हेराङ (ललितपुर) । बौद्ध शिक्षा (ग्युइसेर) विस्तार (ल्हेनालाबा) मैत्री धर्म द्वीप केन्द्रसे ङ्योइसाङ लाबा छ्योठुल दुइछेन ओसेम ऋद्धि प्रतिहार्य दिवसला दुइसाङरि धर्मगुरु जेचुन साङ्गे खाण्डो रिन्पोछेसे सामुहिक टाप्चेला छ्याम शरण गमन शिल पिन्बा थेन ङ्हाछा छेथर ग्रेनछ्योकु लाबा मुला । गेताङ २०८१ चैत १ गते शुक्रबारला रे बागमती गाउँपालिकाला भट्टेगाङ वडा नं. ३ तीनपाने राडार गाङला पिकनिक पार्करि ताबा हिन्ना ।
गेताङरि बागमती गाउँपालिकाला चोहो वीरबहादुर लोप्चनसे खाबा रेरि ह्राङ्ला गाउँपालिकारि बौद्ध ग्युइसेर ल्हेनालाबा मैत्री धर्म द्वीप केन्द्रसे लाबा मुतेबा गेरि ह्रो लाबा प्रतिबद्धता लाबा मुबा । थेसे ह्राङ्ला थुमरि खासि चुह्राङ्बा धार्मिक गेताङ लाबा बिसि ताङ्बा उन्सि थुजेछे पिन्जि ।
गेताङरि कोन्ज्योसोम गाउँपालिका वडा नं. ३ ला चोहो तिलक बोम्जनसे नोन बोकिन्बा मुबा । गेताङरि ल्होलो जोङ थेन हेराङला ल्होलो ग्लाग्याम भक्तजनजुगुला उत्साहपुर्ण दाराप्बा मुबा ।
छेथरदा बुदान बिले केवा दानला लिरि किन्बा लामुला । खाजिबाइ नोन पशुपक्षीदा छेथर लासाम भिक्षुसे शीपल तेन्बा तेबा पुण्य लाभ याङ्ला बिसि ल्होलो छ्योइजुगुरि ब्रिबा मुला । खसी, बोका, रा ह्राङ्बा खाजिबाइ याखारगि प्राणीदा छेथर लासि ह्राङ्बाङ पिन्साम गोर ङिस केवादोना दुर्गतीरि परतिबाग्याम मुक्ति याङ्ला बिसि उल्लेख लाबा मुला ।
थाहा आताना ग्यार्जासे गिक म्ह व्हा ग्यार्जा गिक ता सेबा म्हिसे नोन तिर्याम जेक्खे छेथर लाजि बिसाम थे ग्रेनपापला दोइग्याम मुक्ति याङ्बा विश्वास मुला । खालाइसे केवारि १३ रेम दोना छेथर लासाम १० छा तोङ्जा कल्पदोना लाबा पापजुगु सुताइ म्हासिन निसेला मुला ।
खालाइ म्हिला छे (आयु) जिन्सि डोङ्बा निश्चित ताबा मुला बिसाइ थेला मिनरि १३ रेमदोना छेथर लासाम च्याङ्नारि ३ दिङदोना छे (आयु) ह्रोङ्ला बिमुला ।
छेथरला लागि खाजिबाइ निश्चित दुइ तोकतिबा आरे । थेतासि ह्राङ्ला दुइ आन्सार लाबारि खाम्ला । तासाइ नोन अष्टमी, दशमी, ङ्ह्या थेन औँसी तिथिरि छेथर लासाम आउदिन लाभ तासेला मुला । चु तिथिजुगुरि छेथर लासाम स्यान्दो रेला क्योइबारि (तुलनामा) बुमजा गुणा ल्हाना लाभ ताला बिसि बिबा मुला ।
छेथर खाजिबाइ निश्चित पशुपक्षीदा जेक्खे लातोला बिसि किटान लाबा आरे तासाइ खाजिबाइ प्रयोजनला लागि सेबा लिच्छाला दुइरि मुबा प्रणीदा ग्लुसि छेथर लासाम ल्हानान पुण्य याङ्सेला मुला बिसि उल्लेख लाबा मुला ।
छेथरलामा लामा गुरुग्याम छेसुत्र थेन छे धारणी ङ ला छ्याम छ्योकु लातोला । छेथर लासि ह्राङ्बाङ ख्लाबा पशुपक्षीदा खालाइसे सेला आदे । चोदे खालाइसे सेसि स्याला लिरि चाजि बिसाम ग्यार्जा गिक म्हि सेबा च्योच्यो पापला दोइ पुइतोला ओम ल्होलो प्रकारला पालेजुगु सुताइ नातोसेला मुला बिसि उल्लेख लाबा मुला ।
तपाईको प्रतिक्रिया दिनुहोस