चेमो प्रेम !
ल्हानान चेगाइ मुला केवा केवा दोनाला बिसिमाम ब्रिसे कि आब्रिसे, तिनि ङानोन कोल्चिबा मुला । हिन्बाम तिनि ए थेन ङाला गुङरि ताबा चेगाइला सम्बन्धसे नोन दिङ डु छ्योजिन्जिम ।

चुनोन गुङरि ह्याङ ङिरि ल्हानान तोरमार ताजि । खाइमा झगडा ओम खाइमा चेगाइ, खाइमा ह्रुप ताबा ओम खाइमा फेबा ! चुह्राङ्बा ल्होलो तामकादे ह्याङ ङि गुङरि ताजि । तासाइ ह्याङ गुङ्ला चेगाइरि ङादा तिगाइ आछ्योबा ह्राङ्बा महसुस आतानि । खाइ ! खाल्ला मि ल्हागाब ताजि ह्याङ्ला चेगाइरि ? तिल्मादोना ह्याङ्ला चेगाइला वकालत लासि ङिसछा केवा दोना थुइम्याङ्गाइ बिबा एला ग्राण तिनि तिक्खुरि धरासायी ताबा महसुस लाबाकेन मुला । कोन्ज्योसोमला सागररि ब्लुम्साइ नोन मुला सार बापिन्बा एला तामजुगु तिनि ह्योङ्बारि चुबा मुला । छ्याम नोन सोबा, छ्याम नोन सिबा ग्रानजुगु ओस्सोन शुन्यरि म्ह्युसिकेन निबा म्राङ्बाकेन मुला ।

देन्बान ! लादा नोन थाहा आताबा लासि तिन्हाङ्गार ए पोबा म्राङ्मा ङाइ ह्राङरिन भुलजुगु साइबाकेन मुला । एकान्तरि चिसि सोचतिसि मस्तिष्कदा ङ्योइचिबा मुला, ‘लिच्छारि ! भुल खानाङ ताजि ! ख्योल्बा खानाङ ताजि ?’ तासाइ एग्याम खाजिबाइ निसाल नोन आयाङ्नि । कारण ङाग्याम चु ह्रेङ्बा प्रणयरि खाजिबाइ भुल ताबा आरे । चु ताममि एदा नोन थाहा मुला । तासाइ एदा तिगा ताजि ? तिल्दा चुह्राङ्लासि तिनि एसे ह्राङ्ला तिङग्याम गोल्छेसे ङादा स्योइसिमाम ब्याङ्बाकेन मुला ?

कादे गोना लाबारि म्हाइजि एदा । ल्हानान सोना लाबारि म्हाइजि ङाइ ह्याङ गुङला चेगाइला सम्बन्धदा । तासाइ आखाम्नि । तिनि ङा ब्रेजि । एला पोबाला ङोन्छाङ पुइमु जुजि ङाइ । सायद छार याङ्मा खेबादा सुली क्रेना लाला बिबाह्राङ थे सुलीरि क्रेबा ङा ताजि एला पोबाला ङोन्छाङ । दारेम ङाइ ङादा कुर्ना लासेला आरे । सम्बन्ध सोना लाबाला लागि ङि नोन तर्फग्याम च्योच्यो कोशिस तातोला बिले रथला पाङ्ग्रा ङि ह्राङ्बा ओम सारथी ङि ल्हुइ गिक्खे तिङ । तासाइ तिनि ङा गिला जेक्खे बाङ्से चु सम्बन्ध सोना लाबारि आखाम्नि प्रेम ।

केवाला नाबातेन छ्याम ङाइ सेम लाब मुतेबा गोङ्मा बित्थारि एदा काबारि म्हाइजि ताला थेतासि तिनिहेन्से ए ह्राङ्बाङ मुला । ङाला खाजिबाइ उपस्थिति एला लागि गारा दोसोला आरे । थेतासि, एदा ह्राङ्बाङला छ्याम चु ङालातर्फ ग्याम एला लिच्छाला स्यो ताजि ।

अल बिदा !
चेगाइ स्योला भागिदार
एला दिया !

दोङ बस्ती, पेशोक चियाबारी, दार्जिलिङ ।
(छिगला अर्थः लिच्छा– अन्तिम, स्यो– पत्र, चेमो– प्रिय, चेगाइ– माया, ल्हागाब लाबा– लाग्नु, ग्राण– प्रण÷कसम, सार– तारा, म्ह्युबा– बिल्नु, साइबा– केलाउनु, ख्योल्बा– गल्ती, निसाल– उत्तर, सोनालाबा– जोगाउन, केवा– जीवन, नाबा– भोगाइ, ह्राङ्बाङ– स्वतन्त्र, गारा– तगारो)

दोःबा : यकिना अगाध