दोलखा । नेपाली कांग्रेसला नेता ओसेम ङ्हाच्छाला ठिम थेन न्याय लोन्पो डोङ्बा भीमबहादुर तमाङला डान्बारि तिनिहेन्से बागमती प्रदेश स्तरीय भलिबल प्रतियोगिता तिबा मुला । भीमबहादुर तामाङदा नेपाली कांग्रेसला आदर्श पुरुषला लिरि च्याबा लामुला ।

प्रतियोगिता तिनिहेन्से चैत १६ गतेदोना बैत्यश्वर गाउँपालिका वडा नं. ३, मिर्गे लहरे मानेरि तासेला मुला । नेपाली कांग्रेस दोलखा क्षेत्र नं. १ (ख)से चु प्रतियोगिताला ङ्योइसाङ लाबा हिन्ना ।

गेताङला ग्रेनडोन्बो नेपाली कांग्रेसला केन्द्रीय ह्रोम्हि ओसेम ङ्हहाच्छाला ल्हुइथाङलोन्पो मोहनबहादुर बस्नेत मुबा । थेसे भिमबहादुर तामाङ दोलखाला जेक्खे नेता आताना ह्युललान ग्यालाम उन्बा नेता हिन्ना बिसि पाङ्जि ।

‘ह्रो प्रजातन्त्र बाबा थेन समाज पोबारि महत्वपुर्ण भुमिका क्लाङ्बा सादा ल्हुइ, नोबा सेमतेन मुबा नेता हिन्ना ।’ बस्नेतसे पाङ्जि, ‘थेतासि ह्याङ्से तिनि नोन डेनलासि डान्तोबा हिन्ना ।’ थेसे दोसि ग्ले बाला बिसि माजिङ्बा लाबाजुगुला तिलाइ अर्थ आरे बिसि पाङ्जि ।

गेताङरि नेपाली कांग्रेस दोलखाला सभापति बर्मा लामा, ङ्हाच्छाला सभापति ताराबहादुर कोईराला, नेपाली कांग्रेस दोलखाला उपसभापति ओसेम बैत्यश्वर गाउँपालिकाला चोहो छवि लामा, नेपाली कांग्रेस दोलखाला प्रवक्ता ओसेम भुमि आयोगला चोहो राकेश श्रेष्ठ, बागमती प्रदेश ह्रोम्हि पारास तामाङतेन स्यान्दो डोन्बोजुगुसे ज्याबाम्हान्बा सेमताम थान्बा मुबा ।

नेपाली कांग्रेस दोलखा क्षेत्र नं. १ ला सभापति शुक्रराज तामाङला चोहोदानरि ताबा गेताङरि डेन सेमताम प्रदेश प्रवक्ता दोर्जेकाजी तामाङसे थान्बा मुबा ।

गेताङरि नेपाली कांग्रेसला जिल्ला कार्यसमिति ह्रोम्हि राजन अधिकारीला म्रिङ भारतला राजीव गान्धी अस्पतालरि ब्रेष्ट क्यान्सरला क्योन्चिबासे ल्हुइथाङ ज्याबा तागाइ बिसि कामना लाबा मुबा ।

गेताङला गुङगुङरि सांस्कृतिक गेताङ नोन उन्बा मुबा ।

छिगला अर्थः लोन्पो– मन्त्री, ठिम– कानुन, ल्हुइथाङ– स्वास्थ्य, ह्रोम्हि– सदस्य, सेमतेन– विचार, माजिङ्बा– हल्लाखल्ला, क्योन्चिबा– उपचारत,