पात्रकादे :
बोइमा– आमा
च्याङबा– कोला
डोल्मा– चाङ
धने– साहु
(दिमरि आमा थेन म्रिङ ख्लाथान्सि च्याङबा मुग्लानरि न्होर छाबारि निुमला । आपा म्हाबा दुइरि धने साहुतेन किन्बा छे फाबारि थे मुग्लान निबा हिन्ना । तासाइ धने साहुला छे फाजिन्बा आरे । थेतासि स्योरिन धने साहु च्याङबाला दिमरि दोला)
साहु : बोइमा ओ बोइमा ! दिमरिन आरेबा कि ? मुसाइ काइ आदोन्बा ?
बोइमा : लास्सो आखे लास्सो ! चुक्यारनोन स्युगो । तिनिम स्योरिन दोगाजिमले आखे ।
साहुे : च्यागो बोइमा ङा चिबारि खाबा आहिन, ङाच्छा ङाला ताम ङ्यान्गो । एला खेप्पा म्हाबा दुइरि पिन्बा टाङगा तिनि ठ्याक्क न्हि दिङ ताजि । एला कोला च्याङबा नोन मुग्लानरि निबा तिदिङ ताजि । खाइ टाङगा पिन्बाला चाजोमाजो मुबाकि आरेबा ?
बोइमा : आखे ह्राङसे ओदे दिङमि च्याजि ओम । ङादा दारसे दिन ङि सोम पाउले । कोला च्याङबादा मुग्लानरि खबर लाला नि ! तला आखे ?
साहु : एदा ल्हाना दुइ पिनआखाम । योना कोलादा खबर लाउ । दोसि ङा हातोजि बिसाम एला दिमवारि नोन च्याबा लासि हाला । दत्तेजा ङा निजि ।
बोइमा : लास्सो आखे लास्सो । चाङ ओ चाङ ?
डोल्मो : तिल्दा ङ्योइबा फुर्सद आरेबा दुइरि ।
बोइमा : च्याङबाला फोन हाजि कि बिसि ।
डोल्मा : आरे आरे साता ङ्हि ताजि फोन आहाबा । तिनि नाङगार गे ल्हाना मुला रो थेतासि । तिल्दा ओम ? तिलाइ खबर, ताम मुसाम ङाइ पाङपिन्ना नि ।
बोइमा : धने साहु हाबा एसेनोन म्राङजि ओम थे खबर लाबारि ।
(चाङ स्युमि ताम पाङना पाङनान च्याङबाला फोन हाला)
डोल्मा : हेलो ।
च्याङबा : हेलो ! डोल्मा तिला मुला एला खबर ? आमादा हराङबा मुला ?
डोल्मो : आमानोन चुरिन मुला । दत्तेगेन धनेसाहु फेबा । आपा माबा दुइरि किन्बा टाङगा बाँकि मुबा रो किन्बारि खामुबा ।
च्याङबा : डोल्मा ङाइ एदा ल्हानान पटक टाङगा पुइगा जिन्जि । एदाइ थाहा मुबा ओम धने साहुला छे एसे तिल्दा आपिन्बा ? धने साहुला छे फापिन्गो । एदा ङाइ दर्सेला ला गिरि पुइगाला ।
डोल्मो : (डोल्मो बोमो खबान) एदा न्यासे ताम पाङला ।
च्याङबा : आमादा फोन पिन्गो ।
डोल्मा : बेट्रि बेदाम्जि योना योना ताम लाउ ।
बोइमा : हेलो ! च्याङबा तिल्दा फुन आलबा ओम ? ल्हानान ताजि फुन आलबा । कन चाजि च्याङबा ? एला काइ नोन ज्याबा आछोर्बा, एदा हाम्बा ज्याबान च्याङबा ? च्याङबा ओ च्याङबा तिल्दा ताम आपाङबा च्याङबा ?
च्याङबा : लास्सो आमा ङादा ज्याबान मुला । राङदा हराङबा मुला ? गेसे लामा फुर्सद आतबा आमा । थेतसि फोन गाइजि । आमा धने साहु हाबा रो ? तिलाइ पिर आलाउ आमा । ङाइ दिन ङि सोमरि पुइगला टाङगा । तला आमा ?
बोइमा : तला कोला तला । ओदे छे फाजि बिसाम एला आपासे नोन शान्ति याङसेला कोला ।
च्याङबा : तला आमा तिलाइ पिर आलाउ । ङा दत्ते ड्युटिरि निबा दुइ ताजि आमा ।
(च्याङबासे ताम पाङना पाङनान डोल्मोसे फोन ब्यान्सि थाला)
डोल्मा : ब्याट्रि बेजि फोन थान्गो ।
बोइमा : ज्यानालासि ताम पाङआम्याङनि च्याङबातेन ।
डोल्मा : अझइ कादे पाङतोबा ओम ताम ? (डोल्मा दिमन्हाङ निला)
बोइमा : चाङ ओ चाङ ङा वारिरि निला । दिमरिक्यार च्यागो ल वा ? (बोइमा वारिरि निला)
डोल्मा : जोराङबा दिमरि हाला चिला बरु ङा निला । चिउ एनि आमा कोला जेन । तिनि हेन्से ङा आचि । गि आचि ङ्हि आचि । अलाछिन दिम ।
(डोल्मो क्वान पोरे थोसि दिम ख्लासि निला)
तपाईको प्रतिक्रिया दिनुहोस