खोपोङ । नेपाल मजदुर किसान पार्टीला ब्रेछा राष्ट्रिया महधिवेशन बेने (फागुन) १६ गते खोपोङला सल्लाघारीरि ठ्वाङ्सेन लाजि । महाधिवेशन बेने १६ हेन्से १९ गतेदोना तासेला मुला ।

याम्बुला कोटेश्वर, ठिमी, लाँन्चा फाल्चा (कमल विनायक), सुर्यविनायकला थेन ग्ला डुसे झाँकीला छ्याम र् याली तेबा मुवा ।

र् यालीरि ल्होलो जात जातिला ह्राङ ह्राङला रिमठिम आन्सारला साँस्कृतिक झाँकी उन्सि पार्टीला नारा ल्हागाब लाबा मुबा । महाधिवेशन ङ्हाच्छाला र्यालीरि नेमकिपा काँक्राबारी गाउँ कमिटीसे डम्फुरे थेन बोन्बोकादेला साँस्कृतिक झाँकी उन्बा मुबा । र् याली सल्लाघारीरि दोमाहेन्से महाधिवेशन ठ्वाङ्सेन लामुबा ।

महधिवेशनला ठ्वाङ्सेन नेमकिपाला चोेहो नारायणमान बिजुक्छें (रोहित) से लामुबा । चोहो बिजुक्छेसे गेताङला ठ्वाङ्सेन लाबान दन्ते ह्युलरि भ्रष्टाचारी ल्हेबा, छारिब्योनकादेदा गेनाम आयाङ्ना फिरग्याप ह्युलरि स्हु नासि टितोबा, ह्युलरि अराजक ल्हेबा, प्राङ्बो ह्युल्बासे महंगो ल्हुइथाङ्ला कारण ल्हुइ ब्याङ्तोबा दुइ मुला बिसि सरकारला आलोचना लाजि । थेसे ह्युलरि ज्याबा ग्युइसेर आरेबासे लासिमाम फिरग्याप ह्युलरि निसि लोप्बोनकादेसे डोतोबा थेन लोप्बोनकादेसे जाजा दिङरि स्हु याङ्सि बिचल्ली ताजिमा नोन सरकारसे ध्यान आपिन्बा बिसि गुनासो लाजि ।

चोहो बिजुक्छेसे दन्ते ह्युल्ला चु न्होङ्बा दुइ खाबारि खालाखाला काइलोन्पो (प्रधान मन्त्री) दोजि, खालाखाला न्होरलोन्पो दोजि थेनिकादेला पाले हिन्ना बिसि पाङ्जि ।

भ्रष्टाचारी, दलाल सरकारदा ह्युलबासे कारबाही लाखाम्दोला बिबान थेसे नेमकिपासे ह्युल्बाला बिजाबुमोदा सस्तोरी उच्चा ग्युइसेर पिन्बारि ख्वप विश्वविद्यलायला अनुमति ह्रिमा सरकारसे आपिन्बा बिसि गुनासो लाजि ।

गेताङरि नेमकिपाला गौराइ ओसेम संघीय सांसद प्रेम सुवालसे नेपालला स्यान्दो कम्युनिष्ट बिबाजुगु देन्बा कम्युनिष्ट आताना नेमकिपा जेक्खे देन्बा कम्युनिष्ट पार्टी हिन्ना बिसि पाङ्जि ।

केन्द्रीय ह्रोम्हिजुगु सुनिल प्रजापति, डिल्ली प्रसाद काफ्ले, सरोज शाह, अनुराधा थापा मगर, श्रृजना सैंजु, मुक्ति यादव, जग्याबहादुर शाही थेन स्यान्दो केन्द्रीय ह्रोम्हिजुगुसे नोन सेमताम थान्बा मुबा ।