खोपोङ । नेपाल मजदुर किसान पार्टी (नेमकिपा) काँक्राबारी गाउँ कमिटि खोपोङ (भक्तपुर)से नोन तामाङला सोनाम ल्होछार दाङ्बा मुला । मन्जुश्री सम्वत २८६१ ला डुल (सापुख्रि) ल्होला दुइसाङरि चु गेताङ स्होबा हिन्ना । छ्यामरि, पार्टीला ५१ छा पार्टी स्थापना दिवस नोन तेन्बा मुबा ।

नेमकिपा भक्तपुर जिल्लाला ह्रोचोहो न्हुँछेँभक्त फोँजुला ग्रेनडोन्बारि चु गेताङ ख्रेला (माघ) २७ गते कुनु ताबा हिन्ना । ग्रेनडोन्बो फोँजुसे चु ल्होछारला दुइसाङरि मुतेबा तामाङ समुदाय ओम ह्युल थेन फिरग्याप ह्युलरि मुबा नेपालीजुगुसे शान्ति थेन समृद्धि याङ्गाइ बिसि पार्टीला तर्फग्याम ज्याबाम्हान्बा पिन्बा मुबा ।

ग्रेनडोन्बो फोँजुसे ल्होछारदा तामाङला जेक्खे प्रिबा आस्होना ह्युललान प्रिबा स्होतोबारि राज्यसे लेबाफेबा लाबा सेमतेन थान्जि । गेताङरि थेसे नेमकिपाला स्थापना २०३१ दिङला ख्रेला १० कुनु ताबा ओम स्हेङ्बा दुइहेन्से चु पार्टीसे माक्र्सवाद, लेखिनवाद थेन माओविचारधारला ग्यामदा आख्लाना ब्राचिबा मुला बिसि पाङ्जि । ‘वि.सं. २००६ दिङरि पुष्पलालला नेतृत्वरि कम्युनिष्ट पार्टी स्हेङ्साइ चु नेतृत्वला पार्टी लिच्छा निसि संशोधनवादला ग्याम चुङ्सि भारतीय विस्तारवादला फ्याङ्गुलिङ दोजि ।’ थेसे पाङ्जि, ‘नेपालरि देन्बा कम्युनिष्ट आन्दोलनदा सोना लाथान्बारि चुलिच्छा नेपाल मजदुर किसान पार्टी ठ्वाङ्बा हिन्ना ।’

गेताङरि सूर्यविनायक नगर समितिला चोहो सूर्यभक्त त्वातीसे ल्होछारला ज्याबाम्हान्बा पिन्बा मुबा । नगरपालिकाजुगुसे ह्राङ्ह्राङ्ला थुमला ल्होलो ह्युल्बाजुगुला रिमठिम थेन प्रिबा सोना लासि थान्बारि न्होरह्रो लातोबा सेमतेन थान्जि । थेसे नेमकिपाला राष्ट्रिय महाधिवेशन बेने (फागुन) १६हेन्से १९ गतेदोना खोपोङरि तासेला ग्रा पिन्बान गेताङरि मोक्कोन जातला ह्युल्बासे ह्राङ्ह्राङ्ला गोइलोरि बोकिन्बारि म्होइजेन लाजि ।

गेताङरि नेमकिपा सूर्यविनायक नगर समितिला गौराइ महेन्द्र बखुन्छेँ, काँक्राबारी गाउँ कमिटिला ह्रोचोहो जितबहादुर तामाङसे नोन ल्होछारला ज्याबाम्हान्बा फुल्बान नेमकिपासे ह्युल्बाला मुक्तिला लागि गे लाबासे लामा क्योङ्दान चु पार्टीरि आबद्ध ताबारि आव्हान लाजि ।

गेताङरि काँक्राबारी गाउँ कमिटिला गौराइ बुद्ध लामासे सोनाम ल्होछार थेन पार्टी स्थापना दिवसला दुइसाङरि ज्याबाम्हान्बा फुल्बान समाजवादी डिछ्यारि जेक्खे मोक्कोन जात, जाति, धर्म थेन वर्गसे च्योच्यो अवसर याङ्ला बिसि पाङ्जि । थेसे ङ्हाच्छा पाङजि, ‘पुँजीवादी डिछ्याला लिब्रो समाजवादी क्रान्ति आलातेदोना ह्याङ्ला ह्युलरि रोजगारला बन्दोबस्त आता । सातान म्हिला ह्युलरि गे म्हाइबारि नितोसेला मुला ।’

गेताङरि हास्यकलाकार केशब तामाङसे नोन ल्होछारला ज्याबाम्बान्बा पिन्बा मुला । गेताङ नेमकिपा काँक्राबारी गाउँ कमिटला चोहो प्रेम तामाङला चोहोदानरि ताबा मुबा ।