मकवानपुर । मनहरी गाउँपालिका वडा नं. २, ठाडोखोला, मकवानपुररि बेने (फागुन) २ गते सोनाम ल्होछारला दुइसाङरि ग्रेन ल्होछार सांस्कृतिक गेताङ स्हेङ्बा मुला । गेताङ ठाडोखोलाला त्रिरत्न प्राविला ख्राङ्गारि तासेला मुला । चुपाल्छेला ल्हो मन्जुश्री सम्वत २८६१ डुल (सापुख्रि) हिन्ना ।

खेलकुद विकास समिति मनहरी २ ला ङ्योइसाङरि मनहरी गाउँपालिकाला मुख्य ह्रोरि ओम मनहरी वडा नं. २ ला संरक्षण थेन ह्रोरि चु गेताङ लाइ लाबा हिन्ना ।

मनहरी वडा नं. २ ला वडाचोहो राजकुमार पाख्रिनला आन्सार गेताङरि ज्याबाम्हान्बा किन्बापिन्बा थेन डेन लासेला मुला । तामाङ खेन्पोजुगुग्याम रिमठिमला जानकारी पिन्बाला छ्याम तामाङ तोसोला गोइलो थेन प्रस्तुतीजुगु उन्सेला मुला ।

गेताङ संयोजक सन्देश थिङला आन्सार गेताङरि तोङ्जा ङ्हा च्याखेनजुगुसे च्यासेला मुला बिसाम ५ लाख खर्च तासेला अनुमान मुला ।

गेताङरि चर्चितक कलाकारजुगु विश्व दोङ, जितु लोप्चन, धिरेन लामातेन स्यान्दो कलाकारजुगुसे मनोरन्जन पिन्सेला मुला ।  

गेताङफिरि ग्रा (सूचना) पिन्बारि स्हेङ्बा स्योमि (पत्रकार) जोम्ना गेताङ संयोजक सन्देश थिङला चोहोदान थेन २ नं. वडाचोहो राजकुमार पाख्रिनला ग्रेनडोन्बोरि ताबा मुबा ।

स्योमि जोम्नारि नेकपा माओवादी केन्द्र मनहरी २ ला इन्चार्ज चन्द्रबहादुर स्याङ्तान, मनहरी २ ला वडाह्रोम्हि शुक्राम मोक्तान, खेलकुद विकास समिति मनहरी २ ह्रोम्हि ईन्द्रदेब वाइबा, तामाङ पत्रकार संघ बागमती प्रदेशला चोहो ज्ञानेन्द्र तामाङ, जिल्ला चोहो जयराम मुक्तान, रिपोर्टस क्लब मकवानपुरला चोहा बलाराम पुडासैनी, सन्चारिका समुह मकवानपुरला चोहो निशा गुरुङ, फोनिज मकवानपुरला गौराइ मनिता राना, तामाङ पत्रकार संघ मकवानपुरला गौराइ भुवन घलानतेन स्यान्दो सरोकारवालाजुगुसे बोकिन्बा मुबा ।