मञ्जुश्री संवत् २८६१ सा पुख्रि (डुल) ल्होला सोनाम ल्होछारला दुइसाङरि दक्षिण कोरियारि मुबा तामाङ थेन नेपालीजुगुसे ‘ग्रेन सांस्कृतिक गेताङ २०२५’ स्हेङ्सि दाङ्जि । ल्होछार दुइसाङरि दक्षिण कोरियाला ल्होलो गोर ङ्हा सहरजुगु राजधानीला सउल, ङ्हीछा ग्रेन सहर बुसान, मोक्पो, गजेदो थेन जेजुदोरि ग्रेन सांस्कृतिक गेताङ स्हेङ्बा मुबा ।

नेपाल तामाङ घेदुङ दक्षिण कोरियाला ङ्योइसाङरि चु गेताङजुगु ताबा हिन्ना । नेपाल सउल गुम्बाला लामा गुरुजुगुग्याम सामुहिक मंगल छ्योकु लासि ल्होछार तिमुबा । छ्योकुलिच्छा सउलला गेताङ ग्रेनडोन्बा, डोन्बोजुगुसे औपचारिक लिरि ठ्वाङ्सेन लाबा मुबा ।

गेताङरि ताम्बा धावा वाङ्गेल मोक्तानसे साङसेरकेम ह्वाइ कोबा मुबा बिसाम शुभराज भोम्जन, अमिर योञ्जन, निर योञ्जन, दावाफिन्जो योञ्जनतेन स्यान्दोसे ह्राङ्ह्राङ्ला प्रस्तुती थान्बा मुबा । सउलला एचडब्लु कन्भेन्सन सेन्टररि जनवरी २८ रि ङ्यासे साढे ३ ङ्ह्यामा हेन्से म्हुना १२ ङ्ह्यादे दोना ताबा सांस्कृतिक प्रस्तुतीजुगुसे फिरग्याप ह्युलरि चिबा ल्होछारचेमोजुगुरि रौनकतासे न्हान्बा मुबा । स्योमि अमिर योञ्जनसे तामाङ ग्योइ थेन नेपाली ग्योइरि व्हाइखा डोबा मुबा ।

नेपाल तामाङ घेदुङ दक्षिण कोरियाला चोहा राजकुमार स्याङ्तान तामाङला चोहोदानरि ताबा चु गेताङरि नेपाली राजदुतबासला महामहिम राजदूत डा. शिवमाया तुम्वाहाम्फे ग्रेनडोन्बो मुबा । स्यान्दो डोन्बोजुगुरि एनआरएनए दक्षिण कोरियाला चोहो विपिन गुरुङ, नेपाल आदिवासी जनजाति महासङ्घ दक्षिण कोरियाला चोहो विशन राई, एनसिसी दक्षिण कोरियाला चोहो हरिप्रसाद खनाल, नेपाल तामाङ घेदुङ ख्याङ्सङ बुसान शाखा दक्षिण कोरियाला चोहो सोम योञ्जन तामाङ, नेपाल तामाङ घेदुङ दक्षिण कोरिया शाखा जेजुदोला चोहो सुनिता ब्लोनला छ्याम स्यान्दो गेन्दुनजुगुला चोहो थेन प्रतिनिधिजुगु मुबा ।

गेताङरि ग्रेनडोन्बो राजदूत तुम्बाहाम्फेसे ह्याङ्से ह्राङ्ला ग्योइ, धर्म, रिम, रिमठिमदा सोना लासि छार पुस्तादा पिन्बारि लाबा चु गेताङसे ग्रेन महत्व थान्बा मुला बिसि पाङ्जि ।

चु सांस्कृतिक गेताङरि रेबा न्होर ‘दीघकालीन शैक्षिक कल्याणकारी कोष’रि ह्रोलाबारि ङ्योइसाङ लाबा ताम घेदुङ कोरया, केन्द्र सउलला चोहो राजकुमार स्याङ्तानसे पाङ्जि ।  

चुह्राङ्नोन लासि मोक्पो सम्हो साझा चौतारीसे जनवरी २६ रि मोक्पोरि गिक्खे लि (संयुक्त रूप)रि तमु ल्होसार, सोनाम ल्होछार थेन ग्याल्पो लोसार दाङ्बा मुबा । गिक्खे लिरि दाङ्बा चु गिक्छा रेम हिन्ना । हान्वा ओसन तामाङ समाज गजेदोसे नोन कलाकारजुगुला छ्याम ग्रेन संस्कृतिक गेताङ स्होसि ल्होछार गेताङ दाङ्बा मुबा । थेरि काइपा÷संगीतकार छेटुप मोक्तान, रवि लामा थेन गिक्खे लिरि डम्फुरेजुगुसे संस्कृतिक प्रस्तुती लाबा मुबा ।

नेपाल तामाङ घेदुङ ख्याङ्सङ बुसान शाखा दक्षिण कोरियासे जनवरी २९ रि ग्रेन सांस्कृतिक गेताङ लासि ल्होछार तेन्बा मुबा । गेताङ गिक्खे लिरि डम्फु ह्राप्सि तिबा मुबा । बुसानला चोहो सोम योञ्जन तामाङला चोहोदानरि ताबा मुबा । गेताङला ग्रेनडोन्बोरि घेदुङ केन्द्र सउलला चोहो राजकुमार स्याङ्तान मुबा ।

चुह्राङ्नोन लासि नेपाल तामाङ घेदुङ दक्षिण कोरिया शाखा जेजुदोला ङ्योइसाङरि जनवरी ३० रि ग्रेनलिरि सोनाम ल्होछार दाङ्बा मुबा । मौलिक प्रस्तुति, ख्याति प्राप्त कलाकारजुगुला साङ्गीतिक प्रस्तुति थेन स्याबा उन्बासे  ल्होछारचेमोजुगुरि आउदिन मनोरन्जन ताबा मुबा । जेजुदोला चोहो सुनिता ब्लोनला चोहोदानरि ताबा गेताङरि घेदुङ केन्द्र सउलका गौराइ निर योञ्जन ग्रैनडोन्बो मुबा । 

सउल, बुसान, जेजुदोला ल्होछार गेताङला लागि नेपाल ग्याम ङ्योइबा संगीतकार/काइपा विश्व दोङ, काइपाजुगु आस्मान लोप्चन, सुरेश लामासे साङ्गीतिक प्रस्तुति पिन्सि बोकिन्बाजुगुदा मनोरन्जन पिन्बा मुबा ।

छ्यामरि स्थानीय कलाकारजुगु काइमो रिचा ब्लोन, काइपा आशिष मोक्तान, काइपा करप रुम्बा, काइपा सन्जीब लामा गोले, स्याबाजुगुरि प्रतिज्ञा लामा, सरस्वती तामाङ, सन्नी थापा, डोमा योञ्जन, अन्जली तामाङ, सरलिन तामाङ थेन सुनिता तामाङ, र्यापर दोर्जे ज्योज्योला साङ्गीतिक प्रस्तुतिसे ल्होछारचेमोजुगु ताङ्सि स्याबा मुबा ।

ङ्हाउरि बिमा २८६१ सोनाम ल्होछारला रौनकता ग्रेन लिरि कोरियारि ल्हेबा मुबा ।

फोटोः अमिर/विमल