नेपाल मजदुर किसान पार्टीला चोहो नारायणमान बिजुक्छे (रोहित)ला श्रमिक साप्ताहिक थेन मजदुर दैनिकला छ्याम स्यान्दो याङ्पाङ (संचार) माध्यम ग्याम छिबा न्हाङ्ल्हेङमो पोप ‘दुइ थेन सेमतेन’ पार्टी ङिसछा महाधिवेशनला दुइसाङरि बि.सं. २०७६ दिङ म्हेनिङरि तेबा मुबा बिसाम दाते पार्टीला ब्रेछा महाधिवेशनला ङामरि का. रोहितला पोप्बा न्हाङ्ल्हेङमो ‘दुइ थेन सेमतेन– २’ बि.सं. २०८१ फागुनरि स्योमि समाज नेपाल ग्याम दार्सेजे तेबा मुला । चु पोपरि पार्टीला श्रमिक साप्ताहिक, मजदुर दैनिक थेन जनवर्गीय ओसेम नाम्छाला (पेशागत) समाज छ्यामला तेबा थेन स्यान्दो याङ्पाङ माध्यमरि का. रोहितसे थान्बा समेतेन थेन अभिव्यक्तिजुगु ह्रुप्बा मुला ।

डोखेन वर्गसे देःबा लासि डोबा थेन गोबारि खाम्बा लासि सरल ग्योइरि डिक्ना लाबा चु छ्योइरि का. रोहितसे नेपालला ल्होलो दुइप्लेनरि ताबा आन्दोलनला दोङराप, ह्युलला शासक दलजुगुला राजनीतिक सिद्धान्त थेन ह्रिक्पा, देन्बा कम्युनिष्ट पार्टीला सिद्धान्त, उद्देश्य थेन व्यवहारला छ्यामरि नेपालला शासक कम्युनिष्ट पार्टीला सिद्धान्त थेन व्यवहार, नेमकिपा थेन स्यान्दो दल गुङ्ला फेबा, ह्युलघाती एमसीसी थेन एसपीपी सम्झौता, एकाधिकार पुँजी, साम्राज्यवाद थेन विस्तारवादला ह्रिक्पा, फासीवाद, अवसरवाद, अराजकतावाद, ग्योइकाइ, नाजीवाद, बडा राष्ट्रवाद अहंकारवाद, संकीर्ण राष्ट्रवाद, अन्धराष्ट्रवाद थेन पार्टीला महाधिवेशनतेन ल्होलो नुररि ह्युल्बादा गोना लाबा तोसोसे चोहो रोहितसे सरल थेन स्पष्ट ग्योइरि पिनस्ह्युबा अभिव्यक्तिजुगु ल्हानान महत्पूर्ण थेन दातेला दुइरि सुताइ दुइसान्दर्भिक थेन ओतेन डोबारि उपयोगी मुला ।

ग्लेठिम बिबा ह्युलला ठिम हिन्ना, बिले ठिमजुगुला ग्ले नोन ग्लेठिम हिन्ना । चुह्राङ्लासि निस्वार्थ लिसे इमानदारीपूर्वक ह्युल थेन ह्युल्बाला सेवारि समर्पित सार्वभौम सिद्धान्तरि आधारित ठिम बिबा ग्लेठिम हिन्ना । थेह्राङ्लासि खाजिबाइ याखारगि निश्चित दर्शन, सेमतेन ओसेम वर्गीय सिद्धान्तला दानःरि आदर्श समाज स्हेङ्बा उद्देश्यसे स्हेङ्बा म्हिजुगुला संगठित समुह नोन राजनीतिक दल हिन्ना । थेतासि मुतेबा राजनीतिक दलला तिङ बिबा थेसे किन्बा सिद्धान्तन हिन्ना, खाराङ्लासि याखारगि म्हिला तिङ आरेसाम सम्भव आरे थेह्राङ्नोन लासि सिद्धान्त थेन निश्चित गन्तब्य आरेबा राजनीतिक दल छोन्बो दोबारि नोन सम्भव आरे । थेतासि माक्र्सवाद, लेनिनवाद थेन माओत्सेतुङ विचाधारादा किन्सिमाम ह्युल्बाला प्रजातन्त्र थेन समाजवाद ताबान साम्यवाददोना दोबा दोखाङ किन्सि नेपाल मजदुर किसान पार्टी स्हेङ्बा हिन्ना । नेपालला कम्युनिष्ट आन्दोलनरि म्राङ्बा खोटा सेमतेनजुगुला खण्डन, रुसी संशोधनवाद सामाजिक साम्राज्यवादरि नुप्बा, पाकिस्तान फेबा थेन नेपालला थेदुइला मजदुर संघर्ष छ्यामछ्यामरि किसान संघर्षदा नोन वर्ग संघर्षला लिरि ङ्हाच्छा बोर्बा ह्राङ्बा सैद्धान्तिक आधारशिलताला दानःरि ङ्हेसि नेमकिपा स्हेङ्बा हिन्ना । वामपन्थी अवसरवाद थेन दक्षिणपन्थी अवसरवाद लिब्रो संघर्ष लासिकेन नेपालला कम्युनिष्ट आन्दोलनदा दानःहेन्सेन थिबा उद्देश्यसे संशोधनवाद थेन अराजकतावाद लिब्रो स्हेङ्बा दुइहेन्सेन नेमकिपा संघर्षरत मुला । नेमकिपा स्हेङ्बा दुइहेन्सेन निस्वार्थ लिसे इमानदारीपूर्वक ह्युल थेन ह्युल्बाला सेवारि समर्पित मुला । थेतासि नेमकिपासे खाल्दामानदा ग्लेठिम बिबा सिद्धान्त चुङ्सि चाबा छोङ्खाङ आताना निस्वार्थपूर्वक लाबा ह्युल थेन ह्युल्बाला सेवा हिन्ना बिबा ग्युइसेर निरन्तर लिरि पिन्बान ह्युल्बाला सिद्धान्त थेन सांस्कृतिक स्तर थिबा गेरि ल्हागतिसि खाचिबा मुला ।

नेपालला शासक कम्युनिष्टजुगु माओवादी थेन एमाले रुसला नरोधवादी थेन भारतला नक्सलवादी विचारधारात्मक लाइनग्याम प्रभावित थेन निर्देशित मुला । परिणाम स्हुग २०२८ दिङला झापा विद्रोहरि व्यक्ति सेबाला लाइन किन्सिकेन खाबा एमाले थेन दिङ च्युइ सशस्त्र जनयुद्धला मिनरि हतियार थिसि १२ बुँदे दिल्ली सम्झौता ग्यामसे शान्तिपुर्ण ग्लेठिमरि पदार्पण तासि सत्ता दोबा माओवादी दाते स्योर्बारिन आखाम्बा लासि संशोधनवाद थेन दक्षिणपन्थी अवसरवादरि नुप्बा ताम दिनि तेबान छर्लङ्ग मुला । थेतासि नेपाल मजदुर किसान पार्टीसे सैद्धान्तिक संघर्षरि व्यक्ति सेबा थेन संसद्वादी संशोधनवादला लाइनग्याम समाजरि ल्हानान पोबारि आखाम बिबा तामला वैज्ञानिक अध्ययण थेन गहन काठुइ लाबान अराजकतावाद थेन संशोनवाद लिब्रोला संघर्षदा ङ्हाच्छा बोर्बा हिन्ना ।

मुतेबा कम्युनिष्टजुगु ह्युलभक्त थेन स्यानह्युलवादी ताला । ह्युलभक्त बिबा ह्युलदा चेगाइ लाबा, ह्युलला ह्राङ्बाङ, सार्वभौमिकता, स्वाधिनता थेन अखण्डदाता अक्षुष्ण थान्बान थेला रक्षाला लागि माङ्ग्यार थेन न्हाङ्ला ह्युलघाती थेन ह्युलद्रोही बाङ्ला लिब्रोरि खाइमादाम्मान संघर्ष लाबा सेम थोसि मुकाबिला लाबान ह्युलभक्त हिन्ना । खाजिबाइ ह्युल गिकला परिधिन्हाङरि केन्द्रित ताबादा संकुचित म्हान्सि जाम्बुलिङला मुतेबा ह्युलजुगुदा गिक्खेन इकाइला लिरि किन्सि जाम्बुलिङ व्हा मुतेबा म्हि जातिदा अखण्ड तेन्सि थेनोन स्हुग संगठित व्हा असंगठित लिरि आभरण थेन गे लाबारि बाङ पिन्बा सिद्धान्त नोन स्यानह्युलवाद हिन्ना । प्रकारान्तरि स्यानह्युल स्तरला गेथुम, स्यानह्युल कर्तव्य थेन विश्वबन्धुत्ववाद नोन स्यानह्युलवाद हिन्ना । थेतासि नेमकिपासे जा जाजा ह्राङ्बाङ थेन सार्वभौम ह्युलजुगुफिरि साम्राज्यवादी, विस्तारवादी थेन उपनिवेशवादीजुगुसे लाबा लिखन्डि हस्तक्षेप, प्लेबानाङ्बा, अन्याय थेन अत्याचारला लिब्रोरि सडक थेन सदनरि संघर्ष लाबान जाम्बुलिङला खात्दामान ह्युलरि ताबा ह्युलभक्तिपुर्ण आन्दोलनजुगुला पक्षरि समर्थन पिन्बान ह्राङ्ला स्यानह्युल कर्तव्य छ्योना लासि देन्बा स्यानह्युलवादी कम्युनिष्ट पार्टीला लिरि ह्राङ्दा जाम्बुलिङ गुङरि ङोसेना लाबान खाचिबा मुला । नेपालला छदम्भेषी शासक कम्युनिष्ट पार्टीजुगुसे बिसाम साम्राज्यवादी थेन उपनिवेशवादीकादेला हमला, प्लेबानाङ्बा, अन्याय थेन अत्याचारला लिब्रोरि संघर्ष आलाना लिसो समर्थन पिन्सि ह्राङ्ला स्यानह्युल कर्तव्यग्याम मारताइबा ताम दिनितेबान छर्लङ्ग मुला । नेपालला ७१ ग्लारि ६० तोङ्जा हेक्टर बिमा ल्हाना सा भारतीय विस्तारवादसे नाङ्बा मुला । नेपालला स्योङगान्दीरि भारतीय एकाधिकार पुँजीसे हैकम छ्याना लाचिबा मुला । नेपालदा भारतला सुरक्षा छातारि थान्बा लासि ताबा सन् १९५० ला ह्युलघाती च्योच्योआरेबा सन्धिीसे नेपाल सार्वभौम ह्युल आहिन भारतला प्रदेश ह्राङ्बान स्होबा मुला । भारतीय विस्तारवादला चुह्राङ्बा ह्युलघाती च्योच्योआरेबा सन्धि, प्लेबानाङ्बा थेन हस्तक्षेपला लिब्रोरि नेमकिपा स्हेङ्बा दुइहेन्सेन सडक थेन सदनरि ह्युलभक्त ह्युल्बाला काइदा होङ्ना लासि थेनआताना संघर्षर मुला । चुला ठिक लिसो नेपालला कम्युनिष्ट थेन प्रजातन्त्रवादी बिबास्होबा शासक दलजुगु बिसाम ह्राङ्ला ह्युलला सीमा सुरक्षा थेन सार्वभौमिकता रक्षाला लागि छिग गि, वाक्य गि सुताइ पाङ्बारि लोङ्ला । ह्राङ्ला ह्युलला लागि लडाइ लडप लासि सितोबा शासकजुगु भारतीय विस्तारवादला अन्याय, अत्याचार, प्लेबानाङ्बा थेन हस्तक्षेपला लिब्रो ताम पाङ्बारि लोङ्सि भारतीय विस्तारवाद शासक वर्गला ङोन्छाङ आत्मसर्पण लासि रेबाचिबा लाबा लम्पसारवादी तिल्दा आहिन ? चु शासकजुगु न्हा कम्युनिष्ट हिन्ना, न्हा ओम चुनिकादे प्रजातन्त्रवादीन हिन्ना । माओसे सुङ्बा मुला, ‘कम्युनिष्टजुगुसे यमराजला म्राप छेप्बारि, साम्राज्यवादी, थेन विस्तारवादीजुगुतेन लोङ्बाजुगु प्रजातन्त्रवादी थेन कम्युनिष्ट ताबारि आखाम ।’

नेपाल मजदुर किसान पार्टी सिद्धान्त थेन व्यवहारला सवालरि स्यान्दो बिमा फेबा मुला । नेमकिपा सिद्धान्तरि ज्योमोगाङह्राङ आकोबा थेन व्यवहाररि युङ्बाह्राङ कोङ्बा तासिकेन सम्झौता आलााबा संघर्षरि मुला । नेमकिपासे क्रान्तिकारी संसद्वाददा उपयोग लासिकेन खाचिबा मुला । चोदे नेमकिपासे क्रान्तिकारी संसद्वाददा उपयोग आलाबा हिन्साम क्युइन्हाङरि लाबा युङ्बाजुगुसे म्हुना ग्रेनग्रेन जहाजदा नोन क्षति ताना लाबा ह्राङ्बान वाला क्वान क्वान्बा नक्कली कम्युनिष्ट, नक्कली वामपन्थी थेन नक्कली समाजवादीजुगुसे मुतेबा ह्युल्बादा थाहान आपिन्ना पुँजीवादी नर्करि दोना लासेला मुबा । तासाइ नेमकिपासे सदन थेन सडक, अन्तरक्रिया थेन गोष्ठीजुगुरि साधारण गेनाम ह्युल्बा थेन बुद्धिजीवि ह्युल्बाला गुङरि खाजिबाइ स्हेदा आछुम्ना म्राङ्बा वर्ग शत्रु थेन वाला क्वानरि पिङ छे न्हाङरि लाबा पुख्रिलि वर्ग शत्रुदा ह्युल्बा गुङरि लिखन्डि ताना लाबा गे स्हेङ्बा दुइहेन्सेन थेनआताना लाचिबा मुला । हिन्ना, ह्याङ्ला ह्राङ्बा प्राङ्बो, रिाक्षर थेन सांस्कृतिक स्तर आरेन्बा बहुसंख्यक गेनाम ह्युल्बा मुबा ह्युलरि माक्र्सवाद थेन लेनिनवाद ह्राङ्बा गम्भीर सिद्धान्तदा तुरुन्तान असुशरण लापुङ्बारि दुइ ल्हागतिबा स्वभाविक हिन्ना । तोङ्जा दिङ्ला अन्धविश्वासला कारण बोक्सी, स्हा नोइ थेन स्यान्दो मानसिक नाइरि सुताइ स्यान्दोदा पाले पिन्बा थेन जामेकोलाला महिनावारीदा छाउगोठरि थान्बा अन्धविश्वासला लिब्रोरि संघर्ष लाबारि सुताइ दान्नाइ २०–३० दिङ ल्हागतिजि बिसाम सामान्तवाद थेन पुँजीवादला लिब्रोरि संघर्ष लाबारि निश्चय नोन याखारगि ऐतिहासिक दुइ ल्हागतिला । तासाइ बहुमत गेनाम ह्युल्बाला चेतनास्तर तोर रेन्सिकेन निमा संघर्षदा ङ्हाच्छा बोर्बारि खाम्सेला परिस्थिति अनुकुल तासिकेन निसेला मुला ।

तिल्मा नेमकिपादा संसद्वादी पाले ल्हागाब लाबा वाला दाज्र्युला लिब्रो लाबारि वाला दाज्र्युफिरि थिबा अवसरवादी थेन नक्कली कम्युनिष्टजुगु तिनि संसद्ग्याम सरकाररि निसि पुँजीपति वर्ग थेन डिछ्याला हित लाबा पेठिम ठिमजुगु स्होसिकेन खाचिबा मुला । संयुक्त अमेरिका थेन भारतीय विस्तारवादला ङोन्छाङ आत्मसमर्पण लासिकेन एमसीसीला दोंगारि चिसि हिन्दु प्रशान्त रणनीतिक व्हा सैन्य गठबन्धनरि बोकिन्बाकेन मुला । नेपाली ह्युल्बाला ह्राङ्लान ग्याप्सेब्राबाजुगुला मिला पट्टि ब्लासि उन्बारि नेमकिपासे खेबा थेन छार पुस्तादा जाम्बुलिङ्ला जटिल ग्लालठिम ग्याम शिक्षित लाबारि कष्टसाध्य गे आउदिन साहस थेन फुर्तिला छ्याम लासिकेन खाबा मुला । आहिन्साम आगोनान ह्याङ्ला ह्युल फिरग्याप ह्युल्बा सेनाला अखडा दोसेला मुला । ह्याङ्ला ह्युलदा दक्षिण एसियाला काबुल (अफगानिस्तान) स्होसेला मुला । नेमकिपादा संसद्वादी बिबाकादे दाते ह्राङ्ला मुखुण्डो ठ्वाङ्सि मुतेबाला ङोन्छाङ साम्राज्यावाद थेन विस्तारवादला ग्याप्से ब्राबा सावित ताजिन्बा मुला ।

दोङरापला ज्यानालासि च्यामा ४८ दिङ ङ्हाच्छा ह्युलरि एकदलीय पन्चायती डिछ्या मुबा । ग्लेतन्त्र थेन पन्चायतला मिनरि तिलाइ शोषक, समान्त थेन जमिनदार वर्गसे मोइबा किसान ह्युल्बादा शोषण लाबा मुबा । नाम्सा नाम्साला बाङ्बा छारिब्योनजुगुदा बेलायत थेन भारतीय गोर्खा सेनारि भर्ती लाबारि पुइमुबा, थेग्याम शासक थेन फ्योक्पो वर्गसे न्होर लाभ याङ्मुबा । थेतासि २००७ दिङ हेन्सेला मुतेबा प्रकारला सरकारजुगुसे तिनिदोना गोर्खा भर्ती केन्द्रला च्योच्योआरेबा सन्धिदा खारेज लासि ह्राङ्लान ह्युलरि योग्यता आन्सारला गे थेन गे आन्सारला ज्याला व्हा पारिश्रमिक गेदोइ पिन्बारि खाम्बा आरे ।

४८ दिङ ङ्हाच्छा पन्चायती ग्लेतन्त्रला लिब्रोरि नेपाली कांग्रेस थेन का. पुष्पलाल श्रेष्ठसे नेतृत्व लाबा नेपाल कम्युनिष्ट पार्टीला छ्याम स्यान्दो ल्होलो कम्युनिष्ट घटकजुगुपन्चायतला लिब्रोरि प्रजातन्त्रला पक्षरि संघर्ष लाबाकेन मुबा ।

का. पुष्पलालसे बिमुबा नेपाली कांग्रेस पार्टी बिबा ‘फिरग्याप ह्युल्बा पुँजी परास्त’ मुबा । दातेला दुइरि नोन नेपाली कांग्रेस अमेरिकी साम्राज्यावाद थेन भारतीय जनता पार्टी (भाजपा)ला फासीवादी भारतीय एकाधिकार पुँजी ओसेम विस्तारवादलान छ्योकु लाबाकेन लाबा क्योङ्दा थाहा मुला । थेदुइरि का. पुष्पलाल नेपाली कांग्रेस आरेना नेपालरि तिक्खुरि माउलिक पोबारि सम्भव आरे बिबा म्हान्मुबा बिसाम प्रमुख दुश्मन ग्ले महेन्द्र थेन ग्लेतन्त्र म्हान्मुबा । थेदुइला अवस्थारि कम्युनिष्ट पार्टी न्हाङरि सैद्धान्तिक संघर्ष तामा का. रोहितसे बिसाम फिरग्याप ह्युल्बा पुँजी परास्त पुँजीवादी पार्टी नेपाली कांग्रेस सामन्तवादरि आधारित ग्लेतन्त्र थेन भारतीय एकाधिकार पूजीलिला थोबो सोम मुबा पुख्रिन नेपाल थेन नेपाली ह्युल्बाला मुख्य दुश्मन हिन्ना बिबा ठम्याप लासि सैद्धान्तिक अडान थान्बा मुबा ।

डा. केशरजंग रायमाझी थेन बिष्णुबहादुर मानन्धरला कम्युनिष्ट समुहजुगु पन्चायततेन न्हा संघर्ष न्हा डिक्पाला नीतिरि मुबा । थेनि माक्र्सवादला लिब्रोरि बर्नस्टिनला शान्तिपूर्ण आन्दोलन थेन निर्वाचन ग्याम समाजवाद खाबा संशोधनवादी नीति तेन्मुबा । निर्मल लामा, मोहनविक्रम सिंह, जयगोविन्द साह थेन स्यान्दो ह्रोजुगु बिसाम संविधानसभाला हिमायती मुबा ।

म्हिसेबा थेन व्यक्तिगत आतंकवादला ग्यालाम ग्याम्से जेक्खे क्रान्ति सम्भव मुला बिबा रुसला नरोधवादी थेन भारतला नक्सलवादी आन्दोलनग्इाम प्रभावित तिनिला एमाले तिगाइ म्हिसे समाजदा न्होङ्ना लाबा मुला ओम तिगाइ वीरजुगुसे समाजरि ग्रेन पोबा बाबारि खाम्ला बिबा थान्बाला दानरि संघर्ष लाबाकेन मुबा । चुला ठिक लिसो नेमकिपासे रुसला नरोधवादी थेन भारतला नक्सलवादी ङि नोन लाइन ख्योल्बा हिन्ना, म्हि सेसि ग्रेन पोबाला आशा थान्बा चिन्तन अराजकतावादी दृष्टिकोण हिन्ना, तिगाइ म्हि बहादुर तातेमा समाजरि ग्रेन पोबा खाला ओम लाबारि खाम्ला बिबा आहिन, बरु बुम बुमजा गेनाम ह्युल्बा राजनीतिक लिरि सचेत आताना समाजरि ग्रेन पोबा आखाबा ताबासे बहुमत सर्वहारा वर्गला ह्युल्बाजुगुदा क्रान्तिला लागि राजनीतिक लिरि सचेत, सैद्धान्तिक थेन वैचारिक लिरि संगठित तातोबा आवश्यकतादा उन्बान ह्युल्बादा समाजवादी विचारधारासे शिक्षित ताना लाबान जनसांस्कृतिक स्तरदा नोना लाबा गेरि नेमकिपा निरन्तर लिरि सक्रियताला छ्याम ल्हागतिचिबा मुला ।

आत्मालोचना लाबा एमालेतेन पुष्पलाल समुह थेन स्यान्दो कम्युनिष्ट समुहजुगु सुताइ गिक ताबा मुबा । एमाओवादी बिबा प्रचण्ड समुहसे पुष्पलाल थेन मोहनविक्रम समुहरि वाङ्सि जनयुद्धला मिनरि गृहयुद्ध थेदुइरि लाजिन्बा आरेमुबा । लिच्छा एमाओवादीसे भारतीय विस्तारवादला ह्रोरि भारतलान हित ताबा गोङ्मा ल्हेजि ।

थे तोसोला थोम्बा परिस्थितिरि किसान आन्दोलनदा ङ्हाच्छा बोर्बारि, नेपाली कांग्रेसला ह्रो आकिन्ना कम्युनिष्ट आन्दोलन ङ्हाच्छा बोर्बारि, रुसी सामाजिक साम्राज्यवादला अफगानिस्तान फिला हमलाला लिब्रो, भारतीय विस्तारवादसे स्यार पाकिस्तानरि सैनिक अक्रमण थेन हस्तक्षेप लाबा ओसेम सिक्मिदा भारतरि म्ह्युना लाबा लिब्रोला परिस्थितिरि बागमती, नारायणी थेन जनकपुर अंचलला ह्रोजुगुतेन डिक्सि नेपाल मजदुर किसान पार्टी केबा ताम नेमकिपाला मुतेबा प्रशिक्षण, सेमतेन गोष्ठी थेन अन्तरक्रिया कक्षाजुगुरि काठुइ ल्हानान लिरि ताबा लाला ।

तासाइ सन १९९१ डिसेम्बर २६ रि रुसी समाजवादसे अस्थायी ब्रेजि ओम सोभियत संघ १४–१५ प्लेनरि बो ताजि । 

थेदुइरि पुष्पलाल समुहला केन्द्रीय समितिरि ‘नेपाल कम्युनिष्ट आन्दोलनरि म्राङ्बा खोटा सेमतेनजुगुला खण्डन’ थेन ‘सोभियत संशोनधनवाद सामाजिक साम्राज्यवादरि नुप्बा’ छ्योइजुगु ग्याम्से ह्राङ्ला दृष्टिकोण थान्सि नेमकिपाला केबा ताबा हिन्ना । नेमकिपा समाजवाद स्हेङ्बाला लागि संघर्षरत मुला । समाजवाद बिबा राज्यसे म्हिदा केबाहेन्से डोङ्बादोना मुतेबा जिम्मेवारी किन्बा, उत्पादनला मुख्यमुख्य साधनजुगुदा सामाजिकीकरण लाबा, व्यक्तित्व विकासरि च्योच्यो दुइसाङ पिन्बा, ग्युइसेर, ल्हुइथाङ निशुल्क लाबा, योग्यता आन्सारला गे थेन थेनोन आन्सारला ज्यालाला बन्दोबस्त लाबा, किसानजुगुला हितदा प्राथमिकतारि थान्सि क्रान्तिकारी भुमिसुधार लागु लाबा, वर्गीय फेबादा सन्तुलनरि बाबारि प्रगतिशील कर प्रणाली लागु लाबा, राज्यला नेतृत्वरि उत्पादन थेन ठाबाला छ्याम मुतेबा समाजदा नोन बुद्धिजीविकरण लाबा हिन्ना । समाजवाद दालकान खुला जेक्खे समस्याला समाधान आहिन, बरु नोबा सांस्कृतिक स्तरसे प्लिङ्बा समाज स्हेङ्बा नोन हिन्ना ।

नेमकिपाला कार्यकर्ताजुगु ङ्हाच्छाहेन्सेन इमानदारीपूर्वक ह्युल थेन ह्युल्बाला निस्वार्थ लिसे सेवा लाबा सेमसे संगठनला कष्टसाध्य गेरि थेनआताना ल्हागतिसि हाचिबा मुला । थेतासि नेमकिपा आलुला ब्लु सुसि सुन्तलाला आशा आला । छलछामसे ह्युल्बाला सांस्कृतिक स्तररि क्योङ पोबा आता बिबा नुररि नेमकिपाला नेतृत्व स्पष्ट मुला । चुकारण स्यान्दो कम्युनिष्ट थेन समाजवादी दलकादेसे ह्राङ्बान जाम्बुलिङला संकट नेमकिपासे नाआतोनि । नेमकिपाला दोखाङरि दातेदोना खाजिबाइ भ्रम आरे । थेतासि स्यान्दो दलजुगुला ह्राङ महधिवेशनजुगुला ब्यान्बाछेङ्बा थेन भाँडभैलो नेमकिपासे दातेदोना नाआतोबा ताम छर्लङ्ग मुला ।

राजनीतिक दलला कार्यकर्ताजुगुला अनुशासन थेन पार्टीला महाधिवेशनफिरि नोन चु छ्योइसे सरल लिरि गोबारि ह्रो ताना लाबा म्राङ्मुला । ह्युल थेन ह्युल्बा, सिद्धान्त थेन नीतिफिरि फुल्बा राजनीतिक दल जेक्खे आहिन याखारगि प्राज्ञिक गेन्दुनरि सुताइ नियम थेन अनुशासन लागु ताला । नेमकिपा न्हाङरि नोन सामुहिक केवा ताला, खाजिबाइ पार्टी ह्रोम्हिसे जेक्खे आहिन नेतासे नोन नीति, नियम थेन अनुशासनरि चितोबा ताला ओम ह्राङ्ह्राङ्ला कर्तव्यदा नातोबा ताला । बिले, सोभियत संघला एकेडेमीला याखारगि ह्रोम्हि पास्तरनाक बिबा व्हाइखाब्रिखेन थेन ग्योइकाइब्रिखेनसे डा. जिवागो बिबा याखारगि ग्रेनराप ब्रिजि । एकेडेमीसे थे छ्योइ आतेबा निर्णय लाजि ओसोम व्यक्तिगत नोन आतेगो बिसि पाङ्बा मुबा । तासाइ ब्रिखेनसे गैरकानुनी लिरि व्हा लासि थे छ्योइदा इटाली बोर्सि तेमाहेन्से थे छ्योइदा नोबेल पुरस्कार पिन्जि ।

थे पुरस्कार किन्सेला हिन्साम ब्रिखेनसे सोभियत नागरिकता ख्लातोबा घोषणा सोभियत सरकारसे लाजि । थे घट्ना बि.सं. २०१५ दिङरि क्यारला हिन्ना ओम थेदुइरि नेपालरि गिक्छा ग्रेननिर्वाचन ताबाकेन मुबा । थेनोन घटनाफिरि थेदुइरि नेपालला ब्रिखेन, व्हाइब्रिखेन थेन कलाकार बो ङिरि फेजि । एकेडेमीला ह्रोम्हिला नातासे पास्तरनाकसे ह्राङ्ला गेन्दुनला पेठिम, ठिम थेन नियमदा ङ्यान्तोबा मुबा, थे छ्योइदा छुप्सि फिरग्याप ह्युलरि तेबारि थेर्ला थेदुइला ठिमसे आपिन्मुबा । एकेडेमीला नियम थेन निर्णयला लिब्रो व्हा ह्युललान ठिमला लिब्रो ताबासे लामा पास्तरनाकला गे ख्योल्बा, गैरकानुनी थेन समाजवाद लिब्रो मुबा ।

चु कारण, राजनीतिक दलरि नोन ह्रोम्हिजुगुसे व्यक्तिगत इच्छाला मिनरि लाबा गे कारबाही पार्टीला अहितरि ताला आदे । बरु, पार्टीला गेदा प्राथमिकता पिन्तोला । व्यक्तिला आज्याबा गेसे पार्टीरि पारतिबा प्रभावफिरि ध्यान पिन्तोबा ताला । छ्यामरि, ह्राङ्ह्राङ्ला पद आन्सारला दायित्वतेन नोन पार्टी ह्रोम्हि सम्बन्धित ताला ।

मुतेबा राजनीतिक दलला ह्राङ्ह्राङ्ला विधान आन्सार निश्चित दुइरि पार्टीला महाधिवेशन नोन ताबा लाला । महाधिवेशन बिबा सामान्यतया मुतेबा राजनीतिक पार्टीला मुतेबाबिमा ग्रेन चिसाङ थेन शक्तिशाली अंग हिन्ना । बिले, खाजिबाइ दलला महाधिवेशनसे थे दलला सिद्धान्त, नीति, मिन थेन दाज्र्यु सुताइ पोबारि खाम्ला । नेतृत्व पोबारि खाम्ला । 

नेमकिपारि आबद्ध ताबा संघर्षशील ल्हानान अनुशासित थेन कर्तव्यनिष्ठ कार्यकर्ताजुगु गुङरि दोङरापसे म्लेबारि आखाम्बा सिद्धान्तनिष्ठ, कर्तव्यनिष्ठ, अनुशासित, आलोङ्बा ओसेम पार्टी थेन गेनाम, किसान ह्युल्बा गुङ्ला इमानदार सेत, याखारगि क्रान्तिकारी योद्धा थेन किसान कार्यकर्ता का. जयराम बासुकलाला देन्बा केवा संघर्ष थेन राजनीतिक संघर्षला यथार्थदा नोन छ्योइरि छार पुस्तादा प्रेरणा याङ्बा थेन पिन्बा लासि उल्लेख लाबा मुला । किसान कार्यकर्ता का. जयराम बासुकला भौतिक लिरि ह्याङ गुङरि आरेसाइ नोन पार्टी थेन ह्युल्बा गुङरि अमर थेन आम्लेबा मुस्ह्युला । ह्रोला संघर्ष थेन योगदान छार पुस्ताला लागि प्रेरणाला स्रोत ताबाला छ्याम दातेला दुइरि नोन संघर्षरि ग्यालाम उन्बा दोचिबा मुला ।

ह्युल थेन ह्युल्बाला निस्वार्थ सेवक का. जयराम बासुकला २०२२–२३ दिङहेन्से पार्टीला सम्पर्करि मुस्ह्युमुबा । ह्युल्बाला सेवा थेन सम्पर्क नोन ह्रोला ग्लेठिम मुबा । ह्रो पार्टीला मुतेबा निर्णय थेन निर्देशन ह्युल्बादोना दोना लाबा गेरि मुस्ह्युमुबा । चुनोन कारण २०२७ दिङरिक्यार ह्रोसे पार्टीला सदस्यता याङ्स्हिमुबा । ह्रोला छुम्बा मिन ‘मदन’ मिनसे पार्टीरि ङोसेबा मुबा ।

ह्युल्बातेन सम्पर्कलान कारण प्रतिक्रियावादीजुगु ह्रोतेन लोङ्मुबा । २०४५ दिङ्ला राज्यस्तरला षडयन्त्र ‘भक्तपुर काण्ड’रि इनाचो टोलरि सरकारी सुराकी ‘गोपालचा’से कर्ण ह्योजुदा तोबा जयराम बासुकलासे ह्राङ्लान मिसि म्राङ्बा ताम जेलरि चिमा इमानदारपुर्वक पार्टीला नेता थेन कार्यकर्ता ह्रोजुगुदा थेना लास्ह्युमुबा ।

ह्रोदा पंचायती सरकार, जाली, फटाहा थेन मण्डलेजुगुला मुतेबा गतिविधि थाहा मुबा । भक्तपुर काण्डरि पीडित ह्रोजुगुदा ह्रो लाबा सम्भावना म्राङ्सि पंचायती डिछ्यासे ह्रोदा चुङ्बा मुबा । कारागाररि नोन ह्रो मुतेबा ह्रोजुगुतेन मुतेबा नुररि ग्रोइ लास्ह्युमुबा । च्युप्सि थान्मा थेन खुल्ला मुमा ह्रोला केवाज्योरि खास फेबा आरेमुबा । कारागाररि मुमा ह्रोरि निराशा व्हा स्हु आम्राङ्मुबा । जेलरि ह्रोसे छ्योइ थेन स्योस्योजुगु डोबा लामुबा । दिमम्हेला चिन्तारि ब्लुम्बा स्यान्दो ह्रोजुगुदा गोना लाबा गे लास्ह्युमुबा । थेतासि ह्रोसे ह्राङ्से न्होर लाभ थेन पद आयाङ्मा गुनासो लाबा थेन ह्रोला आब्लाप्बा स्वभावग्याम पार्टीला नेता थेन कार्यकर्ताजुगु प्रभावित तास्ह्युमुबा । गेफिला निरन्तरता, निष्ठा, सरलता, मिलनसार, निडर थेन अथक स्वभाव ह्रोला गुणजुगु मुबा । थे गुणजुगुग्याम ह्याङ छार पुस्ताला ह्रोजुगुसे लोप्बारि आवश्यक मुला ।

का. रोहितला सेमतेन थेन अभिव्यक्तिजुगु ह्रुप्बा चु छ्योइसे ह्युल थेन स्यानह्युलला नुररि ग्रा पिन्बान छार थेन खेबाः पुस्ताला कार्यकर्ताजुगुदा ल्हाना उत्साह थेन सक्रियताला छ्याम संघर्षरि ङ्हाच्छा वाङ्बारि उर्जा कापपिन्बा मुला ।

काभ्रे

(छिगला अर्थः देःबा– सजिलो, दुइप्लेन– कालखण्ड, ह्रिक्पा– चरित्र, सेमतेन– विचार, दानः– आधार, दोखाङ– लक्ष्य, स्हुग– स्वरुप, स्यानह्युलवादी– अन्तराष्ट्रियवादी, ह्राङ्बाङ– स्वतन्त्र, गेथुम– कार्यक्षेत्र, स्यानह्युल– अन्तर्राष्ट्रिय, स्हा नोइ– छारे रोग,  पेठिम– ऐन, ठिम– कानुन, दोंगा– डुङ्गा, ह्रो– उहाँ/साथी, ग्रोइ– सल्लाह, ।)

दोःबा : यकिना अगाध