तिरे ङ्यासेरिक्यार याम्बुला बागबजाररि छम गुरुङ ह्रो थेन ङा कोरोरो तासि ब्राटिमुबा । थेनोन दुइरि ग्यामरि ह्वाइखाब्रिखेन ज्योज्यो डा. निरज भट्टराईदा ह्रुप ताजि । बागबजारला ‘रत्न पुस्तक भण्डार’रि निबा ग्यामला गुल्जेतेरिन । ज्योज्योतेन गोर्गि ह्रो नोन मुबा ।

ह्रुप ताबाइतेन निरज ज्योज्योसे ङाङ्हिदा तिक्खुरिन हाप ख्वाइजि । यारि या बाजि । ङाङ्हिसे तिलाइ आबिजिमा नोन ङानि ङ्हिदा उन्बान ज्योज्योसे ज्योज्योतेन खाबा ह्रोपाट्टि दोसि सुङ्जि, ‘चु आले ङ्हिचा ह्वाइखा ब्रिखेन आलेकादे । ज्याबा ज्याबा ह्वाइखा ब्रिमुला । चु आलेचा छम गुरुङ । थे आलेचा ईश्वर थोकर ।’

ओते बिसि निरज ज्योज्योसे दाबे ङानि ङ्हिदा हाप ख्वाइजि ।

निरज ज्योज्योदा ज्यागोन दुइ लिच्छा ह्रुप तामुबा, ङानि ङ्हिसे । थाआयाङ्ना ज्योज्योदा ह्रुप ताम्याङ्मा ङानि ङ्हि नोन फुरताङ्जि । ङानि ङ्हि कादे ताङ्जि ओते नोन ज्योज्यो नोन ताङ्जि ।

जामा दुइरि गुरुङ ह्रो थेन ङादा ग्योइकाइ थुमला गोर्गि हल (जोडी) बिसि ङोसेमुबा । दात्ते नोन ङोसेमुला, ओराङ्नोन लासि । खाज्युबाइ ग्योइकाइ गेताङरि क्यार तिलाइ लासि ङानि ङ्हिमा गिदा छ्याम आम्राङ्साम छाङ्मासेन ङ्योइमुबा, ‘एला हल गि खाइ ?’

गुरुङ ह्रो थेन ङा ओराङ्बा मुबा ।

तिलाइ दुइ लिच्छा निरज ज्योज्योसे ङानि ङ्हिदा प्लिक च्यासि पाङ्जि, ‘खाइमा खाइमाहेन्छे तिनि ह्रुप तामुला । एनि ङ्हिला ह्वाइखा आङ्यान्नाइ ज्यागोन दुइ ताजिन्जिम । ब्राउ, ग्लागिरि टिसि ल्हेङ्मो लाइ ।’

ङानि ङिह्दा ताङ्बा खाजि ।

निरज ज्योज्यो ङ्हाच्छा ङ्हाच्छा, ङानि सोम लिच्छा लिच्छा ब्राजि । ज्योज्योला मे दोसि । ज्योज्योसे ङानि सोमदा ‘रत्न पुस्तक भण्डार’ ङाम्तेलान गोर्गि होटलरि बोर्जि ।

खाङ्बा ला मुबा । खाङ्सि ल्होकल्होक दार्तोबा दुइ । थेलाफिरि ङ्यासेला सिल्बा स्याँट । ङापाट्टि दोसि निरज ज्योज्योसे ङ्योइजि, ‘तिला चाइ ईश्वर ?’

‘चिया, आता ज्योज्यो ?’ ज्योज्योपाट्टि दोसि ङाइ बिजि ।

निरज ज्योज्योसे तिरेम गुरुङ ह्रोदा प्लिक च्याजि, दोसि ङादा च्याजि ओराङ नोन लासि । ज्योज्योसे लिच्छा सुङ्जि, ‘चु खाङ्बारि चियासे ह्याङ्ला खाङ्बा आताप । आइराक थुङ्गेले ह्वाक लेप्नागि, आता ? थोङस्यातेन ?’

ज्योज्योसे ओराङ बिबा दुइरि गुरुङ ह्रोसे ङादा तिरेम प्लिक च्याजि । ङाइ नोन गुरुङ ह्रोदा तिरेम प्लिक च्याजि, गुरुङ ह्रोसे ह्राङ लासिन । ङानि ङ्हिला मि छेजि । गुरुङ ह्रोला मिसे ङादा बिबाह्राङ छोर्जि, ‘ईश्वर ह्रो, ताला थुङ्गेलोम ?’

ङाला मिसे नोन बिजि, ‘ताला थुङ्गेलोम ।’

तिलाइ दुइ लिच्छा थोङस्या थेन आइराक ङानि टिबा टेबलरि दोकाजि । थे आइराकदा ‘रम’ बिबा टिम । रम थेन छ्याम थोङस्याला ब्रोइ थाआयाङ्जिमा नोन ङा ङ्ह्योइसि फिङ क्युर्जि, थेर्ला थेरिन । गुरुङ ह्रोए नोन ङाह्राङ लासिन फिङ क्युर्बा म्राङ्जि ।

थेनोन दुइरि निरज ज्योज्योसे ह्वाइखा ङ्यान्बा सेम लाजि । ज्योज्योला ह्रो नोन ङानि ङ्हिला ह्वाइखा ङ्यान्बारि आत्तुरि मुबा । थामथोमरि ङानि ङ्हिसे ह्वाइखा बिसि तिला डोजि, डोजि । दात्ते थायाङ्बारि आखाम्नि ।

फेलाबा दुइरि निरज ज्योज्योसे सुङ्जि, ‘आले ङ्हिला ह्वाइखाकादे आउदिन छुक निबाला मुला, सेम निजि ङादा ।’

ओराङ्लासि ङाइ आइराक थुङ्बा जामान गिक्छारेम मुबा ।

दिमरि आमासे थान्बा बाप सुत्ताइ ङाइ आम्ह्याङ्मुबा, जात्तुकुहेन्छेन । म्ह्याङ्बा सेम नोन आताबा मुबा ।

आइराकलाम झन ताम नोन आलाइ । आमासे खालाइ ङेङ्गोरजुगु दिमरि दोकामा ङादा उन्सि रेमरेम पाङ्मुबा ओजा ङेङ्गोरजुगुदा, ‘ङाला चु थेबा जादा जि/आइराकमि तिला बापला सुत्ताइ आतोमुला ।’

म्हुन चिप्सिकेन निबान मुबा । बसग्यामसे फाप्सि ङा डेरारि निबान मुबा । जामा दुइरि आले उमेश (ङाला आले च्याङ्बा) ङातेन छ्याम म्हेर्मुबा, तिसागिरिन । जात्तुकुहेन्छेन । ग्याम गुङरि ङाइ सेमन्हाङ न्हाङरिन म्हान्जि, ‘ङा ङ्ह्योइबा बिसि आपाआमा थेन आलेआङासे थाहा याङ्साम ङादा साइला । दात्तेला दात्तेन डेराग्यामसे तेसि पुइला ।’

ङादा लोङ्बा खाजि ।

ओतेबान दुइरि आपाला फोन खाजि, ‘आले (आपा÷आमासे ङादा चेकाइसे ‘आले’ बिमुला), ए खालाङ दोकाजि ? तिल्दा ए गाइबा ?’

‘ङा खाबान मुला आपा, सुर्ता लाआतो । दोकादाम्जि ।’ ओते बिसि ङाइ फोन तोक थान्जि ।

ङा डेरारि दोमा आपा थेन आमा ङादा ब्रान्सि टिबा टिम । आले उमेश नोन आम्हेर्ना ङालान ग्याम च्यासि टिबा टिम । आले अजय, अष्टमान, सक्कल थेन रमेश तिसारि ङ्होर डुइसि टिबा म्राङ्जि । ओराङ नोन लासि आङा जाजा याङजि थेन स्वीकृति नोन ।

ङा दोबाला पायान आमासे ङादा चाबा ख्योगे लाजि । ङाइ थारेङसेन आमादा बिजि, ‘ङा म्रेन्ना गुरुङ ह्रोतेन छ्याम दिगु चासि खाबा । थेतासि ङा चाबा आचा आमा, ख्योआतो ।’

ओते बिसि ङा तिसारि निजि ।

आले उमेश नोन छ्याम छ्याम नोन खाजि । ङाइ थेदा ह्वाम्जि, ‘उमेश, तिनि ङा ज्यानाले खाम्बा आरे । थेतासि ङा याकार गि नोन म्हेर्ला, तिनि तिरे । ए रमेशला तिसारि म्हेर्गो ।’

उमेशसे बिजि, ‘आता ज्योज्यो, ङामि एतेन छ्याम नोन म्हेर्तोला ।’

थेसे डेब लाजि ।

ङाला तिसारि आले उमेश म्हेर्साम ङाइ आइराक थुङ्बा बिसि आलेसे थाहा याङ्ला । थेतासि ङाइ थेदा तिनि तिरे म्हेर्आपुङ्बा बाङ लासि ज्यागोन गाइना ह्वाम्जि । लिच्छा तिला म्हान्सि थे रमेशला तिसारि निसि प्लिङ तानिजि ।

ङाए नोन तिसारि प्लिङ ताजि, आले उमेशह्राङ लासिन ।

योथाङ्मा फेत छोर्माम, तिलाला आइराकसे लासि मुताला, थोपो स्हुखाटिबा ।

आइराकला थाङ बिसाम म्हाजिन्मुबा ।

ङाइ आइराक थुङबा बिसि दिमथेमेताइ नोन थाहा आतानि । थाहा ताबा ताम नोन आतानि ।

ङादा ताङ्बा खाजि ।

थे ताङ्बासे लासि व्हा ? ङाला दोलो स्हुखाटिबा थोपोला स्हु नोन सुप म्हाजि ।

गुरुङ ह्रो जामा याम्बुला नेपालटाररि टिमुबा, ङाचा खोपोङरि । ङानि ङ्हि टिबा ग्ला थारेङ मुसाइ सेमचा ङाम्तेरिन मुबा । थेतासि खाइमा ङा नेपालटाररि दोमुबा, खाइमा थे खोपोङरि दोकामुबा । जामा दुइरि ङानि ङ्हिला गे तिलाइ आरेमुबा । छ्याम छ्याम याम्बुला थाहा तातेबान ग्योइकाइ गेताङरिक्यार दोमुबा । ह्राङ ह्राङ्से ब्रिबा ह्वाइखा डोमुबा ।

छ्याम छ्याम ग्योइकाइला थुमरि काठुइ लामुबा । गिसेमगिसे ब्रिबा ह्वाइखा गिसेमगिदा उन्मुबा । डिक्सि छ्योइ डोमुबा । छ्याम छ्याम म्हेर्मुबा । छ्याम छ्याम चाबा चामुबा । छ्याम छ्याम ब्रामुबा ।

ङाला ‘पिङ्गाइ’ छ्योइ छिपा ताङरि मुबा । तिरे ङाइ गुरुङ ह्रोदा पाङ्जि, ‘ङादा ङाला आमाग्योइरि गोर्गि छ्योइ योनासेन छिपा सेम मुला ।’

‘ल्हाउ ज्याबा ताजि ।’ ओते बिसि गुरुङ ह्रो तिरेम ब्रुक छ्योङ्जि ।

गुरुङ ह्रोदा ङाइ ओराङ बिबा ला सोम लिच्छा ङाला ‘पिङ्गाइ’छ्योइ छिजि । चुराङ्लासि ङाला गिक्छा ‘पिङ्गाइ’छ्योइ छिपारि गुरुङ ह्रोला ङ्हाज्याङ बाङ मुला ।

गुरुङ ह्रोदा दोक्छेबिमा ङ्हाच्छा ङाइ याम्बुला गोर्गि ग्योइकाइ गेताङरि ह्रुप तामुबा । ह्रुप ताबा दुइरि ओजा ह्रोला छान ‘अग्निपुष्प’ मुबा । ओजा छानसेन ह्वाइखा ब्रिमुबा । ओजा छानग्यामसेन ग्योइकाइला थुमरि ङोसेमुबा ।

ह्रुप तासि तिलाइ दिङलिच्छा तिला म्हान्सि ङादा गुरुङ ह्रोसे तिरे पाङ्जि, ‘ईश्वर ह्रो, दारेम ङा ‘अग्निपुष्प’ छानसे सेमलेङ आब्रिबारि । चु छानग्यामसे ब्रिबारि सेम आतानि ङादा । ङाइ गोर्गि छान दाम्मुला, ओजा छानग्यामसेन ब्रिला, आता ?’

‘तिला छान ?’ थाहा ताइ म्हान्सि ङाइ ङ्योइजि ।

थेसे फुर ताङ्सि बिजि, ‘मिमिन्दा ।’

‘मिमिन्दा’ गुरुङ ग्योइला छिग । कादे ज्याबा छिग । थे बिबा ‘मेला म्हेन्दो’ टिम, थायाङ्मा ।

गुरुङह्रोसे ओजा छानग्यामसे ह्वाइखा ब्रिबा ताजि ।

गुरुङ ह्रोसे ‘मिमिन्दा’ छानग्यामसे गोर ङ्हि÷सोम ह्वाइखा ब्रिबा आब्रिबारिन ‘अग्निपुष्प’ छानदा ह्राङ लासिन पिहुर्जि ग्योइकाइला थुमग्यामसे । दाबे ङादा तिरे बिजि थेसे, ‘ईश्वर ह्रो, दारेम ङा चु मिमिन्दा छानग्यामसे नोन ह्वाइखा आब्रिबारि । चु छानग्यामसे ब्रिबारि ङादा छ्योजि । दारेम ङा जात्तुकुहेन्छेला ह्राङ्लान छान छम गुरुङग्यामसे ब्रिला ।’

ङाइ ‘ताला’ बिजि ।

छम गुरुङ ह्रोसे ह्राङ्ला छान रेमरेम पोबा म्राङ्सि ङा उदेक आतानि । ग्योइकाइला थुमरि ओजा ह्रोसे ह्राङ्लासिन स्ह्यान्दो ब्रिखेनकादेसे नोन ह्राङ्ला छान पोसि ब्रिबा ताममि क्योङदा थाहा मुला । स्ह्यान ब्रिखेनला ताम तिला लाइ ? ग्योइकाइला थुमरि गुरुङ ह्रोदा ह्रुप ताबा बिमा ङ्हाच्छान ङाइ नोन गुरुङ ह्रोसे ह्राङ लासिन गोर ङ्हि छान पोजिन्मुबा ।

ह्वाइखा ब्रिबा दुइहेन्छेन ङाइ ङाला आस्याङ थेबासे थान्बा ‘अक्कलबहादुर थोकर’ छानग्यामसे ह्वाइखा ब्रिबा लामुबा । स्योस्योरि क्यार ओजा छानग्यामसेन ह्वाइखा छिमुबा ।

सेम नासि हस्पिटलरि टिबा दुइसाङरि ङाइ ह्वाइखा ब्रिमुला बिबा थाहा याङ्सि गोर्गि नर्ससे तिरे ङादा चेकाइसे ‘ईश्वर थोकर’ बिसि होइमुबा । ‘ईश्वर थोकर’ बिमुबा ।

लिच्छा ङाइ ओजा नर्ससे थान्बा छानग्यामसेन ह्वाइखा ब्रिबा चुजि । ओराङ्लासि ओजा नर्ससे ङादा ‘ईश्वर थोकर’ बिसि ङाला छान आथान्साम/ङादा ‘ईश्वर थोकर’ बिसि दोक्छेबिमा ङ्हाच्छा ओजा नर्ससे आङ्योइसाम ङाइ ‘अक्कलबहादुर थोकर’ छानग्यामसेन ह्वाइखा ब्रिसेला मुताला, तिनि दोनान ।