तिरेकुनु ङा चुर्सेओर्से ठासि टिबा छ्योइजुगु बासि टिबाइगे मुबा । ओजा दुइरिन ङाइ गिक्खे डायरी म्राङजि । डायरी आङा याङ्जीला मुबा । हाराबारा ओर्सि च्याजि । डायरीक्योङ नोन याङ्जीसे ग्योइकाइला छिकजुगु थुइसि खाबा म्राङजि ।
डायरीक्योङ नोन याङ्जीसे ग्योइकाइला छिकजुगु स्युसि खाबा म्राङजि ।
ङादा ताङबा खाजि ।
ङ्यासे थाङमा याङ्जीदा ङाइ फुर ताङबान पाङजि, ‘याङ्जी, एसे तिल्दा एसे ब्रिबा स्हेजुगु ङादा आउन्बा ? ङाइ एसे ब्रिबा ग्योइकाइला स्हेजुगुदा एला डायरीरि डोबारि म्याङजि । एसे ब्रिबा स्हेजुगु ज्याबा मुला । ब्रिबारि आख्लागो ।’
‘एसे केला बिसि ज्योज्यो ।’ याङ्जीसे ङादा तिरेम प्लिक च्याबान पाङजि ।
थेदा ङाइ कुरि किन्बान पाङजि, ‘खाइमाइ ह्राङला ओते ज्याबा गे लाबा आङा ताइ नोन खालाइसे केलोम ?’
ङाइ ओते तिला बिमुबा, याङ्जी ङाला कुरि लेप ताकाजि ।
जामाहेन्दे ङाइ याङ्जीसे ब्रिबा ग्योइकाइला स्हेजुगुदा ह्रुप्पा चुजि । जामाहेन्दे ङाइ याङ्जीसे ब्रिबा ग्योइकाइला स्हेजुगुदा सायार लाबा चुजि ।
चेकाइ लाबा चुजि ।
याङ्जीसे ह्राङ जाजा मुबा दुइहेन्देन याम्बुग्यामसे छिसि खाबा ‘तामाङ डाजाङ’ ग्योइकाइ स्योस्यो डोसि खामुबा । याङ्जीसे ह्राङला दिङ जाजा मुबा दुइहेन्देन याम्बुग्यामसे छिसि खाबा ‘तामाङ डाजाङ’ ग्योइकाइ स्योस्यो डोसि खामुबा । याङ्जीला सेमला ग्योइकाइ स्योस्यो मुबा– ‘तामाङ डाजाङ’ ग्योइकाइ स्योस्यो । याङ्जीला तिङला ग्योइकाइ स्योस्यो मुबा– ‘तामाङ डाजाङ’ ग्योइकाइ स्योस्यो ।
लिच्छा लिच्छाम; याङ्जीसे ह्राङला आमाग्योइग्यामला ग्योइकाइ स्योस्यो ‘तामाङ डाजाङ’ला प्रेप्रेरि ह्राङला आमाग्योइग्यामलान ल्होलोल्होलो ब्रिखेनजुगुला छ्योइजुगुइ नोन डोबा चुजि । लिच्छा लिच्छाम; याङ्जीसे ह्राङला आमाग्योइला प्रेप्रेरि ङ्हान्बा ग्योइ, हिन्दी ग्योइ थेन अङ्ग्रेजी ग्योइग्यामला ब्रिखेनजुगुला छ्योइजुगुइ नोन डोबा चुजि । याङ्जीसे डोबाचे आहिन्ना, ब्रिबाइ नोन चुजि ।
थेन आटिना चुजि ।
थेए नोन ह्राङला आमाग्योइग्यामसे ब्रिबा चुजि ।
ह्राङला आमाग्योइग्यामसे याङ्जीसे दोक्छेबिमा ङ्हाच्छा ‘ह्रो’ क्राछिकला बिजाचोमताम ब्रिजि । ओजा बिजाचोमताम ब्रिबा दुइरि याङ्जी छ्योआछ्यो च्युइसे सोम दिङलाचे मुबा । खोपोङला कालीघाटरि मुबा बासु माविरि कक्षा कु (९) रि डोसि टिमुबा । याङ्जीसे ओजा ‘ह्रो’ क्राछिकला बिजाचोमताम ह्राङलान क्लासमेट ह्रो कृष्णा ख्वालापाला (दात्ते नर्स दोजि) दा फुल्सि ब्रिमुबा । ओजा ‘ह्रो’ क्राछिकला बिजाचोमताम छिसि लिच्छा याङ्जीला बिजाचोमतामजुगु ‘तामाङ डाजाङ’ ग्योइकाइ स्योस्योरि थेन आटिना छिसि खाजि ।
लिच्छा; याङ्जीला ‘तामाङ डाजाङ’ ग्योइकाइ स्योस्योरि छिसि खाबा बिजाचोमतामजुगु तान ह्रुप्सि तामाङ न्हाङखोर, याम्बुसे ‘चिडियाखाना कोर्निमा’ मिनला बिजाचोमतामला छ्योइ छिसि बाजि । ओजा बिजाचोमतामला छ्योइ यान्दे, नाकि ल्हो, २०७५ रि छिसि खामुबा ।
‘चिडियाखाना कोर्निमा’ बिजाचोमतामला छ्योइ छिसि खाबा दुइरि याङ्जी छ्योआछ्यो च्युइसे ब्लिदिङलाचे मुबा ।
याङ्जीसे जात्तुकुहेन्देन छ्योइदा चेकाइ लासि खामुबा । याङ्जीसे जात्तुकुहेन्देन छ्योइदा सायार लासि खामुबा । ओतेचे आहिन्ना; याङ्जीसे छ्योइदा डोसि खामुबा । ओतेचे आहिन्ना; याङ्जीसे छ्योइदा तिङ नासि खामुबा । याङ्जीसे छ्योइदा सेमन्हाङहेन्देन डोसि खामुबा । याङ्जीसे छ्योइदा तिङन्हाङहेन्देन डोसि खामुबा । याङ्जीसे छ्योइदा थेन आटिना डोसि टिमुबा । याङ्जीसे छ्योइदा स्योङ आम्लेना डोसि टिमुबा ।
याङ्जीसे छ्योइदा डोसि खामुबा ।
याङ्जीला ‘चिडियाखाना कोर्निमा’ छ्योइ छिसि लिच्छा; सिर्जनालय, हेराङग्यामसे नोन बिजारापपोपला छ्योइ छिसि खामुबा ।
ङाइ एसएलसी पिन्बा दुइरिक्यार याङ्जी केबा मुबा । याङ्जीला मिनए नोन ङाइ नोन थान्बा मुबा– ‘याङ्जी’ बिसि । चेकाइसे थान्बा मिन मुबा– ‘याङ्जी’ मिन । सायार लासि थान्बा मिन मुबा– ‘याङ्जी’ मिन । सेमन्हाङग्यामसेन थान्बा मिन मुबा– ‘याङ्जी’ मिन । तिङन्हाङग्यामसेन थान्बा मिन मुबा– ‘याङजी’ मिन । दात्ते चु मिनग्यामसेन दिमथेमेजुगुला ओन्छाङरि ङोसेसि खामुला । दात्ते चु मिनग्यामसेन ङेङगोरजुगुला ओन्छाङरि ङोसेसि खामुला । दात्ते चु मिनग्यामसेन ह्रोजुगुला ओन्छाङरि ङोसेसि खामुला । दात्ते चु मिनग्यामसे ग्योइकाइला थुमरि ङोसेसि खामुला ।
याङ्जी दात्ते याम्बुला ‘एमिल एकेडेमी इन्टरनेसनल’रि सामाजिक शिक्षिकाला रुपरि गे लासि खामुला । चुबिमा ङ्हाच्छाचा; याङ्जी खोपोङला कटुञ्जेरि मुबा ‘सेन्ट जोन्स बोर्डिङ स्कूल’रि शिक्षिकाला रुपरि गे लासि खामुबा । खाप्पातामान लोपखाङरि शिक्षिकाला रुपरि गे लासि खासाइ नोन याङ्जीसे ङ्हाच्छाला ह्राङलासिन ह्राङदा सेम निबा छ्योइजुगु डोसि खामुला । खाप्पातामान लोपखाङरि शिक्षिकाला रुपरि गे लासि खासाइ नोन याङ्जीसे ङ्हाच्छाला ह्राङलासिन ह्राङला आमाग्योइरि बिजाचोमतामजुगु ब्रिसि खामुला ।
थेन आटिना ।
याङ्जीसे ङादा तिरेकुनु बिमुबा, ‘ज्योज्यो, ह्राङला आमाग्योइग्यामसे ब्रिबारि म्याङमा ङादा ल्हानान ताङबा खासि टिमुला । ङाइ ह्राङला आमाग्योइग्यामसे ब्रिसिन टिला; थेन आटिना । एसे नोन; ङाइ ह्राङलासिन थेन आटिना ब्रिसिन टिउ ह्या वा ज्योज्यो ?’
याङ्जीसे ह्राङला आमाग्योइदा चेकाइ लाबा म्राङसि ङा ताङजि; फुरफुर ताङजि । याङ्जीसे ह्राङला आमाग्योइदा सायार लाबा म्राङसि ङा ताङजि; फुरफुर ताङजि । फुर ताङबान ङाइ याङ्जीदा पाङजि, ‘याङ्जी, ह्राङला आमाग्योइग्यामसे ए÷ङासेन आब्रिसाम खाल्से ब्रिला ? ह्राङला आमाग्योइदा ए÷ङासेन चेकाइ आलासाम खाल्से लाला ? ह्राङला आमाग्योइदा ए÷ङासेन सायार आलासाम खाल्से लाला ? ह्राङला आमाग्योइदा ए÷ङासे तिङ आनासाम खाल्से नाला ? एसेइ ब्रिबारि आख्लागो, ङाइए नोन आख्ला ।’
‘चिडियाखाना कोर्निमा’लिच्छाइ नोन; याङ्जीसे ह्राङला आमाग्योइग्यामसे ल्हानान बिजाचोमतामजुगु ब्रिसि खामुला । ‘चिडियाखाना कोर्निमा’लिच्छाइ नोन; याङ्जीसे ह्राङला आमाग्योइग्यामसे ल्हानान बिजारापजुगु ब्रिसि खामुला । ‘चिडियाखाना कोर्निमा’लिच्छाइ नोन; याङ्जीसे ह्राङला आमाग्योइग्यामसे ल्हानान समीक्षाजुगु ब्रिसि खामुला । याङ्जीला तिलाइ बिजाचोमतामजुगु ल्होलोल्होलो स्योस्योरिक्यार ठासि खामुला । याङ्जीला तिलाइ बिजारापजुगु ल्होलोल्होलो स्योस्योरिक्यार ठासि खामुला । याङ्जीला तिलाइ समीक्षाजुगु ल्होलोल्होलो स्योस्योरिक्यार ठासि खामुला ।
याङ्जीसे ह्राङला आमाग्योइदा कादे चेकाइ लासि खामुला; ओदेन ङाताइ नोन चेकाइ लासि खामुला । याङ्जीसे ह्राङला आमाग्योइदा कादे सायार लासि खामुला; ओदेन ङाताइ नोन सायार लासि खामुला । ङाला सेम दुइदुइरि नासि खामुबा । ङा नासि खाबा ताम याङ्जीदा ज्यानालासि था मुला । ङा नासि टिबा दुइरि याङ्जीसे ङादा कादे चेकाइ लाजि, थेमि ङादाचे था मुला । ङा नासि टिबा दुइरि याङ्जीसे ङादा कादे सायार लाजि, थेमि ङादाचे था मुला ।
याङ्जी थेन ङाला गिक्खे पुस्तकालय मुला । पुस्तकालयन्हाङरि ल्होलोल्होलो ग्योइला÷ल्होलोल्होलो थुमला छ्योइजुगु मुला । तामाङ ग्योइला छ्योइजुगु मुला । बाइ ग्योइला छ्योइजुगु मुला । हिन्दी ग्योइला छ्योइजुगु मुला । अङ्ग्रेजी ग्योइला छ्योइजुगु मुला । ओजा छ्योइजुगुदा याङ्जी थेन ङा ल्होसि डोसि खामुला ।
थेन आटिना; डोसि खामुला ।
याङ्जी जाजा गोडालला मुला । खोपोङला ‘सेन्ट जोन्स बोर्डिङ स्कूल’रि दोक्छेबिमा ङ्हाच्छा शिक्षिका दोसि निबा दुइरिन थेर्ला विद्यार्थी गिसे याङ्जीदा ङ्योइजि रो, ‘मेम, ह्राङ डोबारि खाबाकि ङानिदा लोप्पारि खाबा ?’
‘सेन्ट जोन्स बोर्डिङ स्कूल’रि दोक्छेबिमा ङ्हाच्छा याङ्जी शिक्षिका दोसि निजि । तिलाइ दुइदोना ओजा लोपखाङरिन शिक्षिका दोसि गे लाजि । गे लोप्जि । दोक्छेबिमा ङ्हाच्छा याङ्जी शिक्षिका दोबा ओजा लोपखाङ नोन ङाइ डोबा गिक्छा लोपखाङ मुबा ।
‘सेन्ट जोन्स बोर्डिङ स्कूल’ ।
ओजा लोपखाङग्यामसे ङाइ ह्राङला डोबा तिबा मुबा । चु हिसाबसे याङ्जी ‘सेन्ट जोन्स बोर्डिङ स्कूल’रि शिक्षिका दोसि दोजि । ङाचा ‘सेन्ट जोन्स बोर्डिङ स्कूल’ला विद्यार्थी दोसि दोजि । दोक्छेबिमा ङ्हाच्छा ह्राङ डोबा लोपखाङरि ह्राङलान थेबा आङा याङ्जी शिक्षिका दोसि दोबा म्राङसि ङादा ताङबा खासि टिमुला । दोक्छेबिमा ङ्हाच्छा ह्राङसे काङ न्हेबा लोपखाङरि ह्राङलान बुरिङ थेबा याङ्जी शिक्षिका दोसि दोबा म्राङसि ङादा ताङबा खासि टिमुला । ‘सेन्ट जोन्स बोर्डिङ स्कूल’ला विद्यार्थीजुगुसे नोन याङ्जीदा ल्हानान चेकाइ लाबा म्राङजि । ‘सेन्ट जोन्स बोर्डिङ स्कूल’ला विद्यार्थीजुगुसे नोन याङ्जीदा ल्हानान सायार लाबा म्राङजि ।
ल्हानान तिङ निबा म्राङजि ।
याङ्जीला थोरि चुते ल्हेङमो थुइसि टिबा दुइसाङरि ज्यागोन दिङङ्हाच्छान याङ्जीसे ङातेन प्रे लाबा ल्हेङमोदा दाबे थुम डान्जि, ‘ज्योज्यो, ह्राङला आमाग्योइग्यामसे ब्रिबारि म्याङमा ङादा ल्हानान ताङबा खासि टिमुला । ङाइ ह्राङला आमाग्योइग्यामसे ब्रिसिन टिला; थेन आटिना । एसे नोन; ङाइ ह्राङलासिन थेन आटिना ब्रिसिन टिउ ह्या वा ज्योज्यो ?’
ishworthokar@gmail.com
तपाईको प्रतिक्रिया दिनुहोस