नेपाल तामाङ घेदुङ, पोखरा महानगर समितिसे मन्जुश्री सम्वत् २८६१ ला सा पुख्रि ल्होला सोनाम ल्होछारला दुइसाङरि सांस्कृतिक गेताङ्ला छ्याम ज्याबाम्हान्बा किन्बापिन्बा गेताङ दाङ्जि ।

तापा (माघ) लाला ५ गते कामरेकुनु ताबा गेताङ ग्रेनडेन्बो प्रतिनिधसभाला ह्रोम्हि माननीय मनबहादुर गुरुङसे कुङा म्रासि ठ्वाङ्सेन लाबा हिन्ना । थेसे पोखरादा पर्यटकीय नगर स्होबाला लागि तामाङजुगुला ग्योइ, क्वान, रिम, रिमठिमसे नोन विशेष गे लाबा तामदा बाङ्पिन्जि । थेसे ल्हाछार तामाङला जेक्खे आताना नेपाल ह्युललान राष्ट्रिय प्रिबा तातोबा सेमताम थान्जि । थेसे घेदुङ कास्कीला दिम स्होबाला लागि नब्बे लाख रुपैयाँ बजेट विनियोजन लापिन्बारि भूमिका क्लाङ्बा मुबा ।

गेताङरि घेदुङ संघीय ह्रोचोहो दीपक वाईबा, संघीय ह्रोम्हि (सदस्य) सुन्दर थोकर, घेदुङ जिल्ला समन्वय समिति कास्कीला चोहो भक्त डुम्जन तामाङ, घेदुङ कास्कीला ङ्हाच्छाला चोहो कृष्णबहादुर तितुङ, राष्ट्रिय आदिबासी जनजाति महिला महासंघ कास्की ह्रोचोहो मिनमाया डुम्जन तामाङ, पोखरा महानगरपालिका वडा नं. १३  ला जनप्रतिनिधि सुचिता तामाङ, बैदाम तामाङ इकाईला चोहो ज्याक तामाङसे ज्याबाम्हान्बा सेमताम थान्मुबा ।

गेताङरि नेपाल तामाङ घेदुङ, पोखरा महानगररि मुबा ल्होलो इकाईजुगुग्याम तामाङ मौलिक म्हेन्दोमाया थेन सेलो व्हाइरि स्याबा उन्बा मुबा । बैदाम तामाङ इकाईला ताम्बाजुगुसे साङसेग्र्याम लाबा मुबा गेताङरि मिस तामाङ पोखरा सन् २०२५ ला प्रतियोगीजुगुसे डेनस्याबा उन्बा मुबा ।

अन्जना डुम्जनला चोहोदानरि ताबा गेताङरि डेनसेमताम जंगराज ब्लोनसे थान्बा मुबा बिसाम संचालन गंगा ग्याबासे लाबा मुबा ।