जापानला याखारगि नाम्सारि खेप्पा म्हि गिकला दिमथेमे मुबा । तिरेकुनु थे खेप्पा म्हि दोङ थाबारि ह्रिरिक्यार वाङजि ।

याखारगि गाङला दिरि दोमा खेप्पासे थारेङ ग्याम खाबा ह्वाइला ज्याबा काइ थेजि ओम थे काइ खाबा ग्लारिक्यार निजि । खेप्पा म्हि ङामथामा दोसि च्यामा ग्याजा म्हिमा ल्हाना माकारजुगु तिलाइस्हे थुङसि ह्वाइ कोसि स्याबाकेन लाबा म्राङजि । थेदाइ नोन आउदिन ज्याना ङ्हाम्जि तासाइ थेरि निबारि आखाम्नि ।

ओतेबान दुइरि याखारगि माकारसे बोतल थोसि दिमरि निबारि थेग्याम फेजि । थे खेप्पा म्हिसे नोन थे माकारला लिच्छा दाङबा बिचार लाजि । ल्हानान थारेङ दोमा हेन्से बोतल ल्हानान ल्हिबा ताबासे याखारगि दोङला गालरि थान्सि ब्लाप्बा न्हाबारि चुजि ।

चु मुतेबा दृस्य खेप्पा म्हिसे लासि च्याचिबा मुबा । थेदाइ नोन चुनोन दुइरि थे बोतलला स्हे ल्हानान ज्याबा मुनाम जाजाकि ह्रितोजि, पक्कान पिन्ना ताला बिबा बिचार लाजि ।

खेप्पा म्हि माकारला ङामरि निसि ङादाइ नोन जाजाकि थुङबारि पिन्कोलो बिसि याखारगि बोतल ताजि । माकारसे चु आउदिन ज्याबा छ्युकु हिन्ना लु थागोलोम बिसि पिन्जि । खेप्पा म्हि दिमरि निसि खुयुदाइ नोन पिन्ना ओम ह्राङए नोन थुङला बिसि दिमरि बोर्सि निजि ।

चुर्से दिमरि नोन खुयुसे क्वान ख्रुचिबा दुइरि आउदिन हल्ला खल्ला लासि स्याचिबा थेजि । खुयु थेरि निसि च्यानिजि । थेरि ग्यार्जा बिमा ल्हाना च्युरगान मस्त तासि थुङसि ह्वाइ कोसि स्याबाकेन हल्ला लाचिबा मुबा ।

थे म्राङसि खुयुसे नोन च्युरगानजुगुतेन थुङबास्हे चाइ म्हान्बा ताम पाङजि । थनिकादेसे चु आउदिन ज्याबा छ्युकु हिन्ना बिबान जाजाकि खुयुदा नोइ पिन्जि । खुयुसे नोन ह्राङला खेप्पा दिमरि दोगामाहेन्से चाबारि पिन्ना बिसि बोर्सि निजि ।

ह्रेच्छाक लिच्छा ङ्हि नोन खेप्पाखुयु छ्यामछ्याम दिमरि दोजि । ङ्हिसेन ह्राङसे बाबा छ्युकुला बिसयला घटना पाङजि । थेलिच्छा खेप्पासे बाबा छ्युकु ह्राङबा स्हे खुयुदा ओम खुयुसे बाबा छ्युकु ह्राङबास्हे खेप्पादा थुङबारि पिन्जि ।

थे छ्युकु ह्राङबा स्हे थुङमा हेन्से खेप्पा खुयु अचम्मा तालसे हल्ला खल्ला लासि स्याबारि चुजि । खेप्पा च्युरगान ह्राङ लासि स्याबारि चुजि ओम खुयु माकार ह्राङ लासि स्याबारि चुजि । थे हल्ला खल्ला थेसि नाम्साबाजुगु हासिमाम च्याबारि चुजि ओम ङ्योइजि, एन्छे चु तिला लाबा ?

खेप्पा थेन खुयुसे बोतल ओन्बान ह्राङनिसे बाबा छ्युकु ह्राङबा स्हे थुङसिकेन स्याबारि चुजि । थे म्राङसि नाम्साबासे बिजि, ‘एन्छे गल्ति लासि जाकोलासे थुङबा जामेसे ओम जामेसे थुङतोबा स्हे जाकोलासे थुङचिम । दारेम बोतल देप्सि दोसि थुङगो, थेहेन्से जेक्खे ठिक ताला ।’

खेप्पा खुयुसे नाम्साबासे बिबाह्राङ लासि बोतल देप्सि छ्युकु ह्राङबा स्हे थुङजि । थेलिच्छा खेप्पा माकारह्राङ लासि ओम खुयु च्युरगान ह्राङ लासि स्याबारि चुजि ।

थे छ्युकु ह्राङबा स्हे थुङमा हेन्से जाकोलाजुगु माकार ह्राङबा बाङबा ताजि बिसाम जामेकोलाजुगु च्युरगान ह्राङबा दोसि ल्होलो हाउभाउ लासि स्याबारि खाम्जि ।

ला आले आङाजुगु, राप खाह्राङबा छोर्जि ? पाङगोम ! स्याप्जि बितेमा तिला याङजि थे चाला देबा चिम ओम ? आदे होइ । 

दो:बा : यकिना अगाध