काभ्रे । सभ्य रिमठिम तामाङ युवा समाज, धुलिखेल– २, थिङनाम्साला ङ्योइसाङरि ख्रेला (माघ) २६ गतेकुनु सोनाम ल्होछार दाङ्जि । ‘ह्याङ्ला रिमठिम, ह्याङ्ला ङोसेबा, तामाङ रिमठिमदा सोना लाइ’ बिबा उद्घोषला छ्याम गेताङ स्हेङ्बा मुबा ।

ङ्हाच्छाला लोन्पो ओम बागमती प्रदेशसभा ह्रोम्हि तीर्थ लामाला ग्रेनडोन्बोरि गेताङ ताबा मुबा । ग्रेनडोन्बो लामासे गेताङरि तामाङजुगुसे ल्होछार प्रिबा ग्रेनलिरि तेन्तोबा सेमताम थान्बान नेपाल ह्राङ्बा ल्हाना जातीय, ल्हाना धार्मिक, ल्हाना ग्योइ थेन ल्हाना रिमठिम मुबा ह्युलरि ल्होछार प्रिबासे आउदिन महत्व थान्बा बिसि पाङ्जि ।

विशिष्ट अतिथि धुलिखेल नगरपालिकाला उपमेयर निराजन जंगमसे ल्होलो जातला चुह्राङ्बा प्रिबासे नेपालीदा गिक्खे लाथान्बासे ह्रो तासेला सेमतेन थान्जि ।

रोशी गाउँपालिकाला चोहो दिनेश लामासे एकात्मक राज्य डिछ्यासे तिल्मा दुल्बासे ल्होलो जातला ह्राङ तामाङजुगुला प्रिबाजुगुनोन म्हासि निबा ताम थान्जि । बहुदलीय डिछ्याम खाबाहेन्से ल्होछारसे ल्हे म्याङ्बा हिन्ना बिबान थेसे ल्होछारदा राष्ट्रिय प्रिबाला लिरि दाङ्बारि म्होइजेन लाजि ।

धुलिखेन न.पा. १ ला वडाचोहो सन्तबहादुर लामासे ठिम थेन रिमठिम सोमा जेक्खे ह्युल चिला बिबान तामाङजुगुला माउलिक रिमठिम सोना लाबारि चुह्राङ्बा गेजुगु महत्वपुर्ण तासेला सेमताम थान्जि ।

विशेष डोन्बो नेपाली काँग्रेसला भातृ संगठन नेपाल तामाङ संघला केन्द्रीय ह्रोम्हि विलाम मोक्तानसे ल्होछार ह्राङ्बा सांस्कृतिक छोरुवासे स्थानीय जेक्खे आताना राष्ट्रिय छोरुवा बाबारि ह्रालासेला ताम थान्जि । छ्यामरि थेसे निजामति सेवारि ल्हेसिकेन निबा तामाङ समुदाय चुबिमा ङ्हाच्छा वाङ्बारि म्होइजेन लाजि ।

गेताङ युवा समाजला चोहो विशाल तामाङ (पुजन)ला चोहोदानरि ताबा मुबा । थेसे गेताङ सफल ताना लाबारि ह्रोलाबा मुतेबादा जुछेजे फुल्जि । छ्यामरि खाबा दिङजुगुरि चुह्राङ्बा गेताङ निरन्तर लासेला प्रतिबद्धता उन्जि ।

सांस्कृतिक गेताङला छ्याम ताबा चु गेताङरि उर्गेन दोङ, सुशील लामा, रञ्जित तामाङ, कुसुम मगर, हिरा बहादुर तामाङ, युद्ध तामाङ, सागर बोम्जन, अनिशा तामाङ, सम्राट वाइवा, टुशाल लामातेन स्यान्दो कलाकारजुगुसे प्रस्तुती पिन्बा मुबा ।