सामुदायिक लोप्खाङ वागीश्वरीसे तेन्जि वार्षिक उत्सव

खोपोङ । नेमकिपाला चोहो नारायणमान बिजुक्छे (रोहित)ला ग्रेनडोन्बोरि वागीश्वरी माविला ६६ छा ओम वागीश्वरी कलेजला १७ छा थेन वागीश्वरी कलेज अफ म्यानेजमेन्टला ङ्हि दिङ वार्षिकोत्सव गेताङ ख्रेला (माघ) २४ गते नारे कुनु तेन्जि ।
गेताङला ठ्वाङ्सेन लासि चोहो बिजुक्छेसे ख्वप विश्वविद्यालय सञ्चालन स्वीकृति पिन्बा नुररि सरकार सकारात्मक आम्रङ्बा गुनासो लाबान सक्षम स्थानीय तहदा ख्वप विश्वविद्यालय सञ्चालन लाबरि पिन्तोबा ताम थान्जि ।
‘नगरपालिकासे ख्वप विश्वविद्यालय सञ्चालन लाबारि आहाम बिबा सोच खोटपूर्ण मुला’ बिजुक्छेसे पाङ्जि, ‘खोपोङला ह्युल्बाकादे चु विश्वविद्यालय संचालन लाबारि सक्षम मुला ।’
बिजुक्छेसे नेपालरि गणतन्त्र हासाइनोन गणतन्त्र लिब्रोकादे तिन्हाङ्गार सक्रिय ताबा कारण सत्ताधारीजुगुला अदुरदर्शी दृष्टिकोण हिन्ना बिसि पाङ्जि ।
गेताङ्ला सभापति वागीश्वरी कलेज व्यवस्थापन समितिला चोहो ओम खोपोङ नगरपालिकाला मेयर सुनिल प्रजापतिसे वागीश्वरी लोप्खाङ गुणस्तर सुनिश्चितता थेन प्रत्यायनला प्रमाणस्यो (क्युएए) याङ्बा खोपोङ जिल्लाला गिक्छा सामुदायिक लोप्खाङ हिन्ना बिबान चुरि छारछार नुर डोबा थेन अध्यापनला लागिरि देबाः तानागि गेलाबा ताम थान्जि ।
मेयर प्रजापतिसे वागीश्वरी कलेजसे फिरग्याप ह्युल्ला ओम संघ थेन प्रदेशला ह्रो आरेसाइ ह्राङ्लान पाङलोपरी (बलबुत्ता) शैक्षिक विकास लाजिबा मुला बिसि पाङ्जि ।
वागमती प्रदेशसभा ह्रोम्हि ओसेम नेमकिपाला नेता सुरेन्द्रराज गोसाइँसे छारपुस्तादा ग्योइ, ग्योइकाइ, रिमठिम थेन प्राविधिक लिरि दक्ष स्होबारि स्थानीय सरकारदा जिम्मेवार थेन याङ्ताम सम्पन्न स्होसि शैक्षिक थुम संचालन लाबा जिम्मा पिन्तोबा ताम थान्जि ।

गेताङरि खोपोङ नगरपालिकाला उपप्रमुख रजनी जोशीसे वागीश्वरी लोप्खाङ्से समाज थेन ह्युल्दा ज्याबा ग्यालम ओन्जिबा मुला बिबान खोपोङ नगरपालिकासे ग्युइसेर (शिक्षा)ला थुमिरि ख्वप विश्वविद्यालय सञ्चालन लासि दीर्घकालीन उद्देश्यला छ्याम ङ्हाच्छ वाङ्बा गे लाचिबा ताम थान्जि ।
गेताङरि वागीश्वरी मावि व्यवस्थापन समितिला चोहो रवीन्द्र ज्याख्वसे गोर्किन छानोदिरि गोर्सोम शैक्षिक गेन्दुन सञ्चालन लासि वागीश्वरी सामूहिक नेतृत्वरी विश्वास लाबा गेन्दुन दोबा मुला बिसि पाङ्जि ।
चोहो ज्याख्वसे गोनाम वर्गला जा जामेदा गुणस्तरीय ग्युइसेर पिन्बा उद्देश्यसे ठ्वाङ्बा सामुदायिक लोप्खाङथोरि सरकारला दृष्टिकोण खोटपूर्ण मुबा गुनासो थान्जि ।
गेताङरि नेपाल क्रान्तिकारी विद्यार्थी संघला केन्द्रीय न्होरचोहो चक्रबहादुर चाकतु, राष्ट्रिय परीक्षा बोर्डला चोहो डा. महाश्रम शर्मा, वागीश्वरी माविला प्राचार्य कृष्णप्रसाद कर्माचार्य, वागीश्वरी कलेज अफ म्यानेजमेन्टला प्राचार्य धनकुमार श्रेष्ठसेनोन ह्राङ्ह्राङला सेमतेन थान्मुबा ।
ज्ञानेन्द्र श्रेष्ठला संयोजकत्वरि ताबा चु गेताङरि वागीश्वरी पूर्व विद्यार्थी समाजला रत्नप्रसाद प्रजापति, मनोज कटुवा, सगुन धन्छा, काजल थापासे ज्याबाम्हान्बा फुल्बा मुबा ।
गेताङरि ग्रेनडोन्बो बिजुक्छेसे वागीश्वरी स्मारिका छ्योइ विमोचन लाबाला छ्याम लोप्खेन थेन लोप्बोनकादेदा पुरस्कार, छात्रवृत्ति थेन डेन लाबा मुबा ।
(तासोर ब्रिबा राजु तामाङ ङ्हाच्छाला लोप्बोन थेन बागीश्वरीला लाेप्खेन हिन्ना ।)
तपाईको प्रतिक्रिया दिनुहोस