नेपाल तामाङ विद्यार्थी घेदुङ, नेपाल ल क्याम्पस इकाइला ङ्योइसाङरि ल्होछारफिरि काठुइ लासि सांस्कृतिक गेताङ स्हेङ्जि । गेताङ नेपाल तामाङ विद्यार्थी घेदुङ केन्द्रीय समिति थेन बागमती प्रदेश समितिला डिछ्यामरि ताबा हिन्ना ।

मन्जुश्री सम्वत २८६१ डुल (सापुख्रि) ल्होला सोनाम ल्होछारला दुइसाङरि चु गेताङ स्हेङ्बा हिन्ना । ‘ह्याङ्लान रिमठिम, ह्याङ्लान ग्योइ, ह्याङ्ला ल्होछार छार्नालाइ’ बिबा उद्घोषला छ्याम चु गेताङ ताबा मुबा ।

सफलता थिङ तामाङला आन्सार तामाङ घेदुङला संघीय ह्रोचोहो अक्कल तामाङला ग्रेनडोन्बोरि ताबा चु गेताङरि विशिष्ट डोन्बो डोन्बोजुगु नेपाल सरकारला छ्यागौराइ रुद्रसिंह तामाङ, कानुन, न्याय तथा संसदीय मामिला मन्त्रालयला शाखा अधिकृत शान्ति लामा, वरिष्ठ अधिवक्ता सुजन लोप्चन मुबा ।

स्यान्दो डोन्बोजुगुरि तामाङ स्योमि (पत्रकार) संघला वरिष्ठ ह्रोचोहो तीर्थमान बल, काइपा अर्पण थिङ तामाङ, मिस तामाङ २०२४ रिया लामा, मिस तामाङ २०२४ कन्टेस्टेन्ट मन्सु लामा,  विद्यार्थी घेदुङ केन्द्रीय समितिला इन्द्र लामा, विद्यार्थी घेदुङ वागमती प्रदेशला युवराज लामा तामाङतेन ल्होलो गेन्दुनजुगुला प्रतिनिधि थेन स्योमिजुगु मुबा ।

गेताङरि काइपा अर्पण थिङ तामाङला छ्याम स्यान्दो कलाकारकारकादेसे प्रस्तुती उन्सि मनोरन्जन पिन्बा मुबा ।