खोपोङला ठिमिरि चिसि ङा एसएलसिला रिजल्ट ब्रान्चिमुबा । ठिमिलाइ नोन दुइ पोखरि बिबा ग्लारि । आले अजय थेन अस्टमान नोन छ्याम मुबा । ङान्छे डेरा किन्सि चिबा दिम रिङकुला मुबा ।

ङाला ग्योइकाइरि जात्तुकुहेन्छे आउदिन सेम निमुबा । सेसि आसेना ह्वाइखा ब्रिमुबा । गजल ब्रिमुबा । ह्वाइ ब्रिमुबा । राप ब्रिमुबा । ब्रिसाइ जामा दुइदोनान खाज्युबाइ स्योस्योरि क्यार ङाइ ब्रिबा स्हेकादे छिला आजिन्मुबा ।

तिरे ङा डेराग्यामसे कोर्बारि बिसि फिक्र्याप थोन्जि । डेरालान चुर्से ओर्से कोरोरो तासि ब्राबा ताङरि ङाइ ग्यामला गोर्गि ‘छ्योइ पसल’रि युधिर थापासे ब्रिबा छ्योइकादे च्योथान्बा म्राङ्जि । ङाला मि ओजा छ्योइकादेरि दोसि थेनताजि । गि गि लासि ङाइ ओजा छ्योइकादेला मिन डोजि ।

ङादा ओजा छ्योइकादेला मिनला नाच्युसे ह्राक गुजि, आज्याना लासि । ङाइ ओजा छ्योइकादेदा ताङ लासि च्याजि, ङादा सेम निजि । ङाइ जामाकुनुन थे छोङखानग्यामसे स्याप्तेबान युधिर थापासे ब्रिबाछाङ्मान छ्योइकादेदा तिक्खुरिन ग्लुजि ।

थे दुइरिन ङाइ रिङकुला दिमरि टिसि युधिर थापाला ‘कसैको प्रतिक्षामा’, ‘कहीँ घाम कहीँ छायाँ’, ‘के थियो के भयो’, ‘हुरीको लहर’, ‘जून अस्ताई सकेछ’, ‘दुई नदीको सङ्गम’, ‘हिजो कस्तो थियो आज कस्तो भयो’, ‘मुटुको अनेक ढुकढुकी’, ‘यहाँ यस्तै यस्तै हुन्छ’ थेन ‘फेरि कहिले भेट होला ?’ ह्राङ्बा छ्योइकादे डोजिन्मुबा ।

रिङ्कुला लोपखाङ बिदा मुबा । लोपखाङ बिदा ताबा रेरि थे स्यान रेरि बिमा ज्यागोन गाइना ङातेन छ्याम टिमुबा । ङाला कुरि टिसि होमवर्क लामुबा । आसेबा ङ्योइमुबा ।

सब्जेक्टकादेरि थेदा ‘नेपाली’ जाकि होमवर्क लाबारि ज्यो आतामुबा । नेपालिला होमवर्क लाबा दुइरि थेदा फाइला च्याल्दा ङेते तामुबा । स्यान सब्जेक्टरि चा बिसाम ज्याबान मुबा ।

तिरे होमवर्क लाटिबा दुइरि ङाइ थेदा ङ्योइजि, ‘रिङकु, सब्जेक्टकादेरि एदा खाप्पा चा सब्जेक्ट ज्याबा ?’

होमवर्क लाटिबा थेसे ब्रिगुदा थेन थान्सि पाङ्जि, ‘साइन्स ।’

‘तिल्दा ?’ ङाइ दाबे ङ्योइजि ।

थेसे फुर ताङ्सि पाङ्जि, ‘ङादा नर्स दोबा सेम मुला ।’

रिङकुला सुङग्यामसे ‘नर्स’ छिग प्योल थोन्बाला पायान ङाइ चु बिमा सोमदिङ ङ्हाच्छाला दोक्छेबिमा ङ्हाच्छा ङा ‘मानसिक वार्ड’रि टिबा दुइदा थुम डान्जि ।

ङा वार्डन्हाङरिन मुबा । वार्डरि मुबा दुइरिन ङाइ दिमला आपा आमादा थुम डान्जि । आले आङादा थुम डान्जि । ङादा सात्तान केकेबा ग्लुसि दोन्बा आस्याङनिजा आखेम्हेमेदा थुम डान्जि ।

ओराङनोन लासि ङाइ ङातेन छ्यामामा पान्त्राइ क्लाङ्बा ङाला च्योङ्याम्बा ह्रोकादेदा डान्जि । छाङ्मान ङाइ ङोसेबा ङाला ङेङगोरकादेदा डान्जि । ङा केबा नाम्सादिमदा डान्जि । ‘घिन्ताङघिसि’ क्लाङ्ना क्लाङ्नान ङा हुर छार्बा थे खोपोङदा डान्जि । डान्ना डान्नान ङाला मिग्यामसे थाआयाङ्ना मिख्लि प्रुलुलु ताइजि ।

थे वार्डग्यामसे ङा खाइमा थोन्लाह्राङ ताजि । थोन्सि ङाला थे मुतेबा ङेङगोरकादे दात्तेन ह्रुप तासि ल्हेङ्मो लाइ म्हान्जि । थे ङेङगोरकादेतेन स्हेसि नेगे म्हान्जि । क्रागे म्हान्जि । ङाला सेमरि मुबा दुङालदा स्वाल ब्लाइ म्हान्जि ।

ङाला च्योङ्याम्बा ह्रोकादेतेन छ्याम ल्होसि सापोन्दोरि पान्त्राइ क्लाङ्बा सेम तासि खाजि । लानिहोइरि ‘उ ... उ ...’ बिसि लाजाङ क्लाङ्बा सेम तासि खाजि । ताङ्सि ताङ्सि लोपखाङ डोबा सेम तासि खाजि । म्हाङ दाज्र्युरि राम्हे छाबा सेम तासि खाजि । राम्हे छाना छानान ह्रिला सातिब्रो थुसि चाबा सेम तासि खाजि । स्योङग्रेनरि काख्रेब्रुतुङ म्हाइबा सेम तासि खाजि ङादा ।

ङा वार्डला बेडरि क्रासि टिबा म्राङ्सि गोर्गि नर्स ङाला ङामरि स्हाङ दोकाजि । थेसे ङादा तिरेम प्लिक च्याजि । लिच्छा, थेसे ङाला मिख्लि फ्यासि पिन्बान ङ्योइजि, ‘अक्कल, ए तिल्दा क्राबा ? चुरि च्यागो या एला ओन्छाङ खाला मुला ?’

थेसे ओराङ बिबाइतेन ङाइ थेला लिरि तिरेम प्लिक च्याजि । थेलाइ मि मिख्लिसे खाइमान फुजिन्जिम, ङालाह्राङ लासिन ।

ओते डान्सि ङाइ रिङकुदा पाङजि, ‘रिङकु, एदा ङाला ज्याबाडान्बा ।’

रिङकुसे बिजि, ‘थुजेछे ।’

ङाला एलएलसिला रिजल्ट खाबा रे मुबा । तिङ लोङ्सि फितफित दार्बा चुजि । आपा थेन आले ङ्हिए नोन ङाला रिजल्टलान थोरि सुर्ता ताटिमुबा ।

योथाङमा रिङकु ङा मुबा ग्लारि दोकासि ङादा ङ्योइजि, ‘ज्योज्यो, तिनि ह्राङला रिजल्ट थोन्बा रे आहिन ?’

ङाइ ‘हिन्ना’ बिसि थोपो ह्योङजि ।

रेडियो÷टिभिसे एसएलसिला रिजल्ट थोन्जि बिसि योहेन्देन फुइसि टिमुबा । ङादा लोङ्बा खाजि । लोङ्सि लोङ्सिन ङा स्योस्यो ग्लुबारि बिसि फिक्र्याप थोन्जि । ङातेन छ्यामछ्याम रिङकुइ खाजि । आले अजय थेन अस्टमानए छ्याम नोन मुबा । आपाम झन बिनोन आतो ।

स्योस्यो म्हाइबारि ठिमिला शङखधरचोकला सात्तान ङाइ स्योस्यो ग्लुबा ‘छ्योइ छोङखान’रि दोजि । रिजल्ट ‘गोरखापत्र’ स्योस्योरि छिमुबा । जाक्कि गाइसाम स्योस्यो आस्याप्सेला । दान्नाइ स्याप्जि ।

ङाला तिङ फितफित दार्बान मुबा । ओराङ नोन लासि काङ÷या नोन दार्बान मुबा । फितफित दार्बा यासेन ङाइ ङाला ‘सिम्बल नम्बर’दा गोनग्यामसे तेजि ।

थे ‘सिम्बल नम्बर’दा च्यासि ङाइ स्योस्योरि छिबा ‘सिम्बल नम्बर’दा कारकार लासि चुर्से ओर्से च्याजि । स्याप्साम सितोला । आस्याप्नि । ङाला या फितफित दार्बान मुबा ।

ज्यागोन गाइमा ङाइ थे स्योस्योला गुगिरि ङाला ‘सिम्बल नम्बर’दा ब्ले म्राङ्जि ।

ताङ्सि ङाला सेम सारि आतानि । थेरि आपाइ मुबा, आपाइ ताङ्जि । आले ङ्हिए नोन मुबा, आले ङ्हिए नोन ताङजि । रिङकुए नोन मुबा, रिङकुए नोन ताङ्जि । ङा कादे ताङते ओते नोन ताङजि, थेनि ब्लि नोन । थेनि ब्लिसेन लिच्छा तिखुरिन ङादा बिजि, ‘ज्याबाम्हान्बा ।’

डेरारि दोकासि लिच्छा रिङकुला आपा आमा थेन आखे ल्होसि ङादा ‘ज्याबाम्हान्बा’ दोन्जि, फुर ताङसि ।

ङादा ताङबा खाजि ।

एसएलसि पास तासि लिच्छा खाप्पा कलेजरि डोमा ज्याबा ताला ? खाप्पा कलेज ज्याबा मुला ? थेनोन था आरेबा मुबा ङादा । तिरे योथाङमा आपासे ङादा सुङ्जि, ‘चुराङ्बा तामकादे बेनान ज्योज्यो दिर्घदा था ताला । ज्योज्यो थेबादा ह्रुप ताबारि ज्योज्योला डेरारि दात्तेन निउ ।’

आपासे ओते बिबाला पायान ङा थोपो मे जुसि ज्योज्यो दिर्घला डेरारि स्हाङ दोजि । ज्योज्योला डेरा बार्बाचोरि मुबा । ज्योज्यो पुप तासि थाङ्कु ब्रिटिमुबा । दोबाला पायान ङाइ ज्योज्योदा बेनान ताम सेजि । ज्योज्योसे ङाला ताम ङ्यान्सि लिच्छा सुङ्जि, ‘आले, ओराङ हिन्साम दात्तेन ब्राउ, ङाइ सेबा गोर्गि कलेजरि । एसे दाम्बा ह्राङ्बान कलेज हिन्ना थे । टिचर दोबारि सेम ताबाजुगुसे डोबा कलेज ।’

ज्योज्यो ङ्हाच्छा ङ्हाच्छा, ङा लिच्छा लिच्छा निजि । ज्योज्योसे बोर्बा कलेजला मिन ‘शारदा क्याम्पस’ मुबा । थे कलेज खोपोङला यालाछेँ बिबा ग्लारि मुबा । ङादा सेम निजि, थे कलेज । गिक्छारेमरिन ज्योज्योपाट्टि दोसि ङाइ बिजि, ‘ङा चुरिन डोबारि ज्योज्यो ।’

‘एदा सेम निसाम, ताला ।’ ज्योज्योसे सुङ्जि ।

ङा ‘शारदा क्याम्पस’रिन डोबा ताजि ।

‘शारदा क्याम्पस’रि डोबा ताबासे लासि स्यान्दोन ग्लारि डेरा म्हाइतोजि । ठिमिला डेरा ख्लातोबा ताजि । रिङकुला दिम । आपासे सुङ्जि, ‘कलेज ङामङाम नोन डेरा स्याप्साम ज्याबा तासेला ।’

लिच्छा आपासे खोपोङला गाल्ज्या गुल्ज्यारि क्यार डेरा म्हाइबा चुजि । म्हाइमा म्हाइमा डेरा खोपोङलान बार्बाचोरि स्याप्जि । ज्योज्यो दिर्घला डेरा ङामतेरिन । थेरिन टिबा ताजि । ठिमिला डेरा ख्लाबा ताजि, बिगे रिङकुला दिम ख्लाबा ताजि । रिङकुदा ङाइ थेला दिम ख्लाबा ताम सेआखाम्नि ।

तिलाइ रेलिच्छा ठिमिला डेरा ख्लाजि । रिङकुला दिम ख्लाजि । डेरा ल्हेमाकुनु रिङकु लोपखाङरि निमुबा । थे लोपखाङरि मुबा दुइरिन डेरा ल्हेसि जिन्मुबा ।

थेदा था ताबा ताम नोन आतानि ।

तिनिम रिङकुग्याम फेसि छ्योआछ्यो च्युइसे सोम दिङ ताजिन्जिम । जामा दुइरिन थे क्लास ङ्हारि डोमुबा । दिङ च्युइला मुबा । तोक जेबा । तिरेकुनु तामलाम तामरि थेसे ङादा बिमुबा, ‘ङादा नर्स दोबा सेम मुला ।’

रिङकुला डोबा लोप्पा आउदिन ज्यामुबा । ह्यान्डराइटिङ नोन ज्यामुबा । दुइरि होमवर्क लामुबा । दुइरि क्लाङमुबा । दुइरि चाबा चामुबा । दुइरि म्हेर्मुबा । ज्याबा ह्रिक्पाला मुबा । ग्रेनदा क्वाइ लाबा । जात्तुकुदा चेकाइ लाबा । ङादा ‘ज्योज्यो’ बिमुबा । टिचरकादेला÷ह्रोकादेला सेमन्हाङरि नोन टिखाम्बा लोप्डा मुबा, रिङकु ।

थेसे बिबाह्राङ लासिन थे तिनि तेमाम, ‘नर्स’ दोजिन्जि ताला । दात्तेह्राङमाम थे नाबा छाबा म्हिकादेला गुङरि मुताला । नाबा छाबा म्हिकादेदा सायार लाटिबा । नाबा छाबा म्हिकादेदा चेकाइ लाटिबा । फेलाबा दुइरि ङाइ थेदा तिरेम सुत्ताइ ह्रुप ताआम्याङ्नि । निजि बिआम्याङ्नि ।