होइसाल थेन नाङसाल डिक्पा ह्रो मुबा । होइसाल जक्कि सोजो मुबा । आहिन्बा थेन आतोबा गे तिगाइ आलाबा । आपाआमासे बिबा ताम ज्यान लासि ङ्यान्मुबा । तसाइ नाङसाल चा चकचक लातोबा । तोबाआतोबान लाबारि सेम निबा । लाला आदे बिसाम झन थेदा लाइ लाइ जे मान्बा तोसोला मुबा । ङिनोन दिङ गिकरिन केवाकिन्बा हिन्ना । थेतासि लोप्खाङरि तेरेरे कक्षा गिकरि डोबारि भर्ना तामुबा । बागरगाङला प्राथमिक लोप्खाङरि भर्ना ताबा थेनिङ्हिदा डोबारि सेम ओत्ते आनिमुबा । तिग्दा बिसाम दिमरि तामाङ ग्योइजे पाङबा, लोपखाङरि ज्यार्दि ग्योइरि डोतोमा ताम आगोना ङिनोन म्हेर्बासे मेङ निमुबा ।
सुङरेला दिन । दिनिला गिक ङ्ह्यामा लोप्खाङला पालेसे घन्टि तिनिनि ह्राप्चि । बामनला कोलाकादे ‘छुट्टि, घरमा गएर मकै भुट्टि’ बिबान छ्योङजि । होइसाल थेन नाङसालनोन सेसि आसेना ‘छुट्टि मागाइ भुट्टि’ बिसि दिमपट्टि छ्योङजि । नाम्दिङ दुगु लाला दुइ मुबा । आउदिन दिनिसे ख्रोबा । लिनोन वापवाप लासि ङिनोन नाङसालला दिमरि दोजि । दिम दोमाम आपाआमा ह्वारिरि मागाइ ड्वाबारि सेजिम । गोठे न्हाङरि राला कोला म्याम्या लासि ङ्ह्याचिमुबा । नाङसालसे थान्बा थे रालाकोलाला मिन तरकुलि मुबा । थेनि ङि छ्याम छ्याम छ्योङसि क्लाङबा लामुबा ।
‘तरकुलिदा फो ख्रेन्जिम होइ । ङा थेला आमाजा ङ्हे ख्वासि खाला । ए चुरिन चिउ या ।’ नाङसालसे बिजि । छाङरि च्युप्पा राला कोला ब्लासि आमाजाला ङ्हे ख्वासि म्रेन्ना लाजि । म्रेन्बादेन देप्पेन छाङरि च्युप्पान मुबा ।
होइसालसे ख्रिङजि, ‘ओइ ओइ च्यागोले च्युगुला जाङ काथ्थेबा ।’
‘खाइ खानाङ ?’ नाङसाल हुर फ्याङसि दोगाजि ।
च्युगुला जाङ सोसे नान्बा थेनोन तरकुलि रालाकोला मुबा गोठेला छानो दिपटि मुबा । नाङसालदा च्युगुला जाङ ख्राङबा सेम खाजि ।
‘चु मि ख्रान्गे होइ आता ?’
नाङसालला ताम थेसि होइसालसे पाङजि, ‘तिगा लासि ख्राङला ?’ ।
‘ङाइ सेला म्हाले तिगा लातोबा ।’ देप्पेन नाङसालसे ताम दोजि ।
च्युगुला जाङ ख्राङबारि मे खानाङसे बाबा थेला सेमरि ताम क्लाङजि । आपाआमासे म्राप किलिङ लाथान्मुला । थेनोन नाङसाल चकचकेसे मे क्लाङला बिसि आपाआमासे खाइमाइनोन सलाइ, लाइटर स्याप्पा ग्लारि आथान्मुबा ।
‘एदा था मुला सेलयुङबा ठेल्साम मे थोन्मुला रो । युङबागा आरे ।’ नाङसालसे पाङजि, ‘ओइ एन्ना दिमरि सलाइ मुताला ब्राउ ।’
‘ङान्ना आमासे बाङमुला ।’ होइसालले ताम आङ्यान्बारि म्हाइजि ।
नङसालसे कर लाबासे ङिनोन होइसालला दिमरि निजि । थेला आमा माङग्यार ग्वा ह्याप्पान मुबा । ङिनोन दिमन्हाङरि वाङजि । होइसालदा बिसाम आमासे ‘मे क्लाङसाम तिसारि च्याम स्योर्मुला’ बिसि सलाइ लाइटर थुरआपुङमुबा । नाङसालसे कुदापला कुनिरि मुबा सलाइ टेप दुइसि ‘ब्राउ नि’ बिजि ।
‘ङाम आनि, दिमरिन चिला फोख्रेन्जि ।’ होइसाल आनिनि । चुदे बिबादेन नाङसाल आमादा थापाङगो या बिसि ल्हादप लाबान सलाइ गल्दारि युसि छ्योङजि ।
गोठेला छाना नोबा आरेबा । छाङफिरि ख्रेमान स्याप्मुबा । नाङसालसे सोङसोङ हारचिबा ग्वालेला मुठा स्होसि सलाइसे मे म्राजि । च्युगुला जाङरि छाङरि ख्रेसि मे चोल्जि । मे तिबादेन थे क्याथाङ यारजि । च्युगुला जाङ ख्रोजि । च्युगुला जाङ जे आहिन गोठेन ख्रोजि । तरकुलि, थेला आमातेन स्यान गोर कु रा ङ्ह्याना ङ्ह्याना ख्रोसि सिजि ।
आपाआमा मे निबा म्राङसि गुहार ह्रिबान छ्योङगाजि । नाङसाल लोङबासे दिमला सुररि लासि च्याचिबान मुबा ।
रेच्छागिरिन गोठे थेन गोठेरि मुबा राकादे मेफ्रा दोजि । च्युगुला जाङ मि झन खानाङ दोजि खानाङ । नाङसाल ह्राङसे आतोबा गे लासि तरकुलि रालाकोला सिबासे फिरसि फिरसि क्राजि । ‘ङाला तरकुलि.. ङाला रालाकोला, आमा…।’
जामे क्राबा म्राङसि आमासे नाङसालदा वाम्जि, ‘थाक्रागो जामे, एला तरकुलि जे आहिन बेनान रा सिजि ।’ आमसे नोन मिनाङ खाबा मिख्लि सुम फ्याजि । छिनगि क्राबालिच्छा थेसे सेमरि डान्जि, जातुगु तासि मे क्लाङला आदे बिबा ताम । ‘दारेम चुह्राङ खाइमाइ आला ।’ ग्रान फाजि ।
तपाईको प्रतिक्रिया दिनुहोस