तिरेकुनु कलेजरि ङाइ ब्रिबा ह्वाइखा डोतासि चिना मोक्तान ह्रोसे ङ्योइजि, ‘एला दात्तेदोना खाज्युबाइ स्योस्योरिक्यार ह्वाइखा छिपा मुला ?’ थेदा तिरेम प्लिकच्यासि ङाइ पाङ्जि, ‘आरे ।’

ह्रोसे ह्रेच्छागि लिच्छा ङादा फ्लिक दोसि च्यासि दाबे पाङ्जि, ‘आन्छाम ङादा बाउ, एसे ब्रिबा एला ह्वाइखा गिक । ङाइ गोर्गि स्योस्योरि पुइला ।’

ह्रोसे ओतेबिबा आबिबारिन ङाला सेम ताङ्सि फुरफुर ताजि । कार्वातिह्राङ लासि तोरतोर मुरि जाजि, ताङ्सि ताङ्सि ।

ह्रोदा ङाजा मुबा ह्वाइखा पिन्बान ङाइ सागिरिन ङ्योइजि, ‘खाप्पा चा स्योस्योरि थोन्लोम ङाला चु ह्वाइखा ? खाइमा थोन्ला ?’ ङादा ह्राङ्ला मिन स्योस्योरि छिपा च्याबारि आत्तुरि ताजि ।

‘ला गि÷ङ्हिलिच्छा थोन्ला । छारगोङमा स्योस्योरि ।’ चिना ह्रोसे बिजि ।

जामा ङा आपातेन खोपोङरि टिमुबा । खोपोङ्लान गोर्गि कलेजरि डोमुबा । आले अजय नोन छ्याम मुबा । कलेजग्याम डेरारि दोबाला पायान डोबा छ्योइदा कुनिगिरि पिहुर्सि ङाइ आलेदा तामसेजि, ‘ङालाइ ह्वाइखा दारेम स्योस्योरि खाबा ताजि ।’

ङादा प्लिक च्याबान थेसे पाङ्जि, ‘ज्याबा ताजि ज्योज्यो ।’

छारगोङ्मा स्योस्यो थेबा मिन मुबा, डोबाजा आरेबा । ङादा थे स्योस्यो डोबा सेम तासि खाजि । स्योस्यो खालाङ स्याप्ला ? थे स्योस्योला डिक्खेन खाला ? जामा दुइदोना ङादा था आरेबा ।

तिलाइ रे लिच्छा कलेजरि ङाइ चिनादान ङ्योइजि, ‘छारगोङमा स्योस्यो खालाङ याङ्ला, चिना ?’ ङाला लिरि तिरेम प्लिक च्यासि थेसे पाङ्जि, ‘तिल्दा ए सुर्ता ताबा ? ङाजा नोन याङ्ला ।’

तिरेकुनु चिनासे ङादा थेला डेरारि बोर्जि ।

जामादुइरि चिना ह्रोजा ङाइ तामाङ छ्योइकादेला कुन्ने टाङ्बा म्राङ्जि । तामाङ ह्वाइला एलबमकादे नोन टाङ्बा म्राङ्जि । थेदुइदोनान ङाइ ङोसेबाजुगुजा चोराङ्बा आम्राङचिमुबा । क्योलोलो दोक्छेबिमा ङ्हाच्छा चुरि म्राङ्जि ।

चिनासे ङादा छारगोङमा स्योस्योला गोर्गि बो पिन्जि । छ्यामरि मुक्तसिंह तामाङसे ब्रिबा जिक्तेन तामछ्योइए पिन्जि । चुराङ्लासि ह्राङ्ला आमाग्योइला छ्योइ याङ्बा नोन दोक्छेबिमा ङ्हाच्छान मुबा । चिनाला ज्योज्यो सुर्य मोक्तानदा नोन ङोसेम्याङ्जि । सुर्य ज्योज्यो, रेडियो गेताङ स्होमुबा । ज्यागोन दुइ ङ्हाच्छाहेन्छेन रेडियो गेताङरि थेबा÷ङोसेबा मिन मुबा ।

सुर्य ज्योज्योसे ङ्योइजि, ‘आलेला मिन तिला ?’

ज्योज्योरिक्यार लि दोसि ङाइ बिजि, ‘अक्कल ।’

ङोसेबा ताङरि चिनासे पाङ्जि, ‘अक्कल ह्रोसे ज्याबा ज्याबा ह्वाइखा नोन ब्रिमुला ।’ ङाइ ह्वाइखा ब्रिमुला बिबा थेसि ज्योज्यो सुर्य ताङ्जि । ज्योज्यो सुर्यसे नोन चिना ह्रोसे ह्राङ लासिन पाङ्जि, ‘आन्छाम, आलेला ह्वाइखा छारगोङेमा स्योस्योरि छितोला ।’ ज्योज्योसे नोन चुराङ बिबा दुइरि ङादा ताङ्बा खाजि । ताङ्सि दाबे ङाला सेम तोरतोर मुरि जाजि ।

ङा छारगोङ्मा स्योस्योदा ब्रान्टिमुबा । चिनासे कलेजरि ह्रुप तासि पाङ्जि, ‘एला ह्वाइखा छारगोङ्मा स्योस्योरि आथोन्जि ।’ ङादा आज्याना ङ्हान्जि । थे ताम थेसि चिना ह्रोला ओन्छाङ नोन ङाला मिख्लि ताइला ताइलाह्राङ ताजि । ताइचा आताइजि । ङाइ क्रालि काइसे ङ्योइजि, ‘चिना, तिल्दा एसे आथोन बिबा ङाला ह्वाइखा ?’ चिनासे ङादा प्लिक च्याबान पाङ्जि, ‘डिक्खेनसे सुङ्बा, जाक्कि ह्वाइखा आताजि रो ।’ चिनासे ङादा ओते बिबा आबिबारिन ङाला खाइमा खाइमाहेन्दे ताइबार छेबा मिख्लि फ्रोल ताइजि । ङाला मिख्लिदा म्राङ्तासि चिनासे बिजि, ‘तिल्दा क्राबा ए ?’ ङाइ तिलाइ आबिनि चिना ह्रोदा ।

ङाला ह्वाइखा आछि बिबा ताम थेसि ङादा आज्याना ङ्हाम्जि । ङाइ स्ह्यान ह्रोकादेताइ नोन ङाला ह्वाइखा स्योस्योरि छिला बिजिन्मुबा । ङादा बेनासेन ज्याबा ताजि बिसि चेकाइ लाजिन्मुबा । सेम न्हाङन्हाङरिन ङादा पेबा खाजि । थे ह्रोकादेदा लि उन्आखाम्बा दोम्राङ्जि । होराबा म्हाजि । फो ख्रेन्बा म्हाजि । ताङ्बा म्हाजि । क्युइ फुइबा म्हाजि । कलेजरि डोनिबारि सुत्ताइ ङादा सेम आतानि । च्याना च्यानान ङाला सेम सिजि ।

चुनोन दुङालसे लासि ङाइ चुबिमा सोम दिङ ङ्हाच्छाला तामदा डान्जि । थे दुइरि नोन चुराङ नोन तामुबा ङादा । जामा दुइरि ङा दुम्जा गाङला गोर्गि लोपखाङरि कक्षा कुरि डोबाइगेन मुबा । जामा गोर्गि ह्रोला ज्योज्योजा धुलिखेलहेन्से ‘सञ्जिवनी’ बिबा मिनला स्योस्यो दोकामुबा । थे ज्योज्यो चु स्योस्योला ग्राहक ताबासे ङाइए डोम्याङ्मुबा ।

स्योस्यो ङिसरेला तिरेम थोन्मुबा, ङ्हान्बा ग्योइरि । थे स्योस्योरि ह्वाइखा एन छिपा म्राङ्जि ङाइ । ङादाइ थे स्योस्योरि ह्वाइखा छिपा सेम ताजि । ङाइ थे ह्रोला ज्योज्योदा ङ्योइजि, ‘ज्योज्यो, ङाइए ह्वाइखा ब्रिमुला । ङालाइ ह्वाइखा चु स्योस्योरि छिबारि पुइगोले ज्योज्यो ?’ थे ज्योज्योसे ‘ताला’ पाङ्जि ।

तिरे ङाइ ब्रिबा ह्वाइखाकादे थे ज्योज्योदा उन्जि । ज्योज्योदा सेम निजि । ज्योज्योसे पाङ्जि, ‘चुतेबा ह्वाइखाम स्योस्योरि छिला ।’ ङाइ थे स्योस्योला ग्याम च्याबा चुजि । रुङ्बा चुजि । म्हाङरि थे स्योस्योदा म्राङ्बा चुजि । ङोन्छुपरि डान्बा चुजि । थे स्योस्यो ङाला ओन्छाङ दिनरि÷म्हुनरि ख्वारख्वार स्याकाजि । थेसे ङादा क्य्राप चुङ्सि टिजि, तिरेम सुत्ताइ सोत आपुइना ।

ङिसरेला तिरेम ङाइ ह्रोला ज्योज्योदा ह्रुप ताबा चुजि । थे ज्योज्योसेन पुइमुबा ह्वाइखादा स्योस्योरि । स्योस्यो खाबा बिबा थेबातेन ङा थे ज्योज्योजा दोचिजि ।

चु बोरि खाला बिजि आखानि । स्यान बोरि खाला बिजि आखानि । दुम्जा ख्लाबा दुइ ताजि,  ङाला ह्वाइखा स्योस्योरि आखानि । ह्वाइखा छिपा दोआम्राङनि । चु दुइरिनोन ङाला सेम सिमुबा दातेह्राङ नोन ।

ङाइ म्हान्जि, ‘ङाला ह्वाइखा तिल्दा आछिजि खाज्युबाइ स्योस्योरिक्यार ? न्हा तिला छिजि ? न्हा तिनिन छिजि ? दारेम खाइमा छिला ? खाइमा ङाइ ङाला मिन स्योस्योरि छिबा म्राङम्याङ्ला ? खाइमा ?’

दाबे चिना ह्रोसे सुङ्बा तामदा थुम डान्जि, ‘एला ह्वाइखा आथोन्बा ताजि छारगोङ्मा स्योस्योरि ।’ चिना ह्रोसे ओराङ बिबा ला गि लिच्छा ङाला ह्वाइखा छारगोङ्मा स्योस्योरिन छिजिम । छारगोङमा स्योस्यो ङादा गाङ लाबान चिनासे पाङ्जि, ‘छारगोङमा स्योस्योरि एला ह्वाइखा थोन्जिम ।’

तिरेममि चिनासे लुबा व्हा म्हान्जि । छारगोङमा स्योस्यो नोन ङाला ओन्छाङ मुबासे ङाला ह्वाइखा थेरि छिपा देन्बान मुबा । ताङ्बासे ङाला काङ सारि आतानि । ताङ्सि ताङ्बाला मिख्लि मिग्यामसे मार सोत पुइजि । छारगोङ्मा स्योस्यो याङ्बाला पायान ङा, ङाइ ङोसेबा ह्रोकादेजा दोसि ङाला छारगोङ्मा स्योस्योरि छिपा ह्वाइखादा उन्सि ब्राजि । कादे म्हिदा उन्सि ब्राजि ब्राजि, ङादान था आतानि । स्योस्यो उन्माइ ङाइ बिमुबा, ‘ङाला ह्वाइखा चे डोला दाबे, ङाला मिनए मुला थेरि डोबारि आम्लेगो ?’

स्योस्योरि ङाला ह्वाइखा छिबा म्राङ्तासि ङा ह्राङ्लासिन ङाला ह्रोकादेए ताङ्मुबा । आले अजय थेन आपा नोन ङा कादे ताङ्बा ओतेन ताङ्मुबा । चुराङ्लासि ङाला दोक्छेबिमा ङ्हाच्छा ह्वाइखा छारगोङ्मा स्योस्योरि छिमुबा ।