याखारगि छारिब्योन प्रहरीरि जागिर चाबाला लागि अन्तरवार्ता पिन्बारि निमुबा ।

प्रहरी अधिकारीसे ङ्योइजि, ‘स्याउला साइ किलोला १५० मुला बिसाम १०० ग्राम स्याउला साइ कादे परतिला ?’

थे छारिब्योन गणितरि कमजोर मुबा तासाइ चतुरता ल्हाना मुबा, थेसे बिजि, ‘लोस्सो…, सय ग्राम स्याउ फातोला बिसाम प्रहरी हवल्दारला जागिरला तिगा फाइदा… !’

अफिसर, ‘तेन्गे (मानौं) एला म्रिङ बजार निजि बिसाम सय ग्राम स्याउ किलोला एक सय पचासरि ग्लुमा कादे परतिला ?’

छारिब्योनसने बिजि, ‘ओहो ह्रेम्बोरछे, ह्याङ्से थेलाबारेरि तिगा ताम लासे ? ह्राङ्से बिमा ङाइ ङाला म्रिङ्दा ज्याना लासि ङोसेबा मुला । चोदे थेसे सय ग्राम स्याउ ग्लुबारि म्हाइजि बिसाम थेसे सय ग्रामला जेक्खे साइ ङ्योइसेला मुला ।’

अफिसर, ‘ठिक मुला । ङा चु तामरि सहमत मुला, तासाइ एला आले स्याउ ग्लुबारि बजार निला बिसाम ?’

छारिब्योन, ‘थेलाबारे तिलाइ ताम लाआस्ह्युगो ह्रेम्बोरछे, थे खाजिबाइ गेला आरे, थे नम्बरि ब्लेखु हिन्ना । दिक्ग चासि चिला ।’

अफिसरसे ब्रेबारि आम्हाइनि ओम ङ्योइजि, ‘एला आपा स्याउ ग्लुबारि निजि बिसाम चु साइ आन्सार सय ग्राम स्याउला साइ कादे ताला ?’

‘ओहो ! ह्रेम्बोरछे ङाला आपाला सुङरि स्वा आरे । ङाला आपा मोजे सोल्ला । थेतासि न्हा स्याउ ग्लुला न्हा साइ नोन ङ्योइला ।’
अधिकारीसे दोसि ङ्योइजि, ‘चोदे दिमरि खालाइ आरे ओम आङा स्याउ ग्लुबारि बजार निजि बिसाम…?’

छारिब्योन, ‘आङासे दिङ ङ्हा ङ्हाच्छान ब्रेल्साङ लाजिन्जि । दारेम थेसे स्याउ ग्लुकाइ कि लिची, सुन्तला, आम्बा… ङादा तिगाला सरोकार ।’

अघिकारीला धर्यताला बाँध बोके लाजिन्मुबा, अधिकारीसे बोमोसे ङ्योइजि, ‘ओइ, म्हिजुगुसे स्याउ ग्लुबारि निजि बिसाम सय ग्राम स्याउदा कादे परतिला लु पाङ्गोम ?’

छारिब्योन सतर्क तासि पाङ्जि, ‘ह्रेम्बोरछे ! सरकार थेन ह्याङ्ला प्रणालीसे ह्युल्बादा स्याउ चाबा माउका पिन्बान आरे, प्राङ्बो छारिब्योनजुगु चाचा थेन गेङला लागि बोल्चिबा मुला । साधारण म्हिसे स्याउ चुङ्बा लाला ओम फ्युक्पोजुगुसे जेक्खे ग्लुसि चाला… ।’

(चु रापला ब्रिखेनला मिन म्लेबासे चुरि थानआखाम्नि । ह्राङ्निदा थाहा तासाम थानस्ह्युबारि म्होइजेन लाला ।)