ज्योथेबासे ङादा तिरेकुनु बिमुबा, ‘याङ्जी, जाजामा ङातेन प्रे लोपखाङ गिरिन डोबा दुइला ङाला गोर्गि ह्रो मुला । च्योङ्याम्बा ह्रो । थे ह्रोला मिन एविका स्योङतान हिन्ना । थे ह्रोदा ह्याङ्हि ल्होसि योनासेन तिरे ह्रुप तानितोला ह्या व्हा ?’

ङादा ताङ्बा खाजि ।

फुर ताङ्सि ङाइ तिखुरिन ज्योथेबादा बिजि, ‘ताला, ज्योज्यो ।’

एविकाला थोरि ङाइ ज्योथेबाग्यामसे चुते थेमुबा, ‘एविका ज्योथेबाला कक्षा ङ्हाहेन्देला ह्रो । लोपखाङ गिरिन कक्षा ङ्हाहेन्दे कक्षा ब्रेदोना छ्याम नोन डोबा ह्रो । च्योङ्याम्बा ह्रो । तिङला ह्रो । दिङ्ला ह्रो । डोबालोप्पारि तिप्पा ह्रो । एविका कक्षारि गिक्छा तामा ज्याथेबाचा सोम्छा तामुबा रो ।’

ज्योथेबासे चुराङ्बिसि टिबा दुइसाङरि एविकादा दात्तेला दात्तेन ह्रुप ताबा सेम तासि खाजि ङादा । एविकादा दात्तेला दात्तेन ब्ले म्राङगे म्हान्बा सेम तासि खाजि ङादा । दात्तेला दात्तेन । ओतेबान दुइरि ङाइ सेमन्हाङन्हाङरि म्हान्जि, ‘एविका खाराङबा मुताला ? कादे थेबा मुताला ? कादे नोबा मुताला ? खालाङ टिबा मुताला ? तिलासि टिबा मुताला ?’

लिच्छा, ज्योथेबा थेन ङा थाआयाङ्ना एविका टिबा डेरारि स्हाङ दोजि । एविका खोपोङला सुर्यविनायकरि टिबा टिम, ज्यागोन दिङ ङ्हाच्छाहेन्देन । थेरि दोसि ब्रोइ खाबा ल्हेङमो लाजि, ङ्यान्जि । दिक्खिनह्राङबा । ङादा एविका सेम निजि । ल्हानान सेम निजि । एविका म्हिए तोक जेबा । तामए नोन कादे ब्रोइ खानाते लासि पाङ्बा । ज्याबा । प्लिक च्यामान चाङमा सेमला, तिङमा सेमला म्राङ्बा– एविका ।

गोर्गि ताम, एविका लाइ नोन मिन ‘पिङ्गाइ’ टिम । ज्योथेबाला जात्तुकुला सेमजो ‘पिङ्गाइ’ला ह्राङ्बा मिन । ङादा सेम निबा मिन । ज्योथेबादा सेम निबा मिन । ङाइ चेकाइ लाबा मिन । ज्योथेबासे चेकाइ लाबा मिन । ङाला तिङ्मा मिन । ज्योथेबाला तिङ्मा मिन । ङाला सेमला मिन । ज्योथेबाला सेमला मिन । ङादा ल्हानान सेम निबा मिन । ज्योथेबादा ल्हानान सेम निबा मिन । ङाला, ज्योथेबाला सेमन्हाङरि तोक टिखाम्बा– मिन, पिङ्गाइ मिन ।

‘पिङ्गाइ’ छ्योइ यारि दोबाला पायान एविकासे ज्योथेबापाट्टि फ्लिक दोसि ङ्योइजि, ‘चु छ्योइ एसे ङाला मिनरिम ब्रिबा आहिन, अक्कल ?’

ज्योथेबासे तिलाइ आबिजि, नेसिचे टिजि ।

ishworthokar@gmail.com