाम्सा ।

म्हेनिङ तिहारला छुट्टीरि छेडुप थेन पाल्मो नोन दिमरि निबा मुबा । ह्रेङ्बा दुइलिच्छा ताबा ह्रापह्रुपसे सोनामला दिमम्हेरि ताङ्बा न्हान्बा मुबा ।

म्हेनिङ तेन्जि । तिहार खाबा ङ्हाच्छा तिक्खुरि नाम्सारि माओवादीजुगु वाङ्गाजि ग्रेन संख्यारि । थे ग्रेन संख्यारि खाबा म्हिजुगु समुह समुहरि फेबा मुबा । खाजिबाइ गिक्खे समुहला कमाण्डर सोनामला दिमरि खाजि ।

‘दिमरि खाला मुस्ह्युला ?’ माङ्ग्यार ग्याम ङ्योइजि ।

सोनामसे तलाफिला झ्यालग्याम्सेन ओइ ताजि, ‘ङानि मुला । दिमला मुतेबा दिमम्हे ।’

थे कमाण्डरसे ख्राङ्गा ग्याम्सेन ङ्योइजि, ‘मार ज्योन्गाउ ।’

सोनाम थेन कोला छेडुपए खाजि माङ्ग्यार छ्याम नोन ।

माओवादी कमाण्डरसे ङ्योइजि, ‘ह्राङ्ला कोलामि सहररि डोबाकेन मुला रो लोम ?’

‘स्हिगो कमरेड ! ख्लापिन्गो थेह्राङ्बा बुर्जुवा शिक्षा । ब्रास्ह्युगो ङान्तेन । पोबारि ह्युलला लि ।’ ल्हानान दुइ ताम लासि कमाण्डरसे बिजि, ‘ङान्ना लागि तिनिला कानला डिछ्या लास्ह्युगो । ङानि १५–२० जना खाला ।’

चोदे बिसि थे कमाण्डर निजि ।

सोनामला सेम ह्योङ्बारि चुजि । तिलाइ रेक्टरला साङ्गुला नोन खाजि बिसाइ ताला । आपाला लोङ्बा लि म्राङ्सि छेडुपसे गोना लाबान आपादा पाङ्जि, ‘ज्याबान ताला आपा ! चिन्ता आकिन्गो ।’

ल्हानान विचार लाजि । विचारला भंगालो तारतिबाकेन निर्णयला स्योङ तयार लाजि छेडुपसे । डोबारि सहररि दोसि निबाला बो माओवादीसे स्होबा जनयुद्धरि वाङ्बा निर्णय लाजि । माओवादीसे लाबा सेमछुबा तामजुगुसे लेप्बा ल्हुइला सिम्बा का प्योबारि चुजि ।

आङा पाल्मो सहररि डोबारि निसेला ताजि । थे सहररिक्यार वाङ्जि ।

छेडुप आपासे लाबा ताम्सालिङला ताम थेन माओवादीजुगुसे लाबा थेह्राङ्बान तामजुगुदा सेमरि किन्सि ह्रिरि वाङ्बा निर्णय लाजि । ह्राङ भुमिगत तासि दोङरापला दुर्सारि दोबा ह्राङ्ला पुर्खाला राप स्हु ट्वाइबारि ।

कोला गोबा ताजिन्बासे आपा सोनाम थेन आमा म्हेन्दोसे तिलाइ आबिनि थेला निर्णयरि । छेडुपसे लाबा निर्णयला लिच्छाला घडीरि दोगाजि । आपा आमासे स्हु आउन्जिमान स्हुखाबा सेमला मिख्लि मिदोना दोगाना आलानान । ङेसि ङेसि विदाइ लाजि कोलादा ।

छेडुप छ्योल्जि ल्हानान माओवादीला भिडरि ओम होङ्बारि चुजि नारा.....

ताम्सालिङ – जिन्दावाद !

ताम्सालिङ – जिन्दावाद !!

पाँचखाल ११, शिखरकोट, काभ्रेपलाञ्चोक, बागमती प्रदेश ।

(छिगला अर्थः दोप्साङ– भाग्य, पाले– दोष, केवा– जीवन, ङ्यान्बा– सुनेको÷मानेको, चिप्बा– छिप्पिनु, स्हु– दुःख/व्यथा, न्हान्बा– छाएको, छ्यापडिक्बा– घुलमिल, ह्रोम्ह– सदस्य, डिछ्या– व्यवस्था ।)

(दोःबा : यकिना अगाध)