ललितपुरला बागमती गाउँपालिका वडा नम्बर ४, प्युटार खयरघारी क्षेत्रीय क्लङ चेरि वडा स्तरीय वडाचोहो फुटबल कप प्रतियोगिता ताजि । माघ ५ गते कामरेकुनुहेन्से सोमबारदोना ताबा चु प्रतियोगिता बागमती गाउँपालिका वडा नं. ४ थेन सह आयोजक छोर्गे युवा क्लबला समन्वयरि ताबा हिन्ना । प्रतियोगितारि वडा न्हाङ्ला गोर डु टिमसे बोकिन्बा मुबा । प्रतियोगितारि प्युटार फुटबल टिम ए थेन बि, सिम्ले फुटबल टिम, देउराली फुटबल टिम, खैरेनी फुटबल टिम, खयरघारी फुटबल टिमसे बोकिन्मुबा ।
स्वास्थ्यला लागि क्लाङ्छ्योङ ह्युलला लागि क्लाङ्छ्योङ बिबा मुल नाराला छ्याम तिबा क्लाङ्दा वडा नं. ४ प्युटारसे न्होर ह्रो लाबा मुबा । प्रतियोगितारि खैरेनी फुटबल टिम गिक्छा, खयरघारी फुटबल टिम ङ्हिछा, देउराली फुटबल टिम सोमछा ताबा मुला । गिक्छा ताबादा २५ हजार, ङ्हिछा ताबादा १५ हजार थेन सोमछा ताबादा ७ हजार ५ सय रुपैयाँ न्होरला छ्याम कप, मेड, प्रमाणस्यो पिन्बा मुबा । प्रतियोगितारि आषिश बोम्जनदा उत्कृष्ट गोलरक्षक घोषणा लाबा मुबा ।
डाबाजुगुदा ग्रेनडोन्बो बागमती गाउँपालिकाला प्रमुख वीरबहादुर लोप्चन, विशेष डोन्बो नेपाली कांग्रेसला ङ्हाच्छाला केन्द्रीय ह्रोम्हि केवलबहादुर लामा, गाउँपालिकाला ह्रोचोहो भक्तबहादुर दर्लामी मगरसे गिक्खे लिरि न्होर, प्रमाणस्यो थेन ट्रफी पिन्बा मुबा ।
गेताङला स्यान्दो डोन्बोजुगुरि रकेश बल, मिना थापा विक, सुनमाया लामा, रोमप्रसाद दाहाल, आश्राङ प्रहरी चौकी इन्चार्ज विष्णु स्याङ्तान, रेफ्री यमबहादुर सुनुवार, ङ्हाच्छाला वडाचोहो नारायणबहादुर घले, दीपक घिमिरे मुबा ।
बागमती गाउँपालिका थेन वडा नं ४ ला वडाचोहो रामकुमार लामाला विषेश ह्रोरि वडाचोहो कप फुटबल गेताङ सफल ताबा हिन्ना ।
वडाचोहो कप छोर्गे युवा क्लवला चोहो कृष्णबहादुर घलानला चोहोदानरि ताबा मुबा ।
तपाईको प्रतिक्रिया दिनुहोस