ब्रिखेन ज्योज्यो भक्त स्याङतानसे ङादा तिरेकुनु ह्रुप ताबा दुइसाङरि चेकाइसे सुङ्मुबा, ‘आलेदा ङाइ ङाला गिक्छा छ्योइ योनासेन दोन्ला ।’

ज्योज्यो भक्तसे ओराङ बिसि टिबा दुइसाङरि ङादा ताङ्बा खाजि । फुरफुर ताङ्बा खाजि । ताङ्सि ङाला सेम तोरतोर मुरि जाजि ।

था आयाङ्ना, खालाइसे था आयाङ्ना ।

बिमाइ ह्राङ तिरेकुनु ङादा ज्योज्यो भक्तसे ह्राङला गिक्छा छ्योइ ‘डम्फुको आत्मालाप’ दोन्जि । ह्राङला ओन्छाङ ज्योज्यो भक्तला ‘डम्फुको आत्मालाप’ म्राङ्सि ङाला सेम दाबे ताङ्जि । फुरफुर ताङ्जि । ह्राङला ओन्छाङ ज्योज्यो भक्तला ‘डम्फुको आत्मालाप’ याङ्सि ङाला सेम दाबे ताङ्जि । फुरफुर ताङ्जि । था आयाङ्ना ताङ्जि । खालाइसे था आयाङ्ना ताङ्जि ।

ताङ्जि, फुरफुर ताङ्जि ।

ज्योज्यो भक्तला ‘डम्फुको आत्मालाप’ डोबा बिमा ङ्हाच्छा ङाइ तिनि बिमा च्युब्रे दिङ ङ्हाच्छान ज्योज्यो भक्तलान ताम्सालिङ स्योस्योरि नियमित छिसि खाबा स्तम्भ ‘म्हेन्दोदा चिठी’ डोसि खामुबा । ज्योज्यो भक्तला ‘म्हेन्दोदा चिठी’ स्तम्भ डोबारि बिसिन ङाइ ताम्सालिङ स्योस्यो डोसि खामुबा । ज्योज्यो भक्तला ‘म्हेन्दोदा चिठी’ स्तम्भदा ङाइ सेमन्हाङहेन्देन डोसि खामुबा ।

तिङन्हाङहेन्देन डोसि खामुबा ।

‘म्हेन्दोदा चिठी’ स्तम्भ डोसि टिबा दुइरिक्यार नोन ज्योज्यो भक्तदा ह्रुप ताबा सेम तासि खामुबा । ‘म्हेन्दोदा चिठी’ स्तम्भ डोसिलिच्छा ज्योज्यो भक्तदा ह्रुप ताबारि ङाला सेमसे दो म्हाइसि टिमुबा । ‘म्हेन्दोदा चिठी’ स्तम्भ डोसिलिच्छा ज्योज्यो भक्तदा ह्रुप ताबारि ङाला तिङसे दो म्हाइसि टिमुबा । जामादुइरिक्यार नोन ङाला तिलाइ व्हाइखाजुगु ल्होलो स्योस्योरिक्यार छिसि खामुबा । जामादुइरिक्यार नोन ङाला तिलाइ व्हाइखाजुगु ल्होलोल्होलो स्योस्योरिक्यार ठासि खामुबा । 

ङाला तिङमा ब्रिखेन ज्योज्यो भक्त स्याङतानदा ङाइ जामादुइरि ह्रुप ताबारि आम्याङ्नि । तिलाइ लासि ह्रुप ताबारि आम्याङ्नि । ङाला तिङमा ब्रिखेन ज्योज्यो भक्त स्याङतानदा ङाइ जामादुइरि ङोसेबारि आम्याङ्नि । तिलाइ लासि ङोसेबारि आम्याङ्नि । ङ्होरि मुसा का बोरि थोप्ला– छोर्सि ङाइ ह्राङला ल्हुइला गोङ्मा ल्हेसि टिजि, थेन आटिना । ङ्होरि मुसा का बोरि थोप्ला– छोर्सि ङाइ ह्राङला ल्हुइला गोङ्मा ल्हेसि टिजि, स्योङ आम्लेना । ल्हुइला गोङ्मा ल्हेसि टिबा दुइसाङरि तिरेकुनु ज्योज्यो भक्तदा ङाइ याम्बुला भृकुटीमण्डपरि दोक्छेबिमा ङ्हाच्छा ओन्छाङ ह्रुप ताबारि म्याङ्जि, था आयाङ्ना । ल्हुइला गोङ्मा ल्हेसि टिबा दुइसाङरि तिरेकुनु ज्योज्यो भक्तदा ङाइ याम्बुला भृकुटीमण्डपरि दोक्छेबिमा ङ्हाच्छा ओन्छाङ ब्ले म्राङबारि म्याङ्जि, था आयाङ्ना ।

खालाइसे था आयाङ्ना ।

ह्रुप ताबाइतेन ङाला तिङमा ‘म्हेन्दोदा चिठी’ स्तम्भला ब्रिखेन ज्योज्यो भक्त स्याङतानसे ङादा हापख्वाइजि । ङाए नोन ह्राङला तिङमा ब्रिखेन ज्योज्यो भक्तला कुरि लेप तानिजि । थाआयाङ्ना, खालाइसे थाआयाङ्ना । ज्योज्यो भक्तसे ङादा हापख्वाइसिन टिजि । 

ज्योज्यो भक्तला कुरि ङाए नोन लेप तासिन टिजि ।

थेलिच्छा, ज्योज्यो भक्ततेन प्रे ङाइ तिरेम ङ्हिरेमचे ह्रुप ताबारि म्याङ्जि । ह्रुप तामाइबिजि ङाइ ज्योज्यो भक्ततेन प्रे ज्योज्योलान ‘म्हेन्दोदा चिठी’ स्तम्भला थोरि काठुइ लासिन टिजि, थेन आटिना । ह्रुप तामाइबिजि ङाइ ज्योज्यो भक्ततेन प्रे ज्योज्योलान ‘म्हेन्दोदा चिठी’ स्तम्भला थोरि ल्हेङमो थुइसिन टिजि, थेन आटिना । ज्योज्यो भक्तला ‘म्हेन्दोदा चिठी’ स्तम्भ डोबा दुइसाङरि ङा क्योलोलो कलेजरि डोसि खामुबा । ज्योज्यो भक्तला ‘म्हेन्दोदा चिठी’ स्तम्भ डोबा दुइसाङरि ङाला क्योलोलो ‘छार गोङ्मा’ स्योस्योरि व्हाइखा छिसि खामुबा ।

जामादुइरि ह्राङला आमाग्योइरि ब्रिसि खाबा ह्राङलान ग्योइकाइला स्हेजुगुदा ज्योज्यो भक्तदा डोबा सेम तासि खामुबा । जामादुइरि ह्राङला आमाग्योइरि ब्रिसि खाबा ह्राङलान ग्योइकाइला डाङजुगुदा ज्योज्यो भक्तदा थेना लाबा सेम तासि खामुबा । 

थे सेम सेमरिन टिमुबा ।

तिरेकुनु खोपोङला ख्वपःछेँरि ज्योज्यो भक्तदा ह्रुप ताबारि म्याङ्जि । ओजा ग्लारि ब्रिखेन ह्रो विवेक ओझाला ‘ऐँठन’ मिनला छ्योइथोरि काठुइला गेताङ स्हेङमुबा । ओजा गेताङरि ङाए नोन दोमुबा । ज्योज्यो भक्तसे ङादा फुर ताङ्सि सुङजि, ‘आले, ह्याङ्हि तिरेकुनु ह्रुप तातोला ह्या वा ?’

फुर ताङ्सि ङाइए नोन, ज्योज्यो भक्तदा ‘ह्या’ दोन्जि ।

ङाइ ह्राङला आमाग्योइरि ब्रिबारि खाम्बारि ज्योज्यो भक्त ह्राङबा ङ्हाच्छाला ब्रिखेनजुगुला बाङ मुला, ङ्हाज्याङ बाङ मुला । ङाइ ह्राङला आमाग्योइरि ब्रिबारि खाम्बारि ज्योज्यो भक्त ह्राङबा ङ्हाच्छाला ब्रिखेनजुगुला या मुला, ङ्हाज्याङ या मुला ।

ज्योज्यो भक्तदा ब्ले म्राङबा दुइसाङरि ङाइ ज्योज्योलान ‘म्हेन्दोदा चिठी’ स्तम्भ ताइ नोन ब्ले म्राङ्सिन टिमुला । ज्योज्यो भक्तदा थुम डान्सि टिबा दुइसाङरि ङाइ ज्योज्योलान ‘म्हेन्दोदा चिठी’ स्तम्भ ताइ नोन थुम डान्सिन टिमुला । थेन आटिना, ब्ले म्राङ्सिन टिमुला ।

थेन आटिना, थुम डान्सिन टिमुला ।

‘म्हेन्दोदा चिठी’ स्तम्भदा ङाइ कादे चेकाइ लासि खामुला, ओदेन ज्योज्यो भक्त ताइ नोन ङाइ चेकाइ लासि खामुला । थाआयाङ्ना, खालाइसे थाआयाङ्ना । ‘म्हेन्दोदा चिठी’ स्तम्भदा ङाइ कादे सेम निसि खामुला, ओदेन ज्योज्यो भक्त ताइ नोन सेम निसि खामुला । थाआयाङ्ना, खालाइसे थाआयाङ्ना । ‘म्हेन्दोदा चिठी’ स्तम्भदा ङाइ कादे तिङ नासि खामुला, ओदेन ज्योज्यो भक्त ताइ नोन तिङ नासि खामुला । थाआयाङ्ना, खालाइसे थाआयाङ्ना । चेकाइ लासि खामुला । सेम निसि खामुला ।

तिङ नासि खामुला ।

‘म्हेन्दोदा चिठी’ स्तम्भ डोसि लिच्छा ब्रिखेन ज्योज्यो भक्त स्याङतानला ‘डम्फुको आत्मालाप’ तिखुरिन डोबारि म्याङ्जि । ‘म्हेन्दोदा चिठी’ स्तम्भदा ङाइ कादे चेकाइ लासि खामुला, ओदेन ‘डम्फुको आत्मालाप’ ताइ नोन चेकाइ लासि खामुला । ‘म्हेन्दोदा चिठी’ स्तम्भ थेन ‘डम्फुको आत्मालाप’दा ङाइ कादे चेकाइ लासि खामुला, ओदेन ज्योज्यो भक्त ताइ नोन चेकाइ लासि खामुला ।

थेन आटिना ।

तिलाइ रे ङ्हाच्छा ङाइ खोपोङला गिक्खे क्याफेरि ब्रिखेन ज्योज्यो भक्त स्याङतानदा ह्रुप ताबारि म्याङ्जि । ज्योज्यो भक्ततेन प्रे जामे न्होरग्युमोइ नोन प्रे नोन मुबा । ङादा ब्ले म्राङबाइतेन जामे न्होरग्युमो कादे ज्याना ज्युम नेजि । जामे न्होरग्युमोला नेबारि ङाइए नोन ह्रो लाजि । क्याफेरि ह्रुप ताबा दुइसाङरि ज्योज्यो भक्ततेन प्रे ग्योइकाइला थुमला ल्हानान ल्हेङमोजुगु लाजि ।

दुइदुइरि तिङमा जामे न्होरग्युमोतेन प्रे क्लाङजि ।

ज्योज्यो भक्तसे ह्राङला गिक्छा छ्योइ ‘डम्फुको आत्मालाप’ जामे साङमो थेन न्होरग्युमोदा फुल्बा म्राङजि । चु म्राङ्सि ङाला सेम ताङ्जि ।

फुरफुर ताङ्जि ।

ङाइए नोन ह्राङला गिक्छा छ्योइ ‘पिङगाइ’ आङा याङ्जी थेन स्वीकृतिदा फुल्बा मुबा ।

‘डम्फुको आत्मालाप’ छ्योइ डोसि टिबा दुइसाङरि ङाला सेम क्राजि । ल्हानान क्राजि । ‘डम्फुको आत्मालाप’ छ्योइ डोसि टिबा दुइसाङरि ङाला तिङ स्हुखाजि । ल्हानान स्हुखाजि । ज्योज्यो भक्तसे ह्राङला गिक्छा छ्योइ ‘डम्फुको आत्मालाप’रि ह्राङला तामाङ ह्युल्बामाला देन्बा रापजुगुदा कादे ज्याना लासि थुइसि खामुला, थेमि ‘डम्फुको आत्मालाप’ला डोखेनजुगुदा था मुनोन मुला । ‘डम्फुको आत्मालाप’रि ह्राङला तामाङ ह्युल्बामाला देन्बा स्हुस्हेरजुगुदा कादे ज्याना लासि दुइसि खामुला, थेमि ‘डम्फुको आत्मालाप’ला डोखेनजुगुदा था मुनोन मुला । ‘डम्फुको आत्मालाप’ तामाङ ह्युल्बामाला देन्बा सेम हिन्ना । ‘डम्फुको आत्मालाप’ तामाङ ह्युल्बमाला देन्बा तिङ हिन्ना । तिङमा सेम । तिङमा तिङ ।

ज्योज्यो भक्तला ‘डम्फुको आत्मालाप’ ।

‘डम्फुको आत्मालाप’ याङबाइतेन ङाइ डोबा चुजि, थेन आटिना । ‘डम्फुको आत्मालाप’ याङबाइतेन ङाइ डोबा चुजि, सोत आपुइना । ङाला सेमरि टिबारि खाम्बा छ्योइ हिन्ना– ‘डम्फुको आत्मालाप’ । ङाला तिङरि टिबारि खाम्बा छ्योइ हिन्ना– ‘डम्फुको आत्मालाप’ । ज्योज्यो भक्तला ‘डम्फुको आत्मालाप’दा ङाइ कादे चेकाइ लासि खामुला, ओदेन ज्योज्यो भक्तला डोखेनजुगुसे नोन ज्योज्योला ‘डम्फुको आत्मालाप’दा चेकाइ लासि खामुला– ङाइ म्हान्सि खामुला । ज्योज्यो भक्तला ‘डम्फुको आत्मालाप’दा ङाइ कादे सेम निसि खामुला, ओदेन ज्योज्यो भक्तला डोखेनजुगुसे नोन ज्योज्योला ‘डम्फुको आत्मालाप’दा सेम निसि खामुला– ङाइ म्हान्सि खामुला । ज्योज्यो भक्तला ‘डम्फुको आत्मालाप’दा ङाइ कादे तिङ नासि खामुला, ओदेन ज्योज्यो भक्तला डोखेनजुगुसे नोन ज्योज्योला ‘डम्फुको आत्मालाप’दा तिङ नासि खामुला– ङाइ म्हान्सि खामुला ।

क्याफेग्यामसे फेलाबा दुइसाङरि ज्योज्यो भक्तसे ङादा हापख्वाइजि, ज्योगोन गाइना हापख्वाइजि । ङाइए नोन ज्योज्योला लेप्पा कुरि लेप ताजि, ज्यागोन गाइना लेप ताजि । जामे न्होरग्युमोइ नोन प्रे नोन मुबा । फेलाबा दुइसाङरि जामे न्होरग्युमो ङादा तिरेम प्लिक च्यासि ज्युम नेजि, ज्यागोन गाइना ज्युम नेजि । ङाइए नोन जामेला नेबारि ह्रो लाजि, ज्यागोन गाइना ह्रो लाजि ।