याम्बु । जीवन वाइबाला चोहोदानरि आदिवासी जनजाति युवा महासंघ नेपाल, बागमती प्रदेशला छार कार्यसमिति स्होबा मुला । बेने (फागुन) १५ गते ताबा ङ्हिछा प्रदेश जोम्नासे वाइबादा सर्वसम्मत दाम्बा हिन्ना ।

छार कार्यसमितिला ह्रोचोहोजुगुरि बिमला हायु, सुनिता आले मगर, सिजन शाक्य मुला बिसाम गाउराइरि सुमित्रा मोक्तान, छ्यागाउराइरि पेमा खाण्डु शेर्पा थेन पाल्देन लामा, न्होरचोहोरि  बिष्णुमाया लामा, छ्यान्होरचोहोरि मन्जु लोप्चान मुला ।

छार कार्यसमितिला ह्रोम्हिजुगुरि कृषमान तामाङ, सञ्जय मोक्तान, सन्तोष कुमार गुरुङ, माया गुरुङ, राज तामाङ मुला ।

आदिवासी जनजाति युवा महासंघ नेपाल, बागमती प्रदेशला चोहो विलाम मुक्तान सभाध्यक्षरि ताबा जोम्ना आदिवासी जनजाति उत्थान राष्ट्रिय प्रतिष्ठानला ह्रोचोहो रेशम गुरुङला ग्रेनडोन्बोरि ताबा मुबा ।

जोम्नारि विशिष्ट डोन्बोजुगुरि आदिवासी जनजाति महांघला स्यानग्रेनगाउराइ रामकृष्ण ब्लोन तामाङ, नेपाल तामाङ घेदुङला चोहो मोहनकुमार गोले, आदिवासी जनजाति उत्थान राष्ट्रिय प्रतिष्ठानला गेथोह्रोम्हि सेतेमान तामाङ, आदिवासी जनजाति युवा नेपालला ग्रेनगाउराइ किरण श्रेष्ठ, स्यानग्रेनगाउराइ राकेश गुरुङ, गाउराइ घम्ब घिसिङ (मिलन), आदिवासी जनजाति महासंघ सिन्धुपाल्चोकला गेथोचोहो फुर्वा ग्याल्बो मोक्तान, युवा महासंघ केन्द्रिय ह्रोम्हि सुप्रिया राई मुबा ।

चुह्राङ्नोन लासि जोम्नारि ल्होलो गेन्दुनजुगुला प्रतिनिधिजुगुसे बोकिन्बा मुबा । ङ्हिछा प्रदेश अधिवेशनरि बागमती प्रदेशला १३ जिल्लाला प्रतिनिधत्व मुबा बिसाम दोलखा थेन चितवन जिल्लाला प्रतिनिधि आरेमुबा ।