तामाङ बौद्ध सेवा समिति पोखरासे सोनाम ल्होछार दाङ्जि

तामाङ बौद्ध सेवा समिति पोखरासे मन्जुश्री सम्वत २८६१ डुल (सापुख्रि) ल्होला सोनाम ल्होछार ख्रेला (माघ) १९ कुनु भव्य लिरि दाङ्जि ।
गेताङ गण्डकी प्रदेश प्रमुख डिल्लीराज भट्टला ग्रेनडोन्बोरि ताबा मुबा । गेताङरि प्रदेश प्रमुख भट्टसे सोनाम ल्होछार प्रिबासे मोक्कोन नेपाली गुङ्ला एकतादा ज्याना लासि सुदृढ लासि आर्थिक थेन सामाजिक लिसे समृद्ध ह्युल स्होबाला लागि ङ्हाच्छा वाङ्बारि क्योङ्दा उर्जा पिन्गाइ बिसि ज्याबाम्हान्बा फुल्बा मुबा ।
प्रदेश प्रमुख भट्टसे ह्याङ्से छारपुस्तादा ह्राङ्ला रिमठिम थेन धर्म पुस्तान्तरण लातोबा तामरि बाङपिन्जि । थेसे बिजि, ‘ग्योइ, रिमठिम, गोइलो थेन ठिम ह्राङ्ह्राङ्ला जातला ङोसेबा थेन माउलिक सभ्यताला देन (आधार) हिन्ना । चुदा छार्ना, ल्हेना लासि छार पुस्तादा पिन्तोबा ह्याङ्ला दायित्व हिन्ना ।’
गेताङरि विशेष डोन्बो प्रतिनिधिसभा सांसद मानबहादुर गुरुङ, तामाङ घेदुङला संघीय ह्रोचोहो दीपक तामाङ, घेदुङ कास्कीला चोहो भक्त योन्जनतेन स्यान्दो डोन्बोजुगुसे ज्याबाम्हान्बा फुल्बा मुबा ।
तपाईको प्रतिक्रिया दिनुहोस