तिर्याम दोसि
पोप्सेला मुला ह्याङ
ग्रेन सभाजोम्नारि
भाडाला भिडला गुङरि ।

तिर्याम दोसि
इज्जतिला म्हान्बा
गाङसाल थाबा ब्लाउज क्वान्बा म्रिङकोलाजुगु
लासेला मुला ह्याङला जुलुसला नेतृत्व
ओम ह्याङला प्रतिनिधित्व लाबा बिसि
डाजाङरि चिसेला मुला ङ्हाच्छा ।

तिर्याम दोसि
याखारगि ग्रेन ब्यानारदिरिक्यार
डाजाङरि रेन्बा माइकरि क्रिङसेला मुला
ब्यवस्थाला लिब्रोरि
ओम ह्याङला तालि पोप्सि
या थिसि भ्रमित ताना लासेला मुला
थेनि बिबान ह्याङ हिन्ना बिसि ।

तिर्याम दोसि
छिगजुगुला बायुपङखि रथरि थान्सि
थेन्से बोर्सेला मुला ह्याङदा संसदला कोठाचोटारि कोर्बारि
थेरि ह्रेमकोलाजुगुला अहमतेन छेसेला मुला ह्याङला मुद्धाजुगु
ओम चकनाचुर तासेला मुला
थेरि मुबा ह्याङला म्हाङजुगु ।

तिर्याम दोसि
ह्याङला सभादा सम्बोधन लासेला मुला
माननिय मुख्यमन्त्रिसे
ओम ह्याङ गौरबन्वित तासेला मुला ह्राङप्रति
ह्याङला सभारि थेला उपस्थिति याङसि ।

तिर्याम दोसि
बहसला खरो ज्वालारि मिन्सेला मुला नपुंसक बिचार
ओम किन्छेला मुला
दाइजो, हत्या, बलात्कार, यौन उत्पिडन
बेस्याबृद्धिला लिब्रोरि मोर्चाबन्दि लासि छेबा सङकल्प ।

तिर्याम दोसि
ह्राङला बाङला सामुहिक प्रदर्सन लाबान
ब्रासेला मुला ह्याङ सहरला ग्यालामजुगुरि,
पुरुस सत्ताला लिब्रोरि
लाबारि मुठि खिसि, या ह्योङसिकेन
ओम ह्याङला उत्तेजक नाराला लेप्पासे
लेपसेला मुला सहरला लाबा ।

तिर्याम दोसि
झुन्डगि तासि ह्याङसे उत्तेजक नारा ल्हागाब लाचिबा
सहरला ब्यस्त चोकरि
क्यार्सेरिक्यारला डेङरि फ्लाकथान्बा पोस्टरजुगुग्याम
ब्रा थेन पेन्टि जेक्खे क्वान्बा सिने अभिनेत्रिजुगुसे
पेबा पचप लासि नायकला पाखुरारि लिपख्वाइसि
या पापा ह्योङसि ब्रेसेला मुला ह्याङदा ।

गोलेसे सिम्बारि चुसेला मुला न्हाङला मे
ओम तिर्याम दोसि
तिरबितर तासेला मुला ह्याङ चोकग्याम्से
ह्राङ ह्राङला फा थेन जातुकुजुगुला
अफिस थेन स्कुलग्याम दोबा दुइ ताजिन्जि बिबा चिन्ता थोसि । 
(ह्वाइखा ब्रिखेनसे चु ह्वाइखा नारि दिबसला गेताङला लागि निम्तोपत्र याङमाहेन्से ब्रिबा बिसि पाङमुला ।)

दोःबा : यकिना अगाध