बेल्बो ला क्योलोलो छेबान मुबा । गाङ, खोप, ब्लेगादे पिङ्पिङ ताजिन्मुबा । साइलुङ गाङरि सा खासु मारमार ताइसि बार्खा वाङ्बाला सङ्केत पिन्बान मुबा । भारसिङ नाम्सा सेर्खानाङ म्राङ, बुरि सार लाजिन्तासि गोठे तोर ल्हारि ल्हेबा ताङरि मुबा । खालाइ खालाइ ग्यातछे आतुप्पागादे गोठे ब्राङरि ल्हेसि ग्यातला चाजोपाजो डिक्ना लाबान मुबा । ङान्ना गोठे मार ब्यासि दुर्सागाङ्ला ब्राङरि ल्हेजिन्मुबा । ङान्ना नोन ग्लाप न्हि थेन मुइ मामा गिक न्हि ख्लासि स्यान्दो मुइ, म्हे थेन रा मोक्खोनला गोठे ल्हारि बोर्बा ताङरिन मुबा । बार्खानाङ तोर ल्हारि गोठे बोर्बा आसेम सेर्खारि मार ब्यासिरि फाप्पा थे दुइला भारसिङ नाम्साला ठिम (चलन) नोन मुबा ।

आमा गोठेरि स्ह्युमुबा । लोप्खाङरि बर्खाला छुट्टि ताजिन्मुबा । लोप्खाङरि निआतोबासे ङा फान्बारि मुबा । ङा आङि माइच्याङतेन गोठेरिमार फाप्जि । खाइमा छ्योङ्बा, खाइमा ग्लाल्छेसे ब्राबा, खाइमा आङिला ङ्हाच्छा, खाइमा लिच्छा । ताङ्सि ताङ्सि गोठेरि फाप्चि ।

ब्राङरि दोमा आमा आरेबा मुबा । मुइ थेन म्हे ब्राङ दिला पाङरिक्यार खिथान्बा मुबा । रा ब्राङ गात्पाला ह्वारिरि गोठे स्होसि थान्बाला मुबा । मुइ, म्हे थेन रा स्ह्योला छे चबान मुबा । स्ह्योला दुइ चिप्सि निबान मुबा । दिनिला स्हेर चासि निबान मुबा । साता गिक लिच्छा आमाला न्हे थुङ्बा सेम लासि ब्यासिरि फाप्पा आमा आम्राङ्माहेन्छे ङा खिस्रिक्क ताजि ।

‘ओइ ! ... आइ गोठेरिन चिबा कि छे खान्बारि ङातेन निबा ?’ आङि माइच्यासे ङ्योइजि ङादा । आमाला न्हे थुङ््आम्याङ खिस्रिक्क ताबा ङा थाइसाइ आथाइबाह्राङ लासि चिजि । आङि डासे छाङ हापख्वाइसि थोबोरि सोत पुइसि यारि हाङ्सु गिक थोसि बोमसिङ बुरिमार फाप्जि । ङा ब्राङ गात्पारि आङितेन निसाइ कि तिका लासाइ तिका लासाइ तासि राप्सिन चिजिमुबा ।

‘ओइ... डेलि ! ओइ... डेलि !’

ग्यापग्याम ङोसेबा काइ नाबेङरि टागामाहेन्छे ङा फ्लिकदोसि तोर पट्टि च्याजि । आपाग्रेनला जा कामी थेला ब्राङ गात्पारि राप्सि या वाल वाल लसि ङादा होत्बान मुबा । ङाइ नोन या वाल्छि थेदा मार होत्जि । थे छ्योङ््बान मार फाप्चि । ङा ब्राङ ग्यापला म्राङरिक्यार निजि ।

‘ओइ आइसे ङादा तिक्दा डेलि बिबा ?’ ङाइ कामीदा दुरहुइजि । थे माकाइ न्हाङरि ब्लाङ गुर्जि । दोङ न्हि माकाइ नोन गुर्जि ।

‘लु दामा ङाइ आबि च्योन ह्याङ न्हिनोन डिक्सि क्लाङ्गे’, डोङरेसि क्युत्बा माकाइ दोङ स्होलाबान थेसे पाङ्जि ।

आपाग्रेनला जा कामी दिङ्से ङा बिमा ग्रेन तसाइ ङातेबान मुबा । ङाइ थेदा दुइ दुइरि क्राना नोन लमुबा । माकाइ दोङ न्हिनोन रोलक्युत्छि सारि गुर्जि । माकाइ दोङ ङानि बिमा नोजिन्मुबा । ग्रेन म्हिला क्रेप्सा क्रेप्साते ल्होजिन्मुबा । पिङ्पिङ छ्योपछ्योप्पा मुबा । न्हिनोन ल्होसि गुर्बा माकाइ दोङ न्हि टारिन क्युत्छि थेफिरि साप्रा उब्सि तुम्जि । माकाइ दोङ बोर्सि मुइ मामाला ग्लारिमार ब्याङ्पिन्छि ब्राङरि निजि ।

‘ओइ लावाङ, च्युगुला जाङ ख्राङगे होइ !’ ब्राङ्ला छानारि ग्राइसिङ जोरि स्होबाला च्युगुला जाङ हुन्बान कामिसे पाङ्जि । 

‘ताबा ताबा लु ख्राङ्गे ।’ ङानोन सहमत ताजि । म्हार च्युगुसे जाङ क्योलोलो जे स्होबा मुबा । ग्रेन आरेबा । च्युगु मामा नोन ल्हाना आरेबा ।

ब्राङग्याम मार ब्लेरि ब्रा जोरि मा मुबा । थेरि निसि खारबा मा न्हि सोम क्युत्छि बाजि । कामीसे मा क्लेजि । ङाइ ब्राङ दिला गात्पाफिरि ब्याङ्थान्बाला बेख्लि न्हि सोम बासि च्योच्यो लासि थाजि । क्लेबा मा थेन बेख्लि छ्योप्सि च्यारि खिजि । च्युगु ख्राङ्बारि मारु तयार तजि । कामिसे मे ह्वाम्दा डेत्छि मारु दिजि ।

‘ना ना चु मारु चुङ्गो ।’ म्राबा मारु ङाला यारि पिन्बान कामीसे काडि गिक थोसि ब्राङ्थोरि थान्बाला खारबा छेङ्जि । सिलबारला खारबानाङ क्युइ तेसि यारि थोबान स्वाबारि ठिक्क तासि कुल्जि ङादा, ‘लु ख्राङो.. ख्राङो ।’ ङाइ च्युगुला जाङरितोर मे चोल्बा जे मुबा च्युगु मामागादे बुङरेसि फ्याङ्जि । तिलाइचा मेल्हामसे क्रोसि सारिमार ताइजि । चुथेमा मेल्हामसे छानाला सो दुत्छि जिन्मुबा । कामीसे खारबाला क्युइ ब्वाङ्स्वासि छानाला मे सात्जि । मे आसिबा हिन्छाम ब्राङ बुसुक्कन लुङ्सेला मुबा । ङालाचा बिसाम तिसे ग्ला ख्लाजिन्बाला मुबा । लोङ्सि ङाला ब्ला म्हाजिन्मुबा । ल्हुइ दागबोसि ग्रेन ताबाह्राङ छोर्जिमुबा । ग्वाल्छेसे शान्त ताबान निजि ।

देबला यारि मेसेह्राङ क्रोसि छाबारि वाङ्जि । ग्ला न्हि च्युगुसे जिबा थाहा ताजि । कामीदा नोन ग्राम्बारि, ताज्युरि थेन यारि लासि ग्ला सोमरि जिजिम । च्युगुसे जिबा ग्लारि स्या बोसि निजि । टाङ्सि निजि । कामीला ग्राम्बा वापवाप तासि गेङ बोबाह्राङ बोजि । मि नोन टाम्बाल टुम्बिल ताजि ।

‘लावाङ, बाब तात्छि फोर्गे होइ ल्हाना छाजि ।’ कामीसे मान लाबा ताम लाजि । ग्रेन म्हिगादेसे सिङ्सोर, क्रात्छिनगादेसे जिमा बाब फोर्बा म्राङ्सि थेसे ङादा कुल्जि । थोबो ह्योङ्सि ताला बिसि ङाइ सहमत लाजि ।

ब्राङ न्हाङरि तोर गुदेरि मुबा फुम्बा । कामी फुम्बा ङामरि निसि दाराप्जि । फुम्बा थेन कामी दान्नाइ च्योच्योबा अझ फुम्बान थे बिमा चेकचेक नोबा मुबा । थे फुम्बा ङामरि रेच्छिक राप्सि चिजि । ङा थेदान च्यासि चिजिमुबा । कामी फ्लिकदोसि यासे वाल्छि ङादा तोर होत्जि । ङा ब्राङ न्हाङरि निजि । क्याच्चा गुरि मुबा बुन्या कामीसे डुड्बारि तिजि । ङाइनो थेतेन ह्रो लाजि ।

‘लु चु थोरि क्रात्छि बाब तागो आइसे’ फुम्बातेन थान्बाला बुन्या हुन्बान थेसे ङादा पाङ्जि । थे दुइरि बुन्यारि गोठेरि क्यार ब्रा थान्बा लामुबा ।

ङा बुन्याथोरि क्रात्जि । ताङ्गाप सेतथिसि च्याबालाम बाबमि माच्चा टारि दोजिन्बाला चिम ।

‘लु बाबमि जिन्जिम । माच्चा टारिमार जाक्किजे चिम होइ ।’ ङाइ ताङ्गाप यारि थिसिन पाङ्जि ।

‘लु ब्रानो.. ब्रानो’ बिबान थे ब्राङ ग्यापप्से थोन्जि । ङा बुन्याथोरिन राप्सि चिजिजि । कामि यारि कारस्योल पुइसि न्हाङरि वाङ्जि । 

‘लु चु कारस्योलसे तागो ।’ कारस्योल ङाला पिन्बान थेसे पाङ्जि ।

फुम्बाला टारि निङ्गुजे च्युलुक मुबा । ङा फुम्बा न्हाङरिमार पुप तासि कारस्योलसे निङ्गु ख्योसि तात्बारि तिजि । निङ्गु ख्योसि तोर बाजि फुम्बाला सुङ्से तोर तात्बा कारस्योल ठाडो तासि निङ्गु मार उम्मुबा । ल्हानान रेम प्रयास लाजि । निङ्गु तात्बारि आखाम्नि ।

आमा थेन आङि छे बासि दोखाजिम । म्राङ्बा छ्याम कामी ब्राङ्से स्युत्थोन्सि ह्यार्जि । ङा कारस्योल फुम्बा न्हाङरिन ब्याङ्सि बुन्या फिसे मार फाप्जि । ङा फाप्तेमा आमा छेला दोत ब्याङ्सि ब्राङ न्हाङरि वाङ्स्ह्युजि । च्युगु ख्राङ्बाला मारु छालामनोन ताजिबा मुबा । ओस्सो स्हिजि । च्युगु ख्राङ्सि सो दिबा ब्राङ्ला छानारि मि दोबाइछ्याम आमासे फ्लिकदोसि ङाला ग्राम्बारि पाथलनाङ रोप्स्ह्युजि । खोबारि मेफ्रा म्हेन्दो छार्जि । ग्राम्बा मेसे क्रोमाह्राङ ह्वाग ह्वाग लेप्जि । ङा तिलाइ आपाङ्ना थोबो कुर्सिन चिजि ।

‘दामा ङाइ चुह्राङ्बा ग्यात ग्रान्दे आला !’ सेम न्हाङरिन पाङ्जि ।