ललितपुरला मामथान गाङ सामुदायिक ह्रिरि ग्रेन मे ल्हागतिजि, मे नाम्सारि वाङ्बा जोखिम
ललितपुर । ललितपुरला मामथान गाङ (बुढीवदेवी) सामुदायिक ह्रिरि मंगलबार ङ्यासेहेन्से ग्रेन म्हे ल्हागतिबा मुला ।
बागमती गाउँपालिका ४ ला वडाचोहो रामकुमार लामाला आन्सार मंगलबार ङ्यासेहेन्से मामथान गाङरि ल्हागतिबा मे नाम्सारि वाङ्बा जोखिमरि मुला ।
स्थानीयला ह्रोरि मंगलबारि ङ्यासे गाइनादोना मे सेबा बाङ लासाइ नोन आखाम्बा बिसि थेसे पाङ्बा मुला ।
मे नाम्सारि वाङ्बा जोखिम तामाहेन्से वडाचोहो लामासे ग्रा तेसि मे सेबा गेरि ह्रो लाबारि मोक्कोनदा म्होइजेन लाबा मुला ।
वडाचोहो लामासे सामुदायिक ह्रिरि ल्हागतिबा मे नाम्सारि वाङ्सेला ताबासे स्थानीयदा सचेत ताबारि नोन म्होइजेन लाबा मुला ।
‘दाते ङानि मे सेबारि ब्यस्त मुला । मे नाम्सारि वाङ्बा जोखिम ताबासे चु दुइरि ल्हाना ताम लाचिबा दुइ आरे ।’ वडाचोहो लामासे पाङ्जि ।
मे नियन्त्रण माङ्ग्यार निमाहेन्से दाते आश्राङ प्रहरी चौकीला मुतेबा टिम, लेले सूर्यदल ब्यारेक ग्याम नेपाल आर्मी नोन दोबा वडाचोहो लामासे पाङ्जि ।
प्युटार स्थानीय लालबहादुर बोम्जनसे सामुदायिक ह्रितेन थुइबा नाम्सा जोखिमरि ताबा बिसि पाङ्बा मुला । स्थानीयला सक्रियतारि ह्रिला मेल्हाम नाम्सारि आदोगाइ बिसि ल्हाप्तेजुगु ब्याङ्सि ‘फायर लाइन’ स्होबा गे ताचिबा मुला ।
प्युटारला गढी भन्ज्याङ थेन चौकीटोल थुमरि ल्हाना जोखिम ताबासे सजगता किन्बा गाउँपालिका चोहो वीरबहादुर लोप्चनसे पाङ्बा मुला ।
दाते नाम्साबा थेन जनप्रतिनिधिजुगु मे सेबा गेरि वाङ्चिबा मुला ।
फोटोः सन्तोष लोप्चन/कमल गोले
तपाईको प्रतिक्रिया दिनुहोस