तिरे ह्रुप ताबा दुइरि ह्वाइखा ब्रिखेन ज्योज्यो युयुत्सु आरडी शर्मासे ङादा फुर ताङ्सि सुङ्जि, ‘ईश्वर, एदा ह्रुप ताबारि अमेरिकाहेन्दे गोर्गि ह्वाइखा ब्रिखेन खाबाइगे मुला । थे ह्वाइखा ब्रिखेन ङाला ह्रोए हिन्ना । थे ह्रोला मिनचा डेभिड अस्टेल हिन्ना । ए ङिदा ङाइ तिरे ह्रुप लासि पिन्ला ।’

ह्वाइखा ब्रिखेन ज्योज्यो युयुत्सुसे ओराङ बिसि टिबा दुइसाङरि ङादा ताङ्बा खाजि । फुरफुर ताङ्बा खाजि । ताङ्सि ङाला सेम तोरतोर मुरि जाजि ।

बिमाह्राङ तिरेकुनु ङाइ ङादा ह्रुप ताबारि सेम लाबा ङाला थे तिङ्मा ह्वाइखा ब्रिखेन ज्योज्यो डेभिड अस्टेलदा आदेङ्देङ लासि ह्रुप ताम्याङ्जि । ङा टिबा ङाला खोपोङरिन ह्रुप ताम्याङ्जि । ङा हुर छार्बा ङाला खोपोङरिन ह्रुप ताम्याङ्जि । ङाइ चेकाइ लाबा ङाला खोपोङरिन ह्रुप ताम्याङ्जि । ङाइ तिङ नाबा ङाला खोपोङरिन ह्रुप ताम्याङ्जि । खोपोङ लाइ नोन ङाइ तेलकासा क्लाङना क्लाङनान ङा हुर छार्बा ङाला न्यातपोल लाथान ङाम्तेलान ङाला क्याफे न्यातापोलरिन ह्रुप ताम्याङ्जि ।

ङादा ताङ्बा खाजि ।

क्याफे न्यातापोलदा ब्ले म्राङ्बाला पायान थे दुइरि ङाइ ङाला जात्तुकु रेला गोर्गि डान्बा ङाला मिला ओन्छाङ खासि ख्वारख्वार स्याकाजि, कार्वातिह्राङ लासि । थे दुइरि ङा जाजान मुबा । आथाङ्बा । तिरेकुनु आपा डेरारि आरेबा मुबा । आपा याम्बुला ठमेलरि थाङ्कु चुङ्बारि बिसि निमुबा । ङा लोपखाङग्यामसे खासि ङाइ दिगु (आपासे सात्तान ङाला खुमदिरि सिका च्युइ न्होर ङादा दिगुदा बिसि बिगे प्लेटनाङ ममदा बिसि ख्लाथान्मुबा) म्हाइजि । फुतफुत म्हाइजि । थे रेकुनु आपासे ङादा दिगुदा न्होर थान्बारि म्लेजिम । आपासे दिगुदा न्होर ख्लाआथान्बा थायाङ्सि ङा फोइथान ताबा दो म्राङ्जि ।

ङादा आज्याना ङ्हाम्जि ।

न्यातपोल ङाम्तेला गोर्गि ब्रोइ खाबा मम छोङ्खानरि निसि उधारो मम ह्रिसि चाबा बाङ आखाजि ङादा । छोङ्खाङला दोप्ता ङो सेबा, ह्रिसाम पिन्सेला मुबा । ङाला उधारो ह्रिबा ह्रिक्पा आरेबासे लामा ङा फोइथान ताबा दो म्राङ्जि । हुलहुल ङाइ आपादा डान्जि । हुलहुल ङाइ थे बाइला ब्रोइ खाबा ममदा डान्जि । ममला डान्बा खाबाला पायान ङाइ तिरेम ठ्वा ग्लोङ्जि । ङाला सेम दोजि । जामादुइरि मम सिका च्युइरि याङ्मुबा ।

तिलाइ दुइलिच्छा ङाइ खाइमा खाइमाहेन्दे ह्रुप्सि थान्बा ङाला खुमदिला ङाला तिङ्मा हिरो–हिरोइनला पोस्टकार्ड (जामादुइरि फिलिमरि क्लाङ्बा ह्राङ्दा सेम निबा हिरो–हिरोइनला फोटो ह्रुप्पा÷क्लाङ्बा ठिम मुबा ।) दा थुम डान्जि । थेलिच्छा ङाइ म्हान्जि, ‘चु पोस्टकार्डकादे चुङ्सि दिगु चातोला ।’

थे म्हान्सि ङा ङाइ सात्तान लोपखाङरि निबा बस रुङ्सि टिबा ग्ला क्याफे न्यातापोलला राम लाथानरि निबापाट्टिला म्रापकोनरि स्हाङ्दोजि । थे क्याफेला म्रापकोन ङाम्तेला गोर्गि स्युइ दाबा सारि ङाइ ज्यागोन दिङ्हेन्देन ह्रुप्सि थान्बा ङाला तिङ्मा पोस्टकार्डकादेदा थाङ्मा साङ्माह्राङ लासि साङ्जि । ख्रेन्सि फो स्योप ताजिन्मुबा । सुङ्फि खार्जिन्मुबा ।

ङा थे क्याफेलान ङाम्तेरि पोस्टकार्ड छोङ लाबारि बिसि टिसि ज्योगोन गाइजिन्साइ ङाला पोस्टकार्ड ग्लुबा म्हि (ग्राहक) खासाम सितोला । आखाजि । तिलाइ लासि आखाजि । दिनि गाङ्जोरि दोला जिन्साइ ङाला पोस्टकार्डकादे ग्लुसि पिन्बा म्हिकादे आखाजि ।

ङा थे क्याफेरिन मुबा । ग्राहक रुङ्सि टिबा । ङाला तिङ्मा पोस्टकार्डकादेला ग्राहक । ङाला दिङ्मा पोस्टकार्डकादेला ग्राहक । ङाला तिङ्ला पोस्टकार्डकादेला ग्राहक । ङाला सेमला पोस्टकार्डकादेला ग्राहक । ख्रेन्सि फोन्हाङरि नाम्युङकादे चुर्से ओर्से मालाक क्लाङ्सि टिमुबा । ग्राहककादे रुङ्ना रुङ्नान ङा ब्लाप्सि जिन्मुबा । या÷काङ रालाक रुलुक ताजिन्मुबा । सुङ्फि खार्जिमुबा । फो स्योप ताजिन्मुबा । लि दोपदोप ताजिन्मुबा । ओतेबान दुइरि ङा थेर्ला थेरिन मेङ ह्यार्जिम । थाआयाङ्ना । खालाइसे थाआयाङ्ना ।

ङा फेत छोर्माम, दोलो ङाइ ख्रेन्बा दुइरि हुलहुल डान्बा लाबा ङाला तिङ्मा मम छोङ्खाङ्ला बाइ दोप्ताला छोङ्खाङ्ला तिसारि प्लिङ ताटिबा याङ्जि । फेत छोर्सि ङाइ चुर्से ओर्से च्याजि । थेरि दोप्ता मुबा, मम छोङ्खाङ्ला । बाइ दोप्ताला खुयु नोन मुबा थेरि । ङादा क्राबा खाजि । थाआयाङ्ना ङाइ मिख्लि सोत पुइजि । ङा लोङ्सि क्राबा आहिन्ना, ख्रेन्सि क्रामुबा जामा । बाइ दोप्ता थेन थेला खुयुसे ङादा तिखुरिन कुरि किन्सि बिजि, ‘ए तिल्दा पोस्टकार्ड चुङ्सि टिबा ? लोपखाङरि आनिना ?’

ङाए नोन बाइ दोप्ता थेन थेला खुयुला कुरि तिखुरिन लेप ताबान ङाइ दोलो पोस्टकार्ड चुङ्बा दुइला छाङ्मान रापदा ताङ लासि थुइजि । ङाला रापदा थेसि बाइ दोप्ता थेन थेला खुयुसे नोन मिख्लि सोत पुइजि, दोलो ङाइ पुइबा ह्राङ लासिन ।

ङादा दाबे आज्याना ङ्हाम्जि ।

ङाला चुराङ्बा जात्तुकु रे थुइबा क्याफे न्यातापोलरि अमेरिकाला ह्वाइखा ब्रिखेन ज्योज्यो डेभिड अस्टेलदा ह्रुप ताम्याङ्सि ङादा ताङ्बा खाजि । फुरफुर ताङ्बा खाजि ।

ह्रुप ताबाइतेन युयुत्सु ज्योज्योसे ङादा हापख्वाइजि, ज्यागोन गाइना । ओराङ नोन लासि डेभिड अस्टेल ज्योज्योसे नोन हापख्वाइजि, ज्यागोन गाइना । ओराङ नोन लासि सिर्जना शर्मा (युयुत्सु ज्योज्योला खुयु) चाङ्गेनसे नोन हापख्वाइजि, ज्यागोन गाइना । ताङ लासि ङा नोन ङाला तिङ्मा कुकादेरि लेप ताजि, ज्यागोन गाइना ।

तामलाम तामरि अस्टेल ज्योज्योसे ङादा सुङ्जि, ‘ईश्वर आले, ङाइ एला तिलाइ ह्वाइखाकादेदा ङा अमेरिकारि मुबा दुइरिन डोम्याङ्मुबा । एसे ब्रिबा ह्वाइखाकादे तुन्बाचे आताना, आउदिन ब्रोइ खाबाइ मुला । एला ह्वाइखा डोबा दुइरिन ङाइ म्हान्मुबाकि दात्तेला दात्तेन एदा ह्रुप तासि फोम्रेन्ना ल्हेङ्मो लाइ । जामान ङाइ लादा बाङ ह्रिमुबाकि ङाला तिङ्मा ह्वाइखा ब्रिखेन ईश्वर थोकरदा तिरे एसे ह्रुप ताना लासि बाउ । एदा ङाइ तोङ्जा तोङ्जा थुजेछे दोन्ला । तिनि एदा ङाला ओन्छाङ म्राङम्याङ्सि ङादा ताङ्बा खामुला । फुरफुर ताङ्बा खामुला ।’

ओतेबिसि अस्टेल ज्योज्योसे ङादा ङाला गोर्गि ह्वाइखा डोबारि म्होइजेन लाजि । ङाइ ङाला ‘नर्स ः सोम’ क्राछिकला ह््वाइखा डोजि–

‘एला मिला नुप्पा ङ्याल्मोरि ङाइ 
ङादा याङ्जि ।’

क्याफे न्यातापोलग्यामसे मार फाप्जि, ङानि ब्लि नोन । ङा ङ्हाच्छा ङ्हाच्छा, ज्योज्यो अस्टेल, युयुत्सु थेन सिर्जना चाङ लिच्छा लिच्छा मुबा ।

जामा डेरा खोपोङला ब्याँसीबिबा ग्लारि मुबा ङाला । सानो ब्याँसी बिबा ग्लारि । सानो ब्याँसीपाट्टि निबाइगे लाबा दुइरि अस्टेल ज्योज्योसे युयुत्सु ज्योज्योपाट्टि फ्लिक दोसि सुङ्जि, ‘दारेम आले ईश्वरला दिमथेमेदा नोन ह्रुप ताम्याङ्बा ताजि ।’

अस्टेल ज्योज्योसे ओराङ बिसि टिबा दुइरि सिर्जना चाङ थेन युयुत्सु ज्योज्यो फुर ताङ्सि टिमुबा, अस्टेल ज्योज्योह्राङ लासिन ।

फुर ताङ्सि टिमुबा ।

ङाटिबा डेरारि दोसि लिच्छा अस्टेल ज्योज्योसे सुङ्जि, ‘कादे तिङ्मा दिमथेमे ? कादे तिङ्मा आपाआमा ? कादे तिङ्मा आलेआङा ?’

ङाला ह्वाइखा ब्रिखेन ह्रोकादे म्राङ्सि ङाला आपाआमाइ ताङ्जि । फुरफुर ताङ्जि । ङाला आलेआङाइ ताङ्जि । फुरफुर ताङ्जि । ङामि झन ताङ्बान ताजि ।

फेसि तिलाइ दिङलिच्छा ह्वाइखा ब्रिखेन ज्योज्यो डेभिड अस्टेलसे ङाला मिनरि ह्वाइखा ब्रिजिम । ङादान फुल्सि ब्रिजिम । ङादान डान्सि ब्रिजिम । ङादान तिङरि थान्सि ब्रिजिम । ङादान सेमरि थान्सि ब्रिजिम । ह्रुप ताबा थे दुइला डान्बादा सेम दुइसि ब्रिजिम । ह्रुप ताबा थे दुइला डान्बा ब्रिजिम । ह्रुप ताबा थे दुइला म्हान्बा ब्रिजिम । ङादा चेकाइ लासि ब्रिजिम । ङादा तिङ नासि ब्रिजिम ।

ङाला मिनरि थेराङ्लासि ब्रिबा ह्वाइखादा ह्वाइखा ब्रिखेन ज्योज्यो डेभिड अस्टेलसे ह्राङ्ला ङिक्छा ह्वाइखापोप ‘गरुड थेन स्ह्यान छार ह्वाइखाकादे’ रि छिबा मुला । ङाला मिनरि फिक्र्याप ह्युल्साला ह्वाइखा ब्रिखेनसे ब्रिबा चु गिक्छारेम हिन्ना । ङादा चेकाइ लासि ब्रिबा चु ह्वाइखादा ब्ले म्राङ्सि ङाताइ ताङबा खाजि । फुरफुर ताङ्बा खाजि ।

ताङ्सि ङाला सेम तोरतोर मुरि जाजि ।

तिलाओयाकेन ह्रुप ताबा दुइरि युयुत्सु ज्योज्यो थेन चाङ सिर्जनासे ङादा तिखुरिन सुङ्मुबा, ‘ह्वाइखा ब्रिखेन डेभिड अस्टेलसे एदा रेमरेम÷ग्यार्जा तोङ्जारेम डान्बा लामुला । एला ताम आपाङ्ते चाबा मिल आनिबा मुला । नेपालरि खाबा दुइरि ह्रुप ताइ बिमुला ।’

चाङ सिर्जना थेन ज्योज्यो युयुत्सुसे ओराङ्बिसि टिबा दुइरि ङाइ ज्योज्यो डेभिड अस्टेलदा तिरेम थुम डान्जि । अस्टेल ज्योज्योदा ह्राङ्लासिन न्यातपोल लाथान ताइ नोन थुम डान्जि, तिखुरिन । ओराङ नोन लासि न्यातपोल लाथान ङाम्तेलान क्याफे न्यातापोल ताइ नोन थुम डान्जि । तिल्दा बिसाम थे क्याफेरिन दोक्छेबिमा ङ्हाच्छा ङाइ ब्ले म्राङम्याङ्मुबा, ङाला तिङमा ह्वाइखा ब्रिखेन ज्योज्यो डेभिड अस्टेलदा ।

ishworthokar@gmail.com